Perdonai jãarã dachia aɓabenaba atua jaraɗabaɗa dachi ʉ̃rʉbena o kosa miaɗaa aseɗabaɗa kakua, maka ɓee dachi kʉ̃risiaɗe unibaabayua. Nauba chi asekoɓooɗa ida kuɓupeɗa mambea ariɗe pasasii aabayua.

BIBLIABA NAKA JARAƁUA: “Waaburu awãtaduanábaɗa machi chiya, mambea perdonaduanaɗai ãrĩãdu machi aɓa aɓaa, bariara aɓa junebena ʉ̃rʉbena ãrĩã jarai ɓuu aɗua” (Colosenses 3:13).

“Bichia ẽbẽra kʉ̃ria uniiɗe, ichia chi joma miaɗaa aseɓuuɗe kʉ̃risiakaa o maebʉrã ochiakaa naarã, bari bichia chi aude biʼia aseiɗeburu kʉ̃risiabarii” (Aaron).

Dachia chi miaɗaa asenii aɓabenaba mauɗeburu kʉ̃risianiibʉrã, dachi ẽpermapeɗa asta kĩra nomaa akuɓeeyua. Mauba dachi kima ome amaaɗe wãidu kʉ̃risiaɗe wãɓua.

“Bes aɓa mʉ kimaba mʉmaa perdon wiɗiɗabaɗa ichia kosa miaɗaa aseɗabaɗa kakua, jãuba mʉ ãrĩãdu puʼua ãrĩã ɓoosia. Mʉ baita chaareaɓosmina, mʉa perdonasia. Mʉa sakayua naeɗe isa perdonaabaɗa kʉ̃risiania. Dai bariara supriɗaabai ɓoosia” (Julia).

KAWA KɄ̃RISIASE

Nauɗe kʉ̃risiachãu bichi kimaba bichi puʼua ãrĩã sentibiɓuu aseburuuɗe:

• ¿Bichi ara ɓaʼãrau kakua kĩrubarika?

• ¿Bichimaa neepeɗa perdon wiɗiburuu nesitaɓue, o maebʉrã bari joma olbidapeɗa nibaɗe wãbaraa?

NAUƊEBENA BICHI KIMA OME BERREABA

• ¿Sãabe demorabadaa omerã perdonaɗai baita?

• ¿Kãare aseɗai ɓua isa perdonaɗayua?

NAU ASES

• Bichi kimaba bichi puʼua ãrĩã sentibibarii asesiibʉrã, ichia kʉ̃ria asesiiɗeeba kʉ̃risiarãaba.

• Bichia bichi kimaba jãu aseɗaa entende kawaba, mambea kʉ̃risias “jomaurãba ãrĩãdu miaɗaa asebadau” (Santiago 3:2).

“Pasil ɓua dachirã omerãba chi error asepeɗaaɗa perdonabudauɗe, maamina aude chaarea ɓuu aɓa niiburu chi aɓabena sõ pua sentibiɓoosiibʉrã. Dachimaa aɓabenaba neepeɗa perdon wiɗiiruuɗe, jãu asei baita dachirã juakaya nibaabayua” (Kimberly).

BIBLIABA NAKA JARAƁUA: “Jãu problema isa solusionábaɗa” (Mateo 5:25).