Kauwa kuitaa kʉ̃risiaba cigarillo ida ɓuyua

“Chi ẽbẽraba cigarrillo doyu ida ɓui kʉ̃ria niibʉrã saka chi dobarii baɗa ida ɓui baita mau kapichia kʉ̃risiabadau” (“¡Deje de fumar ahora!”)

CIGARRILLO ida ɓui kʉ̃risia ɓuubʉrã, biʼia kʉ̃risiayua saka ida ɓuyu. ¿Sakaẽra ida ɓui cigarrillo dobarii baɗa? Biʼia kʉ̃risiaba sakayua biʼia ɓuu ida ɓui baita chi taaku.

Chi nejarra ãrĩã gastaabayua. Noremaacha chi cajetilla do niibʉrã, añoɗe nejarr ãrĩã́turu gasta ɓua. “Mʉa kawawẽa nibasii nejarrɗe sãabe gasta ɓosma taaku nedo ɓuuba” (Gyanu, Nepalɗebena).

Kĩrajʉʉ ãrĩã nibayua. “Biʼia nibaɗe wãsia jãabera taaku dowẽeɗeeba” (Regina, Sudafricaɗebena). Chi taaku do nibaɗa ida ɓuiburuuba dachi kakua biʼia ãrĩã noɓeeyu, chiko koburuuɗe biʼia piumaa ãrĩã ɓuu mauɗe ʉ̃buruuɗe biʼia ãrĩã ʉ̃yua; dachi kakuaɗe biʼia ãrĩã ɓeepeɗa kĩadarr siɗa mipitaa unuɗayua.

Joma bichi kakua biʼia ãrĩã noɓeeyua. “Chi mukĩra maebʉrã wẽra taaku dobarii ida ɓuiburuuɗe ãchi kakua biʼia ãrĩã noɓeeyua” (Centros para el Control y la Prevención de Enfermedades, Estados Unidosɗebena).

Ara bichi du aɓa biʼia ãrĩã senti koɓeeyua. “Mʉa ida ɓuisii chi taaku dobarii baɗa, ichíturu chibari nii kĩraka ɓoosiiɗeeba. Mʉ́turu ara mʉ kakua chibari baerã biʼia nibai ɓua” (Henning, Dinamarcaɗebena).

Bichia deɗabenarã amikorã siɗa biʼia nureabiɗayua. “Taaku dooruubʉrã [...] junebenarã aɗu ɓuubʉrã ẽpermaɗayua [...]. Chi ãrĩã kuitaa nureerãba jara panuu taaku do nureerã chi tawaburuu ũubudauba, maara siɗa ẽpermaɗapeɗa biuɗayua cáncer dachi oaɗe mauɗe dachi corazonɗe dea ɓua” (Sociedad Americana Contra el Cáncer).

Dachi Akõremaa kĩrajʉʉbiyua. “Ãbarã, [...] nau kakuaba kachirua waubarii mauɗe dachi kʉ̃risiaɗeeba waubarii joma ida ɓuɗai panuu” (2 Corintios 7:1, Biblia Chamí, WPS.). “Machi kakua deaɗayua kĩrabara regalo [...] jayoaswãe ɓoi mauɗe Dachi Akõremaa bustayua” (Romanos 12:​1).

“Mʉa kawasiiɗe Dachi Akorẽba bustakau chi jayoa ɓeeba dachi kakua dañabarii mauɗeeba mʉa chi taaku dobarii baɗa ida ɓuɗa” (Sylvia, Españaɗebena).

Dachia mau ida ɓui kʉ̃ria nimina, mau kʉ̃riaburuuba ida ɓuibikau. Nesita panuu dachi aiɗaɗai baita deɗabenarãba maebʉrã amikorãba. ¿Ãchiba kãare aseɗayua dachirã aiɗaɗai baita?