KONSEJO ƁEE ẼBẼRARÃ DEƊABENA MAEBɄRÃ AMIKO AƁA BIUBARIBURUUƊE

Bibliaburu dachirã aiɗai ɓuu biʼia paneeɗai baita

Chaanuɓus

CHI KAAƊEBENA AÑORÃƊẼ, ÃRĨÃBURU JɄRɄ DUANUU JARI ẼBẼRA BIUƊAKARE NOMAA DUANEEBAƊAUƊEBENA. Maka ɓumina, kawasiɗau kĩraka, chi ãrĩã kuitaa nureerãba jara duanuu ɓesɗe ara aɓau ɓuu chi Bibliaba yataɗeeɗa jaraɗa baɗa kĩra. Nauba unubi ɓuu consejo jara ɓee ara maka iɗibena baita servi ɓua. Maka ɓumina, ara madu jarawẽa ɓua, mama aria kawaɗai ɓua junebena libroɗe ɓʉ kuɓuuwẽe, bari Bibliaɗeeburu mauba dachi ẽbẽra biuɗakare ãrĩã kĩra chuburia ɓua.

Chi biupeɗaaɗarã maarã akawa sufriɗawẽa duanua.

Eclesiastés 9:5ɗe, chi Bibliaba jara kuɓua chi “biupeɗaaɗarã akawa kʉ̃risiaswẽa paneebarii”. Biupeɗaaɗa baɗa maarã kʉ̃risia nibaɗa biuɗakare jãabera kʉ̃risiawẽa diɗibarii (Salmo 146:4). Mauɗéburu, chi Bibliaba jara kuɓuu dachi biubudauɗe kĩrabara kãi nuɓuu kĩra (Juan 11:11).
Dachia ariɗe kuitaa panua Dachi Akõreba dachirã ãrĩã kʉ̃ria ɓuu.

Bibliaba jara ɓua: “Jeowa daurã a ẽbẽra biarãɗeburu kuɓua mauɗe ichi kʉʉrʉba ũri ɓua ichimaa aiɗaɗai wiɗi duanuurã” (Salmo 34:15). Ẽbẽra ome berreaburuuɗe dachi senti duanuuɗebena biʼia diɗibaria. Ara jãu kĩraka, Jeowa ome berreaburuuɗe dachirã biʼia sentibadaa, dachi kʉ̃risia siɗa biʼia ɓeebaria, maka ɓumina mau baitaburu ʉtaa wiɗiɗakaa. Ʉtaa wiɗibudauba dachi waukaɗa baɗa ome ara kaita paneebaria, maabea ichia aiɗai ɓua kĩra chuburiai baita.
Dachi Akõreba ne bia eneei a ɓuuɗebena kʉ̃risiaɗayua.

Bibliaba ãrĩã jara ɓua día neeyu chi biupeɗaaɗarã baɗa waya unukuaiɗebena. Jãuba jara kuɓuuɗe saka panaɗayu nau iujãaɗe mauɗe jara ɓuu Dachi Akõreba “ãchi dauɓaa jarekuarua, mauɗe biui baɗa waa unuɗaabai waa nomaa duanaɗaabayua, jẽaɗawẽa, ni puʼua siɗa” (Apocalipsis 21:3, 4). ¿Kʉ̃risiai ɓuẽ saka panaɗayu?

Ẽbẽrarã Jeowaɗe ijãa duanuurã, maarãba kʉ̃risiabudauɗe chi ẽbẽrarã kinipeɗaaɗa baɗa waya unukuaburuu mauba biʼia sentibi ɓua. Wẽra chi trʉ̃ Ann abadau, chi kima biu ɓoosii 65 año basii kimabaraapeɗaaɗa baɗa, ichia naka jara ɓuu: “Bibliaba jaradea kuɓua chi kinipeɗaaɗarã baɗa maarã sufriɗawẽa duanua mauɗe Dachi Akõreba waya ʉtaa piradrubiyua chi ichi kʉ̃risiaɗe duanuurã. Mʉ kima baɗa kʉ̃risiaburuuɗe, ichi waya piradrui kʉ̃risiabaria, makarã mʉa choroai ɓua chi nau mʉʉmaa miadaa ãrĩã pasa ɓooɗa”.

Tina, mauɗebena naeɗe jaraɗa baɗa, ichia naka a ɓuu: “Timo biusiiɗeeɗebena, mʉa kuitaa ɓua Dachi Akõreba mʉ aiɗa ɓuu. Mʉa kawa ɓua Jeowa poder ãrĩã bara ɓuuba mʉ aiɗa ɓuu mʉ nomaa koɓeeburuuɗe. Chi Bibliaba jara ɓuu jari ẽbẽrarã kinipeɗaaɗa baɗa waya ʉtaa piradrubudauɗebena, mau mʉ baita biawãra ɓoi. Mauba mʉ chaareabibaria waaburu tʉa kãribai baita aɓa mʉ kima Timo biuɗa baɗa waya unuburuuɗaa”.

Ara maka ẽbẽrarã aribiaurã Bibliaɗe ijãa duanuurãba jara duanua. Chi Bibliaɗe jara kuɓuu, ¿jãu kĩrabara komakaraa kuɓuu kĩra ɓuẽ, maebʉrã biawãra ɓubaa? Kawaba chi Bibliaba consejo jara ɓuuɗebena maarã arikʉɗe ɓuu mauɗe chi ichia jara ɓuu jãwãre panaɗaiɗebena, mara ariɗe ɓooyuɗebena, maka aseburuubʉrã kawayua chi Bibliaburu aiɗai ɓua chi ẽbẽra dachia kʉ̃ria inibaɗa biuburuuɗe.