Ãchi nibapeɗaaɗabaɗa kambiasia Bibliaɗeeba

¿SAKAYUA wẽra 60 años aude niiba ida ɓuiɗama imagenmaa wiɗi nibayu? ¿Sakayua sacerdote sintoísta niiba ida ɓuiɗama chi santuario mauɗe ichi ministro cristiano bawãsiiɗebena? ¿Kãare asesaa chi wẽra ichi du aɓa nii sentiimaaba ichi nacesiiɗe junebenamaa deapeɗaaɗa kakua? Ida ãchimaa panaubiɗaika.

“Mʉa ida ɓuisii chi mʉa imagenmaa ʉtaa wiɗi ɓooɗa baɗa” (ABA DANSOU)

AÑO NASEƊAƊEBENA: 1938

SAMABENA: BENÍN

ICHI Ʉ̃RɄBENA MAUCHA JARA ƁUU: IMAGENMAA ɄTAA WIƊI ƁOOƊA BAƊA

MɄ BIBLIA ESTUDIAI NAEƊE SAKA NIBASAA: Mʉ So-Tchahoué puuruɗe wariɗa baɗaa, senea kaita kuɓuu ioroba ãrĩã kuɓuumare. Carretera wãʼãe bẽrã, ẽbẽrarã ãchi wãuribudauɗe barco maebʉrã jãbaɗe wãuribudau. Ɓeda ʉa nuree mauɗe paka kiriaɗapeɗa cabrarã baara, oejarã, sina mauɗe eterrna, mauɗe chi de waubadau bakuruba mauɗe kiɗuaba makawẽebʉrã adobe kaɗaba. Bariara jomaurã poore ãrĩã nuremina, puururãɗe ãrĩã orroaɗapeɗa kenabadaa puuru choroma kĩraka ɓuuwẽma.

Mʉ chuburi nibasiiɗe, dai akõreba bʉekaɗa baɗa mʉ nawekau baara conventoɗaa, aria kawabisiɗau imagena religionɗebena, mauɗeeba mʉa wiɗi koɓeesii Dudua abadaumaa, mau junebena trʉ̃ dios baita Oduduwa chi puuru yorubaɗebena. Mʉa wausii de ɓiɗĩika santorãɗebena mauɗeeba araa odoesia barikia ɓee ara kapichia: aceite palmaɗe, ñame, koororã, eterrna, palomarã mauɗe junebena ãnimara siɗa, mʉ chi nejarra ãrĩã gastaɗa basia jãuɗe.

BIBLIABA MɄ SAKA NIBAƊA KAMBIASAA: Mʉ Biblia estudia koɓeesiiɗe, kawasii Dachi Akõre biawãrabena ɓuu Jeowadu, ichia bustakau chi idolorã kʉ̃riaɗayu (Éxodo 20:4, 5; 1 Corintios 10:14). Maaɗakare kawasii kãare aseyuɗebena. Joma batakuasii chi imagenmaa wiɗi nibaɗa. Adivinorã abadaumaa wãbarii baɗa siɗa ida ɓuiɗa, chi ritual asebudauɗaa wãbarii baɗa siɗa mʉ druaɗe ɓuiɗa baɗa, mauɗe chi ritual ẽbẽra biupeɗaaɗa ʉaduuɗebena siɗa.

Jãu mʉ poyaabai ɓoosia. Mʉ 60 años aude imagena waa kʉ̃ria kãribaɗa. Mauɗe mʉ amikorã, mʉ deɗabenarã, mʉ vecinorã barauba ɓuiɗawẽe basii maabae mʉ atua jarapeɗaaɗa. Jeowamaa wiɗiɗa baɗa mʉ biʼia ase nibabiyua. ¡Chi beɗea Proverbios 18:10ɗebenaba mʉ ãrĩã kĩrajʉʉbiɗa! Aria jara ɓuu: “Jeowa trʉ̃ chi torre chaarea nuɓuu kĩraka kuɓuu. Maumaa chi jipa nuree wãɗapeɗa protegebaria”.

Mʉ baita bibuara ɓoosii chi reunión Jeowa ɗebena Jaranũrẽrãɗaa wãyu, ara mʉʉɗeeba unusii saka ãchi chiya kʉ̃ria nuree chi cristianorã. Mʉa ãrĩã bustaɗa baɗa saka ãchia bereka panuu ũriyua chi Bibliaɗe jara ɓuuɗebena. Mʉa ariɗe kawasii saka chi religión biawãrabenabʉ chi Jeowa ɗebena Jaranũrẽrã́turu.

