Kãare aseiba itua ãrĩã do nibaabayua

TONYBA, “mʉ ãrĩã do nibabarii” aɗa basirã, ichi baita diwara ɓooi basii. Maka ɓumina, ichi ãrĩã doi ɓoosii itua biuruuwẽe, ichia kʉ̃risiasii jãka doyu ariɗe ɓuu. ¿Sakãera maka ãi kʉ̃risia koɓeesaa?

Chi ituaba biʼia kʉ̃risiabiibasiiba. Ichia kawawẽe basmina, ichi boro biʼiawẽe koɓeeɗa baɗa mauɗeeba ichi kʉ̃risia mauɗe ichi kakua siɗa biʼiwẽe kuɓuu, jãabera sentiwẽa koɓeesia. Aude do koɓeeburuuba, kʉ̃risia kachiruaburu koɓeeɗa basia.

Jãka pasa ɓoosii mauchaburu do kʉ̃ria koɓeesiiba. Alberto siɗa ara jãka pasa koɓeeɗa. Ichia naeɗe, jaraɗa baɗa doyu nesitawẽe. Ichia naka jara ɓoosii: “Mʉ mera do ɓeebachii, mauɗe ãrĩã do koɓeeburuuɗe, ara ɓuu maebʉrã akawa miadaa pasaabai ɓuu abachii, mʉa kʉ̃ria ɓoosii mauchaburu do koɓeeyudu”. Junebenaba jarabudauɗe jãka biʼiwãe ɓuu aaruuɗe, Tony Alberto omeeba jarabachiɗau ãchi itua ãrĩãrã dowẽa panuu. Maka ɓumina, biawãrabena chi ituaba ãchi controla ua ɓoosii. ¿Kãare aseɗai ɓua ãchi kĩraka itua ãrĩã do nureerã?

Itua ɓui baita apii ɓeerã́ba

Ãrĩãrã chi itua do nibabarii baɗa ɓuipeɗaaɗarãba ara jari Jesusba jaraɗa kĩraka asebadaa: “Mauɗeeba, bichi dau biarebenaba bichi ɓaebii kʉ̃ria ɓuubʉrã, ẽetapeɗa kaitawẽe jirataba. Jãuɗéburu bichi kakuaɗebena aɓa ɓuuba ɓaebii kʉ̃ria ɓuubʉrã, jiratayua Gehenaɗaa wãi baɗa kãyabãra joma” (Mateo 5:​29).

Jesusba nama jaraɗa baɗa ejemplo baara. Ichia jaradea kʉ̃ria ɓoosii miadaa ɓee ida ɓuyu Jeowa jʉ̃kaa nibayua. Jãu chi pua ɓooi ɓuu kĩrabara dachi kakuaɗebena ẽetaburuu kĩraka, maka ɓumina mauba kʉ̃risiabi ɓuu itua ãrĩã dowẽa nibaɗayua. Chi niiba bichimaa “bichi ãrĩã do ɓua” jaraɗabʉrã, makarã ɓiɗĩikaburu do nibayua. a Bichia unuuruuɗe ɓiɗĩika dosirã maabea apii do koɓeeruubʉrã, makarã akawa ida ɓuba. Chaarea ɓumina, jãu ɓuiruuwẽerã bichi aude miadaa nibaɗe wãburuu.

¿Kãare asei ɓua bichi ãrĩã itua do ɓuubʉrã ãrĩã do nibaamaaba?

Kãareba aiɗai ɓua

1. Kapichia ʉtaa wiɗi nibayua. Chi Jeowaɗe ijãaɗapeɗa ichi kĩrajʉʉbii kʉ̃ria nureerãmaa, Bibliaba naka jara ɓua: “Ʉtaa ãrĩã iɗipeɗa barikiau kakua, ara kiruma aɗapeɗa, mauɗe joma Dachi Akõremaa jarásturu chi dachia nesitabadau, Dachi Akõreba biʼia ãrĩã kĩrukaraayuwẽa nureabiyua, jari ẽbẽra jomaurã nau iujãaɗebenarãba kawaɗawẽa duanuu, machi sõ mauɗe machi kʉ̃risia biʼia aka ɓeebiyua Cristo Jesusɗeeba” (Filipenses 4:​6, 7). Maka ɓumina, ¿bichia ʉtaa wiɗiiruuɗe Dachi Akõremaa kãare jarayua ichia bichi biʼia sentibiyua?

Naa bichiaburu kawayua bichi itua ãrĩã do nibabarii mauɗe jãu ida ɓui baita bichiaburu asei ɓuu. Bichia Dachi Akõremaa jaraburuubʉrã kãare asei ɓuu, ichia aiɗayua itua ɓui baita maabea aude ne kachirua pasabiimaaba. Bibliaba jara ɓuu Proverbios 28:13ɗe: “Chi pekao asepeɗa mera ɓuubʉrã biʼia wãabayua, bari chi pekao aseɗa baɗa jarapeɗa ida ɓuiruubʉrã ichi perdonayua”. Jesusba jaraɗa baɗa nakaburu wiɗiɗayu Dachi Akõremaa: “Dai miadaa ɓuuɗe ɓaebirã́ba, mauɗe chi jʉbawẽe niiɗebena karibaba” (Mateo 6:​13; nota). ¿Saka unubi ɓua bichia biawãrabena bichi corazonɗeeba ʉtaa wiɗi ɓuu? ¿Mauɗe Dachi Akõreba saka aiɗayua?

2. Chaarea nibaba Biblia leaburuuba. Kawaba “Dachi Akõre beɗea chokae ɓuu mauɗe poder ãrĩã ira ɓuu, [...] mauɗe unubiyua chi kʉ̃risiaɗebena mauɗe ichi corazonɗe eɗa inii siɗa” (Hebreos 4:​12). Chi Bibliaɗe eɗa ɓʉ koɓee noremaacha lea nibapeɗa maabae jãuɗebena kʉ̃risiaburuuba aiɗa ɓua itua ida ɓuyua chi ãrĩã do nureapeɗaaɗa baɗa. Chi Salmo ɓʉɗa baɗaba biʼia jaraɗa kĩra: “Kĩrajʉʉ nia chi sõ kachiruarã consejoɗe ãda niiwẽa, [...] bari Jeowa ley bustabarii; ewariiruuɗe mauɗe ẽsebuɗe ley leapeɗa jãuɗe kʉ̃risiabarii”. Mau kaaɗe naka jara ɓuu: “Joma ichia aseburuu biʼia wãyua” (Salmo 1:​1-3).

Alberto itua ãrĩã do nibabarii baɗa ida ɓusia Bibliaɗebena kawaburuuba Jeowa ɗebena Jaranũrẽrã baara. Ichia naka jara ɓuu: “Mʉa biʼia kuitaa ɓua, Bibliaɗebena kawawẽe basirã, do nibabarii baɗa ida ɓuibai basia, mauɗe mʉ biui basia”.

3. Ara bichi du aɓa controla kawaba. Bibliaba jara ɓuu cristiano baɗai naeɗe itua ãrĩã do nureabachiɗau, maka ɓumina “chi Jauri Dachi Akõreɗeeba jeraasiɗaa” (1 Corintios 6:​9-​11). ¿Jãu saka pasaɗaba? Dachi Akõre Jauriɗeeba controla kawapeɗaaɗa itua ãrĩã do nureaɗaamaaba mauɗe wãɗaamaaba fiesta itua ãrĩã dobadauɗaa. Jãuɗeeba Dachi Akõre Beɗeaba jara ɓuu: “Ituaba biu nibarã́sturu, [...] biu nibaɗai audeara Dachi Akõre Jauriɗeeba nureásturu” (Efesios 5:​18, Biblia Chamí, WPS.; Gálatas 5:​21-​23). Jesusba naka jaraɗa baɗa: “¿Machi Akõre bajãaɗe ɓuuba chi ʉtaa iɗi panuumaa ichi Jauri deabai ɓuka?”. Mauɗeeba naka jarasii: “Ara mau kĩra Dachi Akõremaa ʉtaa iɗi panásturu; maabae ichiba machimaa deai” (Lucas 11:​9, 13, Biblia Chamí, WPS.).

Chi Dachi Akõre kĩrajʉʉbii kʉ̃ria nureerã ãchi du aɓa controla kawaɗayua. Mauɗeeba chi Biblia kapichia leaɗayu mauɗe ãrĩã wiɗiɗapeɗa corazonɗeeba. Dachi nomaa sentibudaubʉrã, kʉ̃risiaɗayua cha nau Jeowaba jara ɓuuɗe: “Maamina Dachi Akõre Jauriba kʉ̃ria ɓuu aɓauba wau ɓuubʉrã, Dachi Akõreba mau ẽbẽra ewaricha ichi ome chokae ɓui. Mauɗeeba kakua ãkaaɗawẽa ne biꞌia wau panásturu. Kakua ãkaaɗawẽa panuubʉrã, Dachi Akõreba ɓuɗa ewariɗe dachiba biꞌia adauɗai” (Gálatas 6:​8, 9, Biblia Chamí, WPS.).

4. Kuitaa kʉ̃risiaba kai ome meraabarii. Proverbios 13:20ba jara ɓuu: “Chi biʼia kʉ̃risiabudau baare ãda ɓuubʉrã, makarã mau siɗa biʼia kʉ̃risia keraai, maka ɓumina biʼia kʉ̃risiaɗakaurã baare koɓeesirã biʼiawẽe wãi”. Jaraba bichi amikorãmaa bichia kʉ̃risiaɗa baɗa ɓiɗĩika itua doyua. Chi nuree ẽbẽrarãba atua jaraɗai ɓuu maebʉrã “itua apii dose” aɗai ɓuu. Chi Bibliaba jaraɗa baɗa ãrĩãrãba “kuitaa kʉ̃risiaɗakau” maabea “kachirua berreabadau” chi nuree naa itua do nureapeɗaaɗa baɗa jãabaera “waabenarã baara itua ãrĩã” dowẽa paneesiɗauɗeeba (1 Pedro 4:​3, 4). Maka pasa ɓuubʉrã, chi maarã ẽbẽrarã ome jãabera meraawẽa koɓeeyua.

5. Bichi mistu kʉ̃risiaba sãabe itua dooruu. “Maabea nau iujãaɗebena kĩra nurearã́baɗa; bari, machi kʉ̃risiadu ãyaa asebiɗai machiɗeeba kawaɗayua, machi du aɓa kuitaaɗayua sãu biʼia ɓuu mauɗe chi busta ɓuu mauɗe chi jipa ɓuu Dachi Akõreba ase kʉ̃ria ɓuu” (Romanos 12:​2). ¿Bichia Jeowa kĩrajatua nibabii kʉ̃ria ɓuẽ? Ara jari Bibliaba jara ɓuu kĩraka kʉ̃risiaba, chi ẽbẽrarã nau iujãaɗebenarãba kʉ̃risiabadau kĩrakawãe. ¿Bichia saka kawaiba sãabe itua doi ɓuu?

Nauɗe kʉ̃risiaba: Bichi ãrĩã itua do ɓoosiibʉrã, kʉ̃ris kauwẽa koɓeeruubʉrã, mau dauchia, i chi chikʉa ɓuuka beɗea ɓuubʉrã, mauɗe poyaa jãadua aka noɓeewẽebʉrã, makarã jãuɗe bichi itua ãrĩã dosii. Maka nibaamaaba bichi itua doi naeɗe naa biʼia kʉ̃risiase sãabe itua doi ɓuu. Bichi du aɓa engañarã́ba biʼia kuitaa nibaba sãabe do kãrii. Boroɗe adauba nau: Aude biʼia ɓuu kʉ̃risia kuitaa nibayua apii itua do nibaamaaba, kʉ̃risiawẽa nibai kãyabãra.

6. “Doobai ɓuu” jarayu kawaba “Machiba ne wauɗai aaduubʉrã, wáusturu. Mauɗe wauɗaabai aaduubʉrã, waurã́sturu” (Mateo 5:​37, Biblia Chamí, WPS.). Chi niiba jaraburuuɗe itua doɗa aaruuɗe, mauba bichimaa miadaa asebii kʉ̃riawẽe siɗa, kawaba jarayua mʉ itua doobai ɓuu ayua. Maka ɓumina biʼiaburu kĩruwẽa jarayu ara jari Colosenses 4:6ɗe jara ɓuu kĩra: “Bichi kĩrawãrea beɗeaba, kĩrabara tãa chikoɗe baripeɗaaɗa kĩra, machia kuitaaɗayua saka panaui waabenarã aɓaaɓaa”.

7. Jʉrʉse kaiba aiɗai ɓuu bichi. Jʉrʉse amikorã biʼia nureerã, ãchia bichi Jeowa jʉ̃kaa nibabii baita aiɗa nuree, maabea bichia itua ɓuiyu kʉ̃risiaɗa baɗa respeta nuree. Chi Bibliaba naka jara ɓuu: “Biʼia ɓua ome ɓooyu, akawa du aɓa ɓooi kãyabãra, chaarea trajabudauɗe, biʼia wãuribudauɗeeba. Ãchi omeɗebena aɓa jeeɗa ɓaeburuubʉrã, aɓauba ʉtʉ jiradrubii ɓuu” (Eclesiastés 4:9, 10; Santiago 5:​14, 16). Chi Instituto Nacional sobre el Abuso del Alcohol y el Alcoholismo, Estados Unidosɗebenaba, naka jara ɓuu: “Bichi baita itua doyu ãrĩã chaarea ɓuu ida ɓui baita, bichi deɗabenarã amikorãmaa wiɗiba ãchia bichi aiɗaɗayua”.

8. Chi bichia asei kʉ̃risiaɗa baɗa aseba. “Dachi Akõre beɗea jara ɓuu kĩra wau panásturu. Aɓaburu ũriiduu panarã́sturu. Maka nureebʉrã, ara machi du aɓa setaa kũrua nureaɗai”. “Maamina barikiuba Dachi Akõre beɗea ũriɗa kĩraba ɓuai ida ɓuwẽebʉrã, ãrĩã biʼia ɓuai. Ẽbẽraba mau beɗea jipa ɓuu dachi kariba ɓuu ewaricha biʼia kʉ̃risiapeɗa wau ɓuubʉrã, ichiba maka wau ɓuuɗeeba ãrĩã biʼia ɓuai” (Santiago 1:22, 25, Biblia Chamí, WPS.).

Bichia itua ãrĩã doyu ida ɓui baita naka asei ɓuu

Ẽbẽrarã ãrĩãrã itua dobadamina itua biu paneeɗakau. Maka ɓumina, chi nii itua ãrĩã do nibabariibʉrã maebʉrã ara kapichia do niibʉrã, maabera ichi kakuaba itua wiɗi ɓeei ɓuu, dowẽebʉrã kĩrukaraa koɓeei ɓua, jãabera envicia ɓuuɗeeba. Jãka niibʉrã, itua do nibabarii ida ɓui kʉ̃ria ɓumina mauɗe Dachi Akõre jʉ̃kaa nimina, doctormaa wãi nesta ɓuu. Albertoba naka jara ɓuu: “Mʉa chi itua doyu ida ɓui baita berekasiiɗe, mʉ kakua ãrĩã chi puʼua ɓoosii, itua dowẽa koɓeeɗaɗeeba. Ara mauɗe kuitaa ɓoosii Dachi Akõreba mʉ aiɗa nimina, doctormaa biɗa wãi nesita ɓoosia”.

Itua ãrĩã dobadaurãba ara jãka kʉ̃risia paneebadaa. b Ãchi kʉ̃ris kauwẽa diɗiimaaba mauɗe Dachi Akõre kĩrajʉʉbiɗayua, chi nuree hospitalɗaa odoepeɗaaɗa baɗa ãchia itua ida ɓusiɗauɗe ẽpermaɗapeɗa kĩrukaraa kopaneepeɗaaɗa mauɗe ʉrrmiɗiaɗeeba controlaɗayua ãchia itua doi ãrĩã kʉ̃ria panaɗa. Bariara Dachi Akõre Warrba ãrĩã poder ira ɓosmina milagro asei baita ichia jaraɗaa: “Chi ẽpermowãe nureeba ʉrrmiɗia deabarii jʉrʉɗakau. Maumaarã chi ẽpermo nuréburu jʉrʉbadau” (Marcos 2:​17, Biblia Chamí, WPS.).

Ara ɓuma chi Dachi Akõreba jaraaruu ũriyu

Chi consejo biarã Bibliaɗe eɗa jara kuɓuu Dachi Akõre ariɗe ɓuuɗebena neebarii. Dachi Akõreba kʉ̃ria ɓuu dachi kĩrajatua nureaɗai baita, ara nau momentoɗe mauɗe neeburuuɗe biɗa. Albertoba chi itua ida ɓui ɓoosii 24 años basiiɗe, ichia jãu kʉ̃risia ɓoosiiɗe kĩrajatua koɓeebaria, bera jẽa koɓeepeɗa, naka nebʉrʉsii: “Kĩrajatua koɓeesii kawa ɓoosiiɗe mʉ jipa nibai ɓuu, Jeowaba aiɗai kʉ̃ria ɓuu mʉ mauɗe Jeowaba kuitaa ɓuu mʉ saka senti nii, ichia mʉ ochia ua nia mauɗe aiɗabarii ãrĩã mʉa nesitaburuuɗe. Mʉa ara kiruma abarii Jeowamaa ichia mʉ aiɗa niiɗeeba”.

Bichi itua ãrĩã do nibabariibʉrã, maebʉrã jãu doidu nesitabariibʉrã, ara maka bereka nibaba ida ɓui baita. Albertoba itua ɓuisii kĩraka ẽbẽrarã ãrĩã maka asepeɗaaɗa, bichia biɗa maka asei ɓua. Ãchia sakayua itua ɓuisii aɗakaa mauɗe bichia biɗa maka kʉ̃risiai ɓuu.

Bichia ɓiɗĩika itua doi kʉ̃risia ɓuubʉrã maebʉrã itua akawa doobai kʉ̃risia ɓuubʉrã, cha nau beɗea Jeowaɗebena boroɗe adauba: “¡Bichia ũriɗa basirã joma mʉa jara kuɓuu! Makarã, bichia biʼia ãrĩã kʉ̃risiai ɓuu do kĩraka, mauɗe bichia chi jipa ɓuu aseyua, do choroma dodomia kiruu kĩra” (Isaías 48:18).

[Notas]

[Recuadro]

 ¿Mʉ ãrĩã́turu do kuɓubaaka?

Ara bichi du aɓa wiɗipeɗa nauɗe kʉ̃risias:

• ¿Itua ãrĩã do kuɓubaaka naeɗebena aude?

• ¿Mʉ itua kapichia ãrĩã do koɓesbaaka?

• ¿Audeburu do koɓeebarẽe chi soʼoa ãrĩã ɓéturu?

• ¿Mʉ problema bara kuɓuuɗe maebʉrã mʉ chi kawayuwãe kuɓuuɗe do koɓeebaribaaka jãuɗe kʉ̃risiamaaba?

• ¿Chi niiba maebʉrã deɗabena niiba jarabadaẽ mʉ ãrĩã́turu do kuɓuu?

• ¿Mʉ itua do kuɓuuba deeɗa problema asebaraka maebʉrã ãi niiɗe makawẽebʉrã trajoɗe?

• ¿Semana aɓa ɓooi ɓubaaka itua dowẽa nii?

• ¿Mʉ kĩruyuẽ junebena doɗawẽebʉrã?

• ¿Mʉa jarakaẽ junebenamaa sãabe dobarii?

Bichia “makabʉ” aaruubʉrã aɓa cha wiɗi kuɓuuɗebena, ida kuɓui baraa bichi do kuɓuuɗebena.

[Recuadro]

Arrepentiimaaba

itua doi naeɗe, nauɗe kʉ̃risiaba:

• ¿Biʼia ɓubaaka doyu o maebʉrã dowẽebayu?

Consejo: Apii itua dowẽa koɓeei poyaawẽebʉrã, dorã́ba.

• ¿Sãabe doiba mʉ?

Consejo: Kʉ̃risiaba samauɗaa doi ɓuu itua biu koɓeei naeɗe.

• ¿Sakaeɗe doiba?

Consejo: Dowẽebayua carro maneja koɓeei naeɗe, maebʉrã moto manejai naeɗe, maebʉrã trajo aseburuuɗe biʼia kawa ochia koɓooi; doobayua reunión Dachi Akõreɗebenaɗaa wãi naeɗe; mauɗe ɓi baraa nuɓuuɗe biɗa, maebʉrã ʉrrmiɗia domaa ɓuuɗe biɗa.

• ¿Mʉ sama doi ɓua?

Consejo: Dorã́ba doi baita kachirua ɓuumare; ni miru wãrã́ba doyua, dorã́ba ẽbẽra itua doyu kachirua ɓuu abadau kĩrapeta.

• ¿Mʉ kairã baara doi ɓua?

Consejo: Amikorã maebʉrã deɗabena biʼia nureerã ome; mauɗe ãrĩã dobadaurã baara biɗa doobayu.

[Recuadro]

Mukĩra aɓa nii chi dobarii baɗa ida kuɓuɗaa

Mukĩra chi trʉ̃ Supot, Tailandiaɗe vivi nii, itua ãrĩã dobarii nibaɗa. Naeɗera dobachii ẽsebuɗeburu, mau baɗa ɓiɗĩ ɓiɗĩa dapeɗeeɗa maebʉrã ãsa baaruuɗe do koɓeeɗa baɗa. Dobachii itua biuyuaburu. Maka kuɓuuɗe, Jeowa ɗebena Jaranũrẽrã ome Biblia estudia koɓeeɗa baɗa. Mama kawasii Dachi Akõreba itua ãrĩã dobadau bustakau. Maabae ida kuɓuɗa itua dobarii baɗa. Mau ara ɓiɗĩikaburu, waya ichi ara chi do nibaɗa kĩra koɓeesii. Ichi deɗabenarãba unusiɗauɗe nomaasiɗau.

Ichia Jeowa kʉ̃ria koɓeeɗa basia, ichia jaraburuu ase kʉ̃ria koɓeeɗaa. Ichi amikorã cristianorãba mauchaburu aiɗa kopaneeɗa, jarapeɗaaɗa chi deɗabenamaa kʉ̃risiarã́baɗa ichi poyaawẽebai ɓuu aɗaabayua mauɗe ichi du aɓa ɓuiɗawẽa, ãbua ichi baara panaɗayu. Mauɗe ichia leasiiɗe 1 Corintios 6:​10, mauɗe jara ɓuu chi itua ãrĩã dobadau Dachi Akõre Kobiernoɗe duanaɗaabai ɓuu. Ichia kawasii itua do nibayu kachirua ãrĩã ɓuu mauɗe kawasii jãu ida ɓuyu kuɓuu.

Maabae kʉ̃risiasii akawa ida ɓuyu chi itua. Chi Dachi Akõre Jauri poder ãrĩã ɓuuɗeeba, ichi Beɗeaɗeeba mauɗe ichi deɗabena maaɗaba congregacionɗebenaba aiɗasiɗau, chaarea koɓeeyua itua ida ɓui baita. Ichi deɗabena ãrĩã kĩrajʉʉsiɗau unusiɗauɗe bautizaburuu. Iɗibea Supot Dachi Akõre amiko nii, ichia jã́turu kʉ̃riaɗa bẽrã mauɗe junebenarãmaa biɗa ichiɗebena kawabia kuɓua.