Du aɓa ɓeeyu kʉ̃risiarã́ba aiɗa jʉrʉba

“Ẽbẽra du aɓa nii kanaɗai ɓua maka ɓumina, ome ãbua niɗaurãba choroaɗai ɓua chi enemikorã” (Eclesiastés 4:12).

JUNEBENARÃBA dachi aiɗabudauɗe, choroaɗai ɓua barikia nii enemiko neeburuuɗe. Makarã bichia chi taaku ɓui kʉ̃ria ɓuubʉrã aiɗa wiɗii ɓua bichi amikorã, bichi deɗabenarã, barikiaumaa, maarãba aiɗaɗai baita.

Wãba chi jãabae taaku doɗakau nureerãmaa, maarã baara bichi ũriɗapeɗa maabae aiɗaɗayua ãchi naeɗe bichi kĩra nibaɗa bẽrã. Torben, Dinamarcaɗe vivi niiba naka jarasia: “Junebena ẽbẽrarãba mʉ aiɗasiɗau, mʉ baita biʼia ãrĩã ɓoosia”. Mauɗe Abraham, Indiaɗe vivi niiba naka ɓʉɗa basia: “Mʉ deɗabenarã mauɗe ãbarã biɗa mʉ kʉ̃ria ãrĩã uniɗauba aiɗasii chi dobarii baɗa ɓui baita”. Bariarã dachi amikorã mauɗe ãbarãba aiɗa panuumina maucha nesitabaria, aude aseɗai ɓua.

Bhagwandas, ichia naka jarasia: “Cigarrillo 27 año doɗa basmina kawasiiɗe chi Bibliaba nauɗebena jara ɓuu, mauba kʉ̃risiabisii maucha doobai, akawa taakuɗebena bari nibaɗe wãsia. Mʉa ɓiɗĩi ɓiɗĩia ɓui karibaɗe baɗa. Mauɗe mʉ amikorã naeɗe bara nibaɗa mʉa ɓuikuaɗa basia. Maaɗaba medicorã ome biɗa aiɗa wiɗiɗa basia. Maka ɓumina jãuɗebena akawa serviibasia, makarã ẽsebuɗe joma jaraɗa baɗa Jeowamaa. Mʉa wiɗisii: “Mʉʉmaa aiɗaba cha nau vicio ɓuiyua”, naka wiɗiɗa basii. Mauɗeeburu maucha taaku doi kʉ̃risiaabasii, biʼia ɓua Dachi Akõremaa wiɗiyu.

Bichia taaku dobarii ida ɓui kʉ̃ria ɓuubʉrã, kawa kʉ̃risiase kãare asei ɓua ãrĩã do kʉ̃riaburuuɗe mau aseemaaba, mauɗe sakaẽra chaarea ɓua taaku doyu ida ɓui baita; nauɗebena kʉ̃risiaburuuba ãrĩã aiɗai ɓua. Aɓabena articuloɗe unuɗayua kãarea chaarea ɓua chi taaku doyu ɓui baita.

[Recuadro]

¿CIGARRILLO DOBARII IDA ƁUYUA ɄRMIDIA DOYU ARIƊE ƁUBAAKA?

Taaku dobarii ida ɓuiɗayua, chi nureeba ʉrmidia dobadau makawẽebʉrã parche nicotinaɗe dachi kakuamaa taaku kuɓui baita, cha naarã parche empresarã nedobʉebadauba chi nejarr ãrĩã unubadau. Jãuɗeeba bichi kakuaɗe kuɓui naeɗe kʉ̃risiaba:

¿Sakaẽra nau biʼia ɓubaama mʉ baita? Chi nureeba tratamiento asebadau ida ɓuɗayua taaku dobarii baɗa. Chi nuree ẽbẽraba jarabadau jãuba ãrĩã aiɗakau, bariara aribia dowẽa nibaɗa siɗa jãwãre waya do kʉ̃ria wiɗibadauɗeeba.

¿Sakaẽra kachirua ɓubaama mʉ baita? Chi ɓee ʉrmidia dachi baita servi ɓuuka ɓumina june maucha dachi kakua deabaria, ɓesɗe maarãba dachi nomaabipeɗa mauɗe du aɓa biui kʉ̃risiabiɗai ɓua. Bariara cha nau parche nicotinaɗebena dachi kakuaɗe dea kuɓua cigarrillo ida ɓui baita, jãu nicotina drogabʉ dachi kakua eɗa ɓeeyua, mauba dachi ãrĩã ẽpermabi ɓuu. Makarã, chi ẽbẽra nau ʉrmidia parche adau nuree araɓau taaku do nibabarii kĩra.

Cha naarã ʉrmidiaba aiɗawẽebʉrã, ¿kãare asei ɓua? Wiɗisiɗauɗe ẽbẽrarãmaa nau ʉrmidiaɗebena kãareba aiɗasii, ãrĩãrãba jarasiɗau ʉrmidia dowẽa taaku dobarii ida ɓuisiɗau.