Jeowa jãu Akõre jãdu bayu biʼia unuɗayua

¿ƁOOYUE dachirã baita ne biʼia ãrĩã ɓooyu waabiɗa kawaɗawẽa panuu? Maka ɓuubʉrã, kuitaa panasirã ɓaʼãraburu Dachi Akõre ʉ̃rʉbena. ¿Sakayua? Ẽbẽrarã ãrĩãrãba kawa panuu kĩra, chi Dachi Akõre Bibliaba jara ɓuuɗebena, jãuba dachi ara nakʉɗe aiɗapeɗa, makawẽebʉrã uru baita biɗa.

Jeowa, chi Biblia Ɓʉbiɗabaɗaba kʉ̃ria ɓuu dachirãba ichi ʉ̃rʉbena kawaɗayua. Chi ẽbẽraba Salmoɗe ɓʉɗabasii: “Chi ẽbẽra jomaurã kawaɗayua bichi trʉ̃ Jeowa, bichidu chi jomaurã ʉ̃rʉ nau iujãaɗebenaɗe ɓua”. Dachi Akõreba kuitaa ɓuu chi biʼia ɓuu dachirã baita ichi ʉ̃rʉbena kawaɗayua. “Mʉ, Jeowa, bichi Akõre, mʉa jaradea ɓua bichi biʼia nibai baita”. ¿Saka biʼia ɓubama unuyua Jeowa, ʉtʉbenadu ɓuu? (Salmo 83:18; Isaías 48:17).

Jãuba dachi problemarã ãrĩã bara nuree biʼia nibaɗe wãbii ɓua, mauɗe espera nureaɗayua chi biʼia ɓuu uruburuu, mauɗe biʼia kʉ̃risiaɗapeɗa kĩrajʉʉ nureaɗayua. Mauɗe Dachi Akõre ʉ̃rʉbena biʼia kawaburuuba dachia biʼia kʉ̃risia ɓeepeɗa ẽbẽrarã iujãaɗebena ãyaa. ¿Kãaredu kʉ̃risia nuree dachia?

¿Sakayua dachi chokae nuree?

Bariara nama iujãaɗe akawara chi tecnología abadau ãrĩãdu koɓeesii bẽrã, chi ẽbẽrarãba waabiɗa kʉ̃risia nuree: ¿Sakayua duanuma dachi nau iujãaɗe? ¿Saka nureaɗai? ¿Kãare baita bibi duanua? Dachia aduabʉrã cha wiɗi ɓuu makarã adua nuree kãare baita bibi duanuu. ¿Barabaka ẽbẽraba ara jãka kʉ̃risia duanuu? Alemaniaɗe año 1990ɗebena 1999ɗaa basiiɗe wiɗisiɗau ẽbẽrarã ãrĩãmaa, chi ẽbẽrarã chi mitabenaba panausiɗau kãare baita bibi duanuuɗebena adua nuree. Bichi bibi niimarebena ẽbẽrarã ãrĩãba jãka wiɗi duanuubʉrã.

Dachia aduabʉrã sakayua bibi nuree makarã adua kãare ase kʉ̃ria duanuu dachi bidaɗe. Ẽbẽrarã ãrĩãba adua nuree kãare baita bibi nuree bẽrã, maka ɓuubʉrã ãrĩãdu traja kãriɓoapeɗa, chi nejarra ãrĩã bara nibaidu kʉ̃risia bara ɓuu, maka ɓumina naarã ẽbẽrarã du aɓa ãrĩã sentibadau. Chi nureerã ẽbẽrarãba adua nureeɗeeba sakayua bibi panuu, mauburu ãchia kʉ̃risia nuree maucha bibiɗa kʉ̃riawẽe duanuu. Nau jãka pasasia awẽra kiɗii mipitaa ãrĩã nii, periódico ɓuuɗe International Herald Tribune jarasii, ichi kiria ɓusiɗau “deeɗabena chi nejarra ãrĩãdu bara nureapeɗa biʼia bibi nibaɗa”, chi nejarra ãrĩã bara nibasmina, ichi du aɓa ãrĩã senti nibasii, adua basii kãare baita bibi niba ɓoosii, mauɗeeba du aɓa biusia ʉrmidia ãrĩã dosiiɗeeba. Mauɗe bichia biɗa unu ɓuubʉrã jãka kiruree ẽbẽraba du aɓaburu senti nuree mauɗéburu ẽbẽra mia chuburi biubaribadau.

¿Ũribarika chi ciencia abadauba ãrĩaɗebena jarabudau? Chi periódico Die Woche Alemaniaɗebenaba jara ɓuu: “Ãrĩãrã chi ciencia abadauba ariɗe jara ɓumina, mauba aiɗaɗakau Dachi Akõre kaita nibai baita. Chi evolución mauɗe chi física cuántica abadau dachi maarãba biʼia ãrĩã sentibikau”. Chi cienciaɗeeburu kawasiɗau saka wau kuɓuu chi naturalezaɗebena. Maka ɓumina chi cienciaba poyaa biʼia jaradeawẽe dachi sakayua bibi duanuu, ni saka nureaɗai uruɗe. Aɓaburu chi cienciaɗe kʉ̃risiaɗaibʉrã mauɗéburu chi wiɗiɗayu ãrĩãdu ɓooyu sakayua bibi nuree. Mauɗéburu jari chi periódico Alemaniaɗebenaba Süddeutsche Zeitung jãuba jara ɓuu, “jomaurã ẽbẽrarãba nesita duanua orientaɗayua”.

Dachi biʼia kʉ̃risiabiyu chi dachi Waukaɗaburu. Ichia waukaɗa bẽrã chi ẽbẽrarã nau iujãaɗebena, ichiaburu kuitaa ɓua sakayua nama duanuu. Bibliaba jara ɓuu chi ẽbẽrarã wausii nau iujãaɗe nibaɗapeɗa mauɗe kuidaɗayua. Chi ẽbẽrarã ãchi kʉ̃risiamara ara Dachi Akõre kĩraka nureaɗayu ichia mau kʉ̃riai baɗa, jari jipa nibaɗapeɗa unubiyu, kawa ãrĩã nuree mauɗe kʉ̃ria ãrĩã nureaɗayua. Dachia biʼia kʉ̃risiabudauɗe Jeowaba kãarea wausii, makarã dachia kawa panuu sakayua chokae nuree (Génesis 1:26-28).

¿Kãare aseburua bichi?

Bichia aduabʉrã kãare baita nama nuree, sakayua chokae nuree, makawẽebʉrã samauɗaa wãuribudau, Bibliaba jara ɓuura biʼia ãrĩãdu unuyu Jeowa. Jãdu basia Jesusba jaraɗa: “Waa chokae nibayua bichi ʉ̃rʉbena kawabaraaɗai, chi Dachi Akõre aɓaburu nii bẽrã, mauɗe chi bichia bʉeɗabaɗa ʉ̃rʉbena Jesucristo”. Maabae mipitaa ãrĩã nibayu mauɗe kʉ̃ria ãrĩã nibayu mauɗe chi Dachi Akõre kobernaburuuɗe bibi niba kʉ̃riayu, jãkaburu waaburu chokae niba kʉ̃riapeɗa mauɗe chi uruɗebenabenaɗe kʉ̃riayu, mauɗe jari naeɗe ãrĩã wiɗi baara nibaɗa makarã panauɗayu ɓooyua (Juan 17:3; Eclesiastés 12:13).

Jãka kʉ̃risiabudaubʉrã chi kosarã ãyaa ɓee unuɗayua naka pasaɗabasia Hansmaa. * Ãrĩã ɓoosia añorã ichia Dachi Akõreɗebena ɓistĩikaburu kuitaa ɓoosii, ichia kuitaa nibasii bẽrã ɓaʼãraburu Dachi Akõre ʉ̃rʉbena, mauba ichi bidaɗe aiɗaabasii. Ichi baita biʼia ɓoosii kawayudu wẽrarã, nejarr dopeɗa, orroabachii mauɗe motorã. Ichia jarabasii: “Mʉ bida biʼiaswãe bibi nii, mʉ kĩrajʉʉswãe bibi nii”. Hansba 25 años niiɗe, Dachi Akõre unupeɗa chi Biblia lea nibaɗe wãsii. Ichi amiko Jeowa ome basiiɗe kawasii kãare bibi nii, maabae ichia kambiapeɗa saka bibi nii, mauɗe Jeowa ɗebena jaranũrẽ basii. Chi 10 año basii Jeowa baita ãrĩãdu traja nibaɗe wãsii. Jãuɗéburu ichia jara nii: “Jeowa baita traja nibaɗe wãyu biʼia ãrĩã bibi nibaɗe wã ɓuu. Wãʼãeɗe nibasii kĩraka ɓuu. Jãabaeburu kuitaa ɓua kãare chokae nii Jeowa unusiiɗeeburu”.

Kawabudauɗe sakayua chokae nuree jãdu chi ẽbẽra baita preokupa ɓuu, cha nau iujãaɗe waaburu miadaabena koɓeesii ẽbẽrarã baita kosarã ãrĩã preokupa panuu.

¿Sakayua naka pasa koɓeesii?

Kosa miadaa pasa kuɓuuɗe, chi ẽbẽrarãba wiɗi kopanuu: ¿sakayua naka pasa koɓeesii? Chi ẽbẽra biʼia akʉ ɓeeɓuu kawaburuuɗe sakayua miadaa ɓuu pasaburuu. Ichia kuitaawẽebʉrã sakayua miadaa pasabarii ara mauba supripeɗa mauɗéburu ãrĩã nomaa kʉ̃risia nibaɗe wãyua. Jãka pasasii kĩra Brunimaa nawe awẽra ãrĩã kiɗiiɗe.

“Aribia baburuu biusii mʉ kau cheke Susanne. Mʉa Dachi Akõreɗe ijãa nibapeɗa mauɗe sacerdoterãɗe biɗa maarãba mʉ kĩra chuburiaɗayua. Ichia mʉʉmaa jarasiiɗe Dachi Akõreba bajãaɗaa odoesii aria ángel kĩra bibiyua. Mʉ kau cheke biubarisiiba mʉ ãrĩãdu nomaa ɓeebisii, jãuburu mʉa Dachi Akõre iaɗabisii ichia mʉ juata odoesiiɗeeburu”. Bruni ãrĩãdu suprisia. “Nibasia aɓa Jeowa ɗebena jaraniiba Bibliaɗe unubisii Dachi Akõre iaɗa nibaabayu. Jeowaba odowẽe basii bajãaɗaa Susanne mauɗe angelɗe bayuwãe. Ichi ẽpermasii dachirã joma biʼiwãe nureeɗeeba. Mʉ kau cheke kãi koɓeesii biusiiɗe, espera nuɓuu Jeowaba piradrubii bẽrã. Mauɗe ichia dachi ẽbẽrarã wausii nau Iujãaɗe biuɗawẽa bibi baita, chi nau uruɗe baitabenaɗe. Mʉa kawasiiɗe saka nii Jeowa, mauɗéburu ichi kaita nibaɗe wãsia, mauɗe mʉ biʼia ãrĩã sentipeɗa puʼuawẽa senti nibasia” (Salmo 37:29; Hechos 24:15; Romanos 5:12).

Ẽbẽrarã ãrĩã baraa supribadau sakayua dachi baita kosarã miadaa ɓee pasabarii: chi kerrarã unubudau, mauɗe jarrbisia senti nuree, mauɗe ioro uribarii neeburuuɗe. Mauɗéburu Bruni kĩrajʉʉ ãrĩã sentipeɗa Bibliaɗebena kawapeɗa mauɗe Jeowaɗebena kawasiiɗeeba, Jeowa kulpa wãʼãe nii dachia supri duanuuɗebena, Jeowaba kʉ̃riawẽe basii dachia supriɗai baita maka ɓumina ara nauɗe akabayu chi ne miadaa ome. Mauɗéburu ewariburuucha chi miadaa kuɓuu ãrĩã unu koɓeepeɗa mauɗéburu nau iujãaɗe ãrĩã suprimaa duanuu, mau ara nauɗe chi jãarã akabai kuɓuuɗeeba. Jomaurãba espera duanuu cha kuɓuu joma kambia bẽrã (2 Timoteo 3:1-5; Mateo 24:7, 8).

Saka unuɗai ɓua Dachi Akõre

Hans mauɗe Bruniba aduabasiɗau saka unuɗayu biʼia chi Dachi Akõreɗebena. Ãchia ijãabasiɗaa Dachi Akõreɗe, maka ɓumina aduabasiɗau ichi ʉ̃rʉbena. Ãchia tiempo sakasiɗauɗe ãrĩãdu kawaɗai baita Jeowaɗebena, ãchira biʼia ãrĩã wã panuu nau bidaɗe. Ãchia wiɗi panaɗabaɗa panausiiɗeeba, jãuburu ãchia biʼia ãrĩã kʉ̃risiabipeɗa mauɗe chi uruɗebenaɗe kʉ̃risiaɗayu biʼia ãrĩã. Ẽbẽrarãɗebena ãrĩã trajabadau Jeowa baita bibi nurea ara jãu kĩraka.

Unui baita Jeowaɗebena, biʼia ãrĩã kawa kʉ̃risiapeɗa Bibliaɗebena kawayua, chi Bibliaba unubi ɓuu ichia kʉ̃ria ɓuu biʼia kawaɗapeɗa mauɗe dachi kãare asei baita. Chi siglo nabena ẽbẽrarã ãrĩãdu bibi nureasii jãarã siɗa ara jãka sentisiɗaurã. Jãu tiempoɗe bibi nibasii chi médico mauɗe chi historia nebʉrʉbarii Lucas, ichia jarasii chi konkrekasion Bereaɗebena (Greciaɗe) “adausiɗau Pablo mauɗe Silasɗebena chi Jeowa Beɗeaɗebena kĩrajʉʉ ãrĩãdu, maabae kawasiɗau chi Bibliaɗebena ewariburuucha kawa ũrisiɗau jãarã biawãra kuitaaɗayua” (Hechos 17:10, 11).

Maabae chi Jesusɗe ijãa nureerã chi siglo nabenaɗebenarã reunibasiɗau chi konkrekasionɗe (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Ara jãka pasamaa kuɓuu nau ewariɗe biɗa. Chi Jeowa ɗebena jaranũrẽ ãbua meraabadau reunionɗe kawaɗapeɗa Jeowa baita trajaɗayua kĩrajʉʉ ãrĩãdu. Biʼia ãrĩã nureabadau chi Jeowa ɗebena jaranũrẽrã ome. Jãuba Dachi Akõre kĩraka nureaɗayu kʉ̃risiabia ɓuu, chi Jeowa ɗebena jaranũrẽrã chi dachi Akõre kĩraka nureaɗa kʉ̃ria nuree. Jãarã ome reunibadauɗeeba ãrĩãdu unu kawaɗayua chi Jeowaɗebena (Hebreos 10:24, 25).

Jãuɗéburu, ¿ãrĩãdu berekaɗayue ara aɓa nii ẽbẽra unuɗayua? Ãrĩã berekabaraaɗai chi Dachi Akõre biʼia unuɗayua. Ẽbẽraba kʉ̃risia nuree poyaa adauwẽe bai ɓuu chi ãchia kʉ̃ria panuu. Jãri deportistarã jãarã ãrĩãdu trajabadau. Desportista Franciaɗebena Jean-Claude Killy abadau, mauba medalla neeɗe kanaɗabaɗa, ichia nebʉrʉbarii kãare aseyu dachia jãka kanayua: “10 años naeɗeeɗa kawa kʉ̃risiayu jãka kanayua ewariiruucha jãuɗebenadu kʉ̃risia koɓeeyua”. ¡Jãu trajo ãrĩã jãka aseyua mauɗe 10 minutosdu pirayua! Jãu kãyabãra trajaburuu Jeowa unui baita deabarii ne bia isa akabawẽebayu.

Ewariiruucha ara kaita Jeowa jʉ̃kaa nibayua

Wãʼãe bayua ẽbẽraba aɓa faltawẽebayu kʉ̃ria ɓuu ichi bida baita. Bichia senti ɓuubʉrã bichi kãare baita bibi ɓuu, mauɗe kuitaa kʉ̃ria ɓuubʉrã sakayua biʼiwãe ãrĩã unu ɓuu, unúse Jeowa Dachi Akõre Bibliaɗebena. Bichia ichiɗebena kawaburuubʉrã biʼia ãrĩã sentipeɗa maara akabaabayuɗebena.

Ewariiruucha kʉ̃riaɗayua waaburu kawaɗayua chi Jeowaɗebena. Baraa ẽbẽra yataɗeeɗabena ãrĩã bakuasiɗau Jeowa baita traja nureerã mau waaburu kawaɗa kʉ̃ria duanuurã. Dachia aude unu kʉ̃riaburuuɗe mauɗéburu ara ichi jʉ̃kaa ara kaita duanaɗa kʉ̃riaburuu duanuu. Asedu jari apóstol Pabloba jaraɗaa kĩra: “Dachi Akõre ãrea kuitaa nii mauɗe kʉ̃risia kuitaa nii. Ichiba waui kʉ̃risia ɓuu aɓa biɗa poyaa kuitaaɗaabai. Ichiba wau ɓuu siɗa poyaa kuitaaɗaabai. ¿Kaiba Dachi Mechiu kʉ̃risia kuitaa ɓuma? ¿Kaiba ichimaa kʉ̃risia jaradeaima?” (Romanos 11:33, 34 Biblia Chamí, WPS).

[Chi dore ɓʉ kuɓuu]

[Chi jara kuɓuu]

Chi ẽbẽrarãba waaburu wiɗi duaneesia: “¿Sakayua nama duanuu? ¿Mau sama wãuribudau? ¿Sakayua chokae nuree?”

[Chi jara kuɓuu]

“Mʉa kawasiiɗe Jeowa saka niiɗebena, mʉ ara ichi jʉ̃kaa sentibaɗe wãsii”

[Chi jara kuɓuu]

“Jeowa jʉ̃kaa nibaɗe wãburuu jãuburu biʼia ãrĩã sentibipeɗa. Ara jãu kĩrawẽe junebena. Jeowaɗebena unusiiba mʉ kĩrajʉʉ ãrĩã sentibi ɓeesii”