KÃARE KOSA BIA UNUƊE WÃSAA: Chi Bibliaɗe jara ɓuuba mʉʉmaa biʼia unubisii biʼia nibai baita mʉ warrarã ome. Mauɗe mʉa kʉ̃risiasii saka awara jiratasii mʉ ʉ̃rʉ chikʉa ãrĩã chi puʼua koɓooɗaɗebena. Naeɗe ãrĩã chi nejarra gastabachii imagen nedoi baita maarãba mʉ baita asewẽa ɓoosiiɗebena. Jãabera mʉ Jeowa baitaburu traja ɓuu, jãuburu chi problema joma acababuruu (Apocalipsis 21:3, 4). Jãabera imagenmaa wiɗikau, bari Jeowa kʉ̃ria nii mʉ corazonɗeeba. Jãu omeburu mʉ kĩrajʉʉ ãrĩã nibaɗe wãsii.

“Mʉ chuburi niiɗeeɗa Dachi Akõre ʉ̃rʉbena kawa kʉ̃ria nibasia” (SHINJI SATO)

AÑO NASEƊAƊEBENA: 1951

SAMABENA: JAPÓN

ICHI Ʉ̃RɄBENA MAUCHA JARA ƁUU: SACERDOTE SINTOÍSTA BAƊAA

MɄ BIBLIA ESTUDIAI NAEƊE SAKA NIBASAA: Mʉ puuru Fukuoka abadauɗe wariɗa. Mʉ chuburi niiɗeeɗa mʉ akõrerãba mʉʉmaa kawabisiɗau wiɗiyua chi diosna sintoistaɗebenamaa. Makaeɗeeɗebena mʉ biuwẽa nibai baita kʉ̃risia nibapeɗa mauɗe waabenarã aiɗai baita kʉ̃riasia. Earaɓa profesor niiba joma warrarãmaa wiɗisia dawara bapeɗaaɗakare kãareɗe traja kʉ̃ria panuu. Mʉ kõpaerorãba jarasiɗau trajo jari científico kĩra nibayu. Mʉa jarasiiɗe Dachi Akõre baita traja kʉ̃ria nii, jomaurã ʉe kopaneesiɗau.

Bachillerato terminaɗakare, escuela ɓuuɗaa matriculasia maestro religionɗebena nibai baita. Aria unusia sacerdote sintoísta abadau jãu bari kuɓuuɗe ichia libro parrba ɓuu leabachia. Ɓes aɓa ichia mʉʉmaa wiɗisia: “Sato, ¿bichia kuitaa ɓue nau libro kãareba?”. Mʉa naka jarasia: “Chi Bibliabʉ”. Maabea ichia mʉʉmaa naka asia: “Ẽbẽra sacerdote sintoísta ba kʉ̃ria niibʉrã cha ɓuu libro leabaraai”.

Ara mama Biblia nedoɗe wãsia maabea mʉ deemaa eneesia leai baita. Madu, mʉ okupao ãrĩã nibasii bẽe, tiempo wãʼãe basii Biblia leai baita. Mʉ graduaɗakare sacerdote sintoísta kĩra traja ɓeesia chi deɗe sacerdoterã trajabadaurãmaa. ¡Chi mʉa kʉ̃risiaɗa baɗa jãuɗéburu unusia!

Mau kaaɗeburu mʉa kawasia jãu chi mʉa kʉ̃ria baɗa ara maka biʼiawẽe baɗa. Sacerdote ãrĩãrãba ẽbẽrarã aiɗa kʉ̃riaɗakaa. Ãrĩãrã fe wãʼãe basia. Líder aɓa niiba mʉʉmaa jarasia: “Bichia biʼia wã kʉ̃ria niibʉrã, filosofía ʉ̃rʉbenadu berrea nibaba. Fe ʉ̃rʉbenara berrearã́ba”.

Mau kakua mʉ nomaa ɓeesii. Sacerdoterã baare traja nibabarii ida ɓuismina, mʉa kawa koɓeesia junebena religión ʉ̃rʉbena. Mʉʉmaarã religión aɓa biɗa biawãra jaradeakau kawa ɓoosii.

BIBLIABA MɄ SAKA NIBAƊA KAMBIASAA: 1988ɗe mukĩra budista nii unusia ichia mʉʉmaa Biblia leai baita jarasia. Maabea mʉa kʉ̃risia koɓeesii yataɗeeɗa sacerdote sintoísta aɓa niiba ara maka jaraɗa baɗa. Makarã ichi beɗea ũripeɗa lea koɓeesia. Ãrĩã bustasia. Ewarimaa lea koɓoosia.

Mateo 6:9-13 leaɗakare, mʉa ʉtaa wiɗi koɓeesii jãu textoɗe jaradea ɓuu kĩra, dos horas baaruucha apii ara maka ʉtaa wiɗi nibasia sacerdote kĩra trajaaruumisa.

Biblia lea kãribaɗe wãsiiɗe, mau sakaba a kʉ̃risiabachia. Makaeɗe mʉa wẽra bara nibasia, kuitaa ɓoosii Jeowa ɗebena Jaranũrẽba Bibliaɗebena jaradeabadau, ãchia naaburu mʉ wẽramaa jaradeaɗe neebachiɗau. Wẽra Jeowa ɗebena Jara nibabarii ome beɗeapeɗa maabea ichimaa ãrĩã wiɗikasia. Mʉa ãrĩã kawa ɓoosia ichia Bibliaɗeeba joma panausii. Maabea ichia bʉekasia Jeowa ɗebena Jaranũrẽrã ãchia mʉʉmaa Bibliaɗebena kawabiyua.

Mau kaaɗeburu reunionɗaa wã koɓeesia Jeowa ɗebena Jaranũrẽ Deɗe. Aɓaeɗeeɗa mʉa adua basmina, aria duanuu ẽbẽrarã mʉa iadaaɗa baɗa. Maka ɓumina ãchia kʉ̃ria iɗaa mʉ irsibisiɗaa.

Jãu reuniorãɗe mʉa kawa ɓoosii Dachi Akõreba kʉ̃ria ɓuu mukĩrarãba, wẽrarã mauɗe chi warrarã siɗa kʉ̃riaɗayu. Mʉ sacerdote kĩra ãrĩãburu trajabachiiɗeeba mʉ wẽra mauɗe mʉ warr ome niɗau akawa ochiakabachii. Mʉa kawa koɓeesia chi ẽbẽrarã mʉʉmaa imiiduurã ũribachmina, mʉ wẽrara akawa ũrikabachia.

Mʉa aude kawa kãribaɗe wãsii bẽe, ichi kaitaburu nibaɗe wãsia. Textorã ãrĩã mʉ corazonɗe ɓae panasii, jari Romanos 10:13 kĩraka, jãma eɗa naka jara ɓuu: “Jomaurãba Jeowa trʉ̃du jarabudaudu maarãdu karebakuaɗayua”. Mʉa Dachi Akõre ʉ̃rʉbena chuburi niiɗeeɗa kawa kʉ̃ria nibasia. Jãabera kawa koɓeesia.

Sacerdoterã traja niɗau deɗe traja kʉ̃riabasii. Aɓaeɗeeɗa mʉ ãrĩã kĩrukaraa koɓoosia waabenarãba kãare jaraɗayu chi mʉa sintoísmo ɓuiɗa basirã, maka ɓumina jãu ida ɓui kʉ̃risia nibaɗa Dachi Akõre ariɗe nii ʉ̃rʉbena junebenaɗe kawaɗe wãsirã, makarã jãu kʉ̃risia kãri ɓoopeɗa, sacerdote trajabadau de ɓuipeɗa 1989ɗe maabea Jeowa ome nibaidu kʉ̃risiasia.

Mau aseyu chaarea ɓoosia mʉ baita. Mʉ lidernaba mʉʉmaa atua jaraɗapeɗa ãchi baare ɓeei baita ãrĩã jarasiɗaa. Chi mʉ baita chaarea ãrĩã ɓoosiirã mʉ akõrerãmaa jarayudu. Ãchi deeɗaa wã kãriiɗe, peraaruuba mʉ pecho pira koɓeepeɗa mʉ jĩrʉ ure koɓeesia. Oɗe Jeowamaa ãrĩã ʉtaa wiɗi nibapeɗa ichimaa mʉ aiɗábaɗe aɗa baɗa.

Akõrerã deeɗaa wãɗakare, jãu ʉ̃rʉbena poyaa berrea basia. Hora ãrĩã baɗakareburu, mʉ akõremaaburu jaraɗa basia. Mʉa Dachi Akõre ariɗe nii junebena religionɗe kawa koɓeesia aɗa baɗa, mauɗe jãmabera ichi baita trajayua sintoísmo ɓuiyua aɗa baɗa. Ichi beɗeaswẽa a koɓeepeɗa ãrĩã nomaa koɓeesia. Chi ɓee mʉ deɗabenarãba mʉʉmaa jarasiɗau maka kʉ̃risiamaaba. Mʉa aɓa biɗa kĩrubi kʉ̃riabasia, mʉa chi jipa ɓuu asei ida ɓui kʉ̃riabasia Jeowa baita traja nibayu. Ɓoapeɗaburu, mʉ deɗabenarãba respeta paneesiɗau mʉa aseɗa kakua.

Sacerdoterã trajabadau de ida ɓuipeɗa, mauɗe chi mʉa naeɗe kʉ̃risia nibaɗa siɗa ida ɓui basia. Mʉa ara maka kʉ̃risiapeɗa nibasia chi naeɗe traja nibaɗaