Bichia chi cigarrillo ida ɓui ɓua

BICHIA chi cigarrillo ida ɓui kʉ̃ria niibʉrã “kĩra ʉɓʉa nibaba, berekase mau asei baita” (1 Crónicas 28:10). ¿Kãare nesita ɓua cigarrillo ida ɓuiyua?

Kʉ̃risiaba chi fecha cigarrillo ida ɓui baita. Departamento de Salud y Servicios Humanos Estados Unidosɗebenaba jara ɓuu, bichia kʉ̃risia ɓuubʉrã, chi cigarrillo ɓuiyua semana omeɗe acabai naeɗe ara ɓua mau asei baita. Jãkara fácil ãrĩã ɓooyu chi bichia kʉ̃risia koɓooɗa akawa asei baita. Jʉrʉba chi fecha calendarioɗe, bichi amikorãmaa nebʉrʉba mauɗe akarnaa wãrã́ba.

Ɓʉba papelɗe. Ɓʉba chi bichia kʉ̃risia kuɓuu aiɗai ɓua ida ɓui baita chi cigarrillo, maabae ɓʉba cha nauɗebena:

● Sakaẽra ida ɓui kʉ̃ria ɓua chi cigarrillo dobarii

● Ɓʉba chi número celularɗebena bichi amikorãɗe, bichia cigarrillo do kʉ̃riaburuuɗe jãarãmaa iuse

● Kãareba aiɗai ɓua bichi chi cigarrillo dobarii ida ɓuiyua (textos Bibliaɗebena Gálatas 5:22, 23 kĩraka)

Jãu papel bichi baara adoe nibapeɗa ara kapichia leaba. Bariara bichia chi cigarrillo ida ɓuisii siɗa, ara jãka lea nibayua bichia cigarrillo do kʉ̃riaburuuɗe.

Kʉ̃risiaba naeɗeeɗa kãare aseyu. Chi bichimaa dobibarii ɓuu mau siɗa ida ɓuse. Bichi piradruburuuɗe ara nauɗe cigarrillo koa adaubariibʉrã, eseɗauba una hora maebʉrã aude biɗa koayua. Maebʉrã bichi dobariibasiibʉrã komaa ɓuuɗe o maebʉrã koɗakare akawa ida ɓuse. Wãrã́ba chi dobadauɗaa biɗa. Mauɗe bichi du aɓa deɗe biɗa jĩwa jaraba: “Ara kiruma. Jãabaera cigarrillo dokama”, ayua; naka aseburuuba aiɗayua ẽbẽra aɓa niiba bichimaa cigarrillo dobii kʉ̃riaburuuɗe. Ara kachia kʉ̃risiaba bichi cigarrillo dobarii baɗa jãka ara naeɗeeɗabena baɗa.

Chi jãu biɗa aiɗai ɓuma. Chi jãu día neeburuuɗe chiko odoeba koi baita: zanahoria, chicle, maní, jãka ɓee. Chi amikorã, deɗabenarãmaa siɗa jaraba kãare diaɗe chi cigarrillo dobarii baɗa ida ɓui ɓua, ãchia bichi aiɗai ɓua. Cigarrillo deɗe kuɓuubʉrã, carro eɗaa, ropa eɗaa, jʉrʉse cigarrillo entero batatai baita mauɗe chi cigarrillo dobii kʉ̃ria ɓuma mau siɗa batatase, candelas, fósforos, jãka ɓee. Cigarrillo nedoɗe wãi baita chaarea ãrĩã ɓuma maamina cigarrillo deɗe kuɓuubʉrã fácil doi baita. Chi último cigarrillo doɗakare Jeowamaa ʉtaa wiɗiba jãadua nibai baita, waaburu cigarrillo doobai (Lucas 11:13).

Ẽbẽrarã ãrĩãrãba cigarrillo doyu ida ɓuisiɗau, jãabeaburu chi cigarrillo ãchi baita miadaa ãrĩã ɓuu. Bichi siɗa ida ɓui taaku dobarii, chi taaku ɓuiburuuɗe kĩrajatua senti koɓeebarii. Bichi kakua jãabea ẽpermaabai.

[Dibujo]

Jãu papel bichi baara adoe nibapeɗa ara kapichia leaba