KAWAI BAITA 10
Jeowa kʉ̃riaɗeeba dachi bautizabiɗe wã panua
“¿Mʉ bautisai ɓuka?” (HECH. 8:36).
KANSION 37 Jeowa baita korasonɗeeba trajayua
NAU IƊI KAWAƊAYU a
1-2. Hechos 8:27-31, 35-38ɗe jara ɓuuchaa, ¿sakayua mukĩra Etiopía druaɗebenaba bautizabisaa?
¿BAUTIZA kʉ̃ria nii Jesús discípulo bayuẽ? Jeowa kʉ̃riapeɗa mauɗe ichimaa ara kiruma aburuuba bautizai baita odoe ɓua ãrĩã ẽbẽrarãmaa. Kawaba mukĩra aɓa nii trajaɗa baɗa chi reina Etiopiaɗebena baita.
2 Cha nii mukĩraba Bibliaɗebena kawasiiɗe bautizayu kʉ̃risiaɗa baɗa maka aseɗa basia (Hechos 8:27-31, 35-38 leas). ¿Sakayua? Ichi baita Dachi Akõre Beɗea leayu aude biʼia ãrĩã ɓoosia, ichi carroɗe wãmaa ɓoosiiɗe Bibliaɗe leamaa ɓoosii chi libro Isaiasɗe. Felipeba ichimaa jaradeasiiɗe Jesusba aseɗa baɗa ichi kakua, ichi kĩrajʉʉ ãrĩã ɓeesii. Kuitaa duanuu ichia Jeowa kʉ̃ria nii basia ichi chi templo Jerusalenɗebena neesiiɗeeba. Chi religión ichi bara nii baɗa akawa ida ɓuɗa basia, maabea ara chi puuru aɓa ɓuu biʼia trajabadau Jeowa baita nibaɗe wãsia. Ichia Jeowa kʉ̃ria niiɗeeba bautizapeɗa mauɗe Jesús kaaɗe nibaɗe wãsii (Mat. 28:19).
3. ¿Kãareba ẽbẽrarã bautizaɗai baita idaarabiwẽa? (Ochiachãu cuadro “ ¿Bichi corazón kãarechaa iujãa nibaka?”).
3 Jeowa kʉ̃riaɗeeba bichi bautizayua. Maka ɓumina, bichia bichi deɗabena mauɗe june ɓee Jeowaɗebena baraa niiwẽe ãrĩã kʉ̃ria niiɗeeba, kʉ̃risia ɓuu poyaa bautizaabai ɓuu, bichi bautizaburuubʉrã ãchia bichi naeɗe kʉ̃ria unibapeɗaaɗa kĩraka kʉ̃riaɗaabayua, jãka kʉ̃risiai ɓua (Mat. 10:37). Makawẽebʉrã Jeowamaa bustakauɗebena, bichia chi kachirua ɓuu asebarii, bʉʉmaa mau ida ɓui baita chaarea ãrĩã ɓuu (Sal. 97:10). Makawẽebʉrã bichi warra niiɗeeɗa fiestarã religión ariɗewẽe ɓuuɗe nibabarii baɗa, jãu ãrĩã bustabarii bẽrã bichia poyaa ida ɓuibai ɓuu jãarã fiestarã Jeowamaa bustakau (1 Cor. 10:20, 21). Jãuɗeeburu bichia kʉ̃risiai baraa kãíturu aude kʉ̃riayua.
¿BICHIA KAI AUDE KɄ̃RIA NIA?
4. ¿Kãareba dachi bautizaɗe oɗoeɓua?
4 Ãrĩã chi kosarã bichia kʉ̃ria nii, jãu aseyu biʼia ãrĩã ɓua. Bichi estudiai naeɗe Jeowaɗebenarã ome bichi baita chi Biblia importante ãrĩã ɓooɗa. Mauɗe bichia Jesús kʉ̃ria nii baɗa. Jãabera bichia Jeowaɗebenarã unu niiɗeeba ãchi baara niba kʉ̃ria ɓuu. Bariara bichia jãka kʉ̃risia ɓumina, jãuburu Jeowa baita traja kʉ̃riabiibai mauɗe bautizabiibai. Bichi bautizayua Dachi Akõre kʉ̃ria niiɗeeba. Bichia aude Dachi Akõredu kʉ̃riaburuubʉrã biʼia traja nibayua Jeowa baita junebenarãba ida trajabi kʉ̃riaɗawẽemina. Dachia Jeowa kʉ̃ria niiɗeeba bautizabudauɗe akawa ida ɓuɗaabayua ichi baita traja nibaɗe bayu.
5. ¿Iɗi kãare ʉ̃rʉbena beɗeabudaa?
5 Jesusba jara ɓoosii Dachi Akõre kʉ̃riabaraaɗai dachi joma corazonɗeeba, dachiɗebenaɗeeba mauɗe dachi kʉ̃risiaɗeeba (Mar. 12:30). ¿Bichia saka respetaɗai mauɗe ãrĩã kʉ̃ria ɓoi nibai baita Dachi Akõre Jeowa? Bichia naka asei ɓua Dachi Akõre chi kʉ̃ria ua niiɗebena kawa kʉ̃risia koɓeeruuɗe (1 Juan 4:19). Cha nau artículo jara ɓuuba aiɗaburuu mau asei baita. Kawayua bichia kãare maucha aseburuu Dachi Akõre aude kʉ̃ria niiɗeeba. b
6. Romanos 1:20 jara ɓuuɗe, ¿saka Jeowa ʉ̃rʉbena biʼia kawaɗai ɓua?
6 Kawaba Jeowaɗebena kʉ̃risiaruuba joma ichia waukaɗa baɗa ʉ̃rʉbena (Romanos 1:20 leas; Apoc. 4:11). Jeowaba kiɗuarã mauɗe animararã biʼia waukasii bẽrã mauba kawabi ɓuu ichi ãrĩã kuitaa nii. Aude kawaba dachi kakua saka niiɗebena (Sal. 139:14). Jeowaba wausii chi ʉmada mechia ɓuu maka ɓumina chi ɓee estrellarã aude mechia duanuu Ʉmada kãyabãra (Is. 40:26). c Bichia kawa kʉ̃risia ɓuubʉrã chi Jeowaba waukaɗa baɗa ʉ̃rʉbena kuitaayua Dachi Akõre meserãa ãrĩã nii, kuitaa ãrĩã nii mauɗe ichimaa ãrĩã respetayua. Maamina maucha asebaraaɗai, bichia ãrĩã Dachi Akõreɗebena kawa ɓuubʉrã aude ichi kʉ̃riayua.
7. Jeowa dachi corazonɗeeba kʉ̃ria nibayua, ¿kãare kuitaa nibaiba ichi ʉ̃rʉbena?
7 Ichia kuitaabaraai Jeowaba bichi ãrĩã kʉ̃ria ua nii. ¿Bichia ijãa ɓuẽ chi joma waukaɗa baɗaba ichimaa unu ɓuẽ, mauɗe ichia ãrĩã kʉ̃ria ɓuẽ bichi? Bichia jãu akawa ijãawẽebʉrã nauɗebena kapichia kʉ̃risiaba, Jeowaba “dachirã aɓaaɓarã jʉ̃kaabena kaitawẽe ɓuuwẽe” (Hech. 17:26-28). Davidba Salomonmaa naka jara ɓoosii: “Jeowaba joma chi corazona unu kuɓuu”. Dachi Akõreba jara ɓuu dachia jʉrʉ panuubʉrã ichimaa, ichia ũkuru aiɗaburuu unubudauɗaa (1 Crón. 28:9). Bibliaba jara ɓuu kĩra Jeremías 31:3ɗe, bichia Biblia kawamaa ɓuubʉrã Dachi Akõreba kʉ̃ria ɓuu bichi ome ara kaita nibai baita. Bichia maucha kawa ɓuubʉrã joma Jeowaba ase ɓoosiiɗebena bichi kakua, bichia corazonɗeeba maucha Dachi Akõre kʉ̃ria ua ɓoi.
8. Jeowaba bichi kʉ̃ria niiɗeeba, ¿bichia kãare asei ɓua ichi kakua?
8 Dachia ʉtaa wiɗibudauɗe Jeowaba unuburuu dachi kĩrajatua panabarii ichia dachi kʉ̃ria ua niiɗeeba. Bichia preocupa kuɓuuɗe ʉtaa wiɗiba, ara kiruma jaraba joma ichia bichi kakua ase ɓoosiiɗeeba, naka aseburuubʉrã bichia ãrĩã kʉ̃ria ua nii ɓoi Dachi Akõre. Dachia ʉtaa wiɗibudauɗe Dachi Akõreba panau ɓuubʉrã dachia ara kaita panaɗayua ichi ome (Sal. 116:1). Bichia akawa kawa ɓoi Dachi Akõreba kuitaa ɓuu bichi saka kʉ̃risia ɓuu. Bichia kawaburuuɗe Jeowaba saka kʉ̃risiabarii mauɗe ichia kãare kʉ̃ria ɓua bichiɗebena, makarã bichi Dachi Akõre ome kaita nibayua. Bichia naka ase ɓoi Bibliaɗebenadu kawaburuuɗe.
Dachia Biblia kawabudauɗe ara kaita nibaɗai Dachi Akõre ome mauɗe kawaɗayua ichia kãare kʉ̃ria ɓuu daiɗebena. (Párrafo 9 ochias). d
9. Chi Biblia barikiau librowẽe ɓuu bẽrã makarã, ¿kãare aseiba bichia jãu ome?
9 Kʉ̃risiaba chi Bibliaɗe Dachi Akõre Beɗea kuɓuu, barikia ɓee libro kĩrawẽe ɓua. Bibliaburu ariɗe jara ɓuu Jeowaɗebena mauɗe ichia kãare kʉ̃ria ɓuu bichi baita. ¿Saka kawabi ɓuu bichia chi Biblia barikia ɓee libro kĩrawẽe ɓuu? Noremaacha leapeɗa, preparapeɗa bichi deemaa kawabiaɗe wãɗai naeɗe mauɗe aseba joma chi kawa kãrii Bibliaɗebena (Sal. 119:97, 99; Juan 17:17). ¿Bichia kuitaa ɓuẽ kãare horaɗe leayu chi Biblia mauɗe naka asebaraa?
10. ¿Bibliaɗe eɗaburu kãare ɓʉ kuɓua?
10 Ãrĩã chi historia eɗa ɓʉ koɓee Bibliaɗe ɓʉpeɗaaɗa basii chi ẽbẽrarã Jesús ãchi dauba unupeɗaaɗarãba. Chi Bibliaburu biʼia jara ɓua ichia aseɗa baɗa bichi kakua. Bichia kawaburuuɗe joma Jesusba aseɗa baɗa mauɗe jaraɗa baɗa, makarã bichia ichi amiko nibai kʉ̃riayua.
11. ¿Bichia kãare aseiba Jeowa aude kʉ̃riai baita?
11 Jesús kʉ̃ria nibayua. Naka aseburuuba Jeowa aude kʉ̃ria nibayua, Jesusba unubi nii bẽrã ara chi Jeowa kĩra nii (Juan 14:9). Jãuɗeeba, bichia Jesusɗe aude kawaburuuɗe aude kawayua saka nii Jeowa mauɗe audeburu kʉ̃riayua. Kʉ̃risiaba Jesusba saka chuburiakuaɗa baɗa ẽbẽrarã junebenarã baitara importantewẽe ɓosmina, chi nejarrawẽe kirureerã, ẽpermo keɗee mauɗe chaareawẽa nureerã baita biɗa. Mauɗe kʉ̃risiaba chi consejorã biʼia ãrĩã beɗea nii bichimaa mauɗe bichia ũriburuuɗe aude kĩrajʉʉ nibabarii (Mat. 5:1-11; 7:24-27).
12. Jesús ʉ̃rʉbena kawaaruuɗe, ¿kãare bichimaa asebi ɓua?
12 Bichia kʉ̃risiaruuɗe Jesusba aseɗa baɗa ichi kakua deasii bichi pekaoɗeeba, jãuɗe kʉ̃risiaburuuba bichia Jesús aude kʉ̃riayua (Mat. 20:28). Bichia biʼia kawaburuuɗe Jesús bichi kakua biu kʉ̃riasii, makarã bichia ida ɓui kʉ̃riayua chi kachirua ɓuu mauɗe wiɗiyua Jeowamaa perdonabiyua (Hech. 3:19, 20; 1 Juan 1:9). Bichia kʉ̃riaburuuɗe aude Jeowa mauɗe Jesús bichia aude niba kʉ̃riayua chi ẽbẽrarã bichi kĩraka kʉ̃risia nureerã baara.
13. ¿Jeowaba bichimaa kãare deabarima?
13 Kʉ̃riaba Jeowa baarabenarã siɗa. Bichi deɗabenarã Jeowa baara nureewẽebʉrã mauɗe bichi amikorã naeɗe uniɗa baɗa siɗa kawaɗaabayua sakaẽra bichi du aɓaburu traja kʉ̃ria nii Jeowa baita, mauɗeburu bichi jãka nibai kʉ̃riaɗakaa. Jãuɗeburu Jeowaba aiɗayua congregacionɗebenarãɗeeba, ãchi bichi deɗabena kĩra nureerã. Bichi jãarã baara ara kaita niiɗebenabʉrã, mauɗeeba bichi ãrĩã kʉ̃riaɗayua mauɗe aiɗaɗayua bichia nesitaburuuɗe (Mar. 10:29, 30; Heb. 10:24, 25). Saka wãiba bichi deɗabenarã siɗa kʉ̃riaɗai ɓuu Jeowa baita trajaɗayua mauɗe joma ũri nibaɗe wãpeɗa aseyua Jeowaba busta nii (1 Ped. 2:12).
14. 1 Juan 5:3ɗe jara ɓuuchaa, ¿bichia kãare ʉ̃rʉbena kuitaasaa chi Jeowa ley ʉ̃rʉbena?
14 Ũri nibaba chi ley Dachi Akõre dea kuɓuu maabae kʉ̃riaba, jãu importante ãrĩã ɓua. Jeowa unui naeɗe bichia kʉ̃risia nii baɗa jã́turu biʼia ɓuu kĩraka, jãabaera bichia kuitaa ɓuu chi ley Jeowaɗe jã́turu biʼia ãrĩã ɓuu junebena ley kãyabãra (Sal. 1:1-3; 1 Juan 5:3 leas). Kʉ̃risiaba Jeowaba chi consejorã joma dea nii chi kima baita, chi wẽra baita, chi akõrerã mauɗe chi warrarã baita biɗa (Efes. 5:22-6:4). ¿Bichia ũriburuuɗe chi consejorã Dachi Akõre dea nii, bichi deɗabenarã biʼia nureerãbaaka? ¿Bichia amikorã kachirua nuree ɓuiɗakare, bichi ẽbẽra bia niika? ¿Bichi aude kĩrajʉʉ niika? (Prov. 13:20; 1 Cor. 15:33). ¡Maka ɓuma!
15. ¿Kãare asei ɓua bichia chi Bibliaɗe jara ɓuu aseyua?
15 Bichia chi Bibliaɗe eɗa jara kuɓuuɗebena saka aseyu aduabʉrã, Jeowaba ichi organizacionɗeeba kartarã ãrĩã́turu ɓʉbarii kawabii baita kãare biʼia ɓuu mauɗe kãare kachirua ɓuuɗebena (Heb. 5:13, 14). Bichia mau leaburuuɗe kawayua bichi baita ãrĩã serviyu, mauɗeeburu bichi organización Jeowaɗe niba kʉ̃riayua.
16. ¿Jeowaba ichi puuru saka organiza ua ɓua?
16 Kʉ̃riapeɗa aiɗa nibayua chi organización Dachi Akõreɗe. Jeowaba organizabaria ichi puururã chi congregacionrãɗe mauɗe Jesústuru chibari jomaurã congregacionɗebena (Efes. 1:22; 5:23). Jesusba jʉrʉ adauɗa baɗa chi nureerã ẽbẽrarã bichi baara gobernaɗai baita bajãaɗe mauɗe jarakuaɗa baɗa iɗibae trajo aseɗai baita. Naarã cristianorã, Jesusba trʉ̃akuaɗa baɗa “esclavo jipa nibapeɗa biʼia kʉ̃risia ɓuu”, ãchirãba biʼia trajaɗapeɗa, bichi cuidaɗapeɗa mauɗe deabadau joma bichia nesita kuɓuuɗebena bichi fe chaarea nibai baita (Mat. 24:45-47). Ãchia bia jʉrʉbadau chi mukĩrarã congregacionɗe machi cuidaɗai baita (Is. 32:1, 2; Heb. 13:17; 1 Ped. 5:2, 3). Naarã mukĩrarã, chi dawaraurã congregacionɗebenarã, ãchi corazonɗeeba aiɗa kʉ̃ria nuree bichi nomaa kuɓuuɗe, ãchia chuburiaɗapeɗa aiɗaɗayua bichi biʼia sentibii baita mauɗe ãchia aiɗaɗayu bichi ewariruucha Jeowa kaita nibabiyua. June maucha, ãchia bichimaa kawabiɗayua saka junebena ẽbẽra ome beɗeayua Jeowa ʉ̃rʉbena (Efes. 4:11-13).
17. Romanos 10:10, 13, 14 jara ɓuuɗe, ¿sakayua Jeowa ʉ̃rʉbena beɗeabadaa ẽbẽrarã ome?
17 Aiɗaba junebena ẽbẽrarã Jeowa kʉ̃riaɗai baita. Jesusba ichi kaaɗe ãda nureerãmaa jaraɗa baɗa junebenarã kawabiɗai baita Dachi Akõre ʉ̃rʉbena (Mat. 28:19, 20). Jãu aseɗai ɓua obligacionɗeeba, maamina, bichia ewariruucha aude Jeowa kʉ̃ria niibʉrã kʉ̃risiayua Pedro Juan ome kʉ̃risia nibapeɗaaɗa kĩraka, ãchia naka jarasiɗau: “Chi daiba unupeɗaaɗa mauɗe ũripeɗaaɗa jaraɗai poyaa ida ɓuɗaabai” (Hech. 4:20). Daiba ẽbẽramaa jarabudauɗe Jeowaɗebena, jãuba dai kĩrajʉʉ ãrĩã nibabibaria. Felipe ãrĩã kĩrajatua koɓeesii ichia aiɗa ɓoosiiɗeeba mukĩra Etiopiaɗebena Biblia ʉ̃rʉbena kawai baita mauɗe ichi bautizabiasiiɗe. Bichia Felipe kĩra jaradeaɗe wãburuuɗe, unubiburuu Jeowaɗebena jara nii kʉ̃ria nibai baita (Romanos 10:10, 13, 14 leas). Makarã, bichia wiɗiburuu cha nii mukĩra Etiopiaɗebenaba wiɗi ɓoosii kĩraka: “¿Bʉ bautisai ɓuka?” (Hech. 8:36).
18. ¿Warebena semanaɗaa kãare ʉ̃rʉbena berreabudaa?
18 Bichia kʉ̃risiaburuuɗe bautizai baita, jãu aude biʼia ɓuu bichi baita. Bautizai naeɗe bichia biʼia kʉ̃risiabaraai. Makarã, ¿bichia kãare kuitaabaraaiba bautismo ʉ̃rʉbena? ¿Bichia kãare aseiba bautizai naeɗe mauɗe bautizaɗakare? Nauba kawaɗayua chi artículo neeburuuɗe.
KANSION 2 Jeowabʉ bichi trʉ̃
a Ẽbẽra ãrĩãba Jeowa kʉ̃ria nuremina adua bautizaɗayuɗebena, maabea Jeowa ɗebena Jaranũrẽrã bayua. Bichi jãka kʉ̃risia niibʉrã nau articuloba ãrĩã aiɗayua jãka aseyu baita.
b Dachi aɓaaɓaa kʉ̃risiaɗayua kãare consejo cha nau artículo jara kuɓuuɗebena naa aseburuu mauɗe jãwãre sãuba aseɗayua.
c Maucha kawaɗayua chi waukaɗa baɗa ʉ̃rʉbena naarã kartarãɗe ¿Es la vida obra de un Creador? mauɗe El origen de la vida. Cinco cuestiones dignas de análisis.
d KÃARE UNU ƁUA FOTOƊE: Dai nawekauba nedoɗe wã ɓoosiiɗe karta cheke dea ɓoosii awẽra niimaa.
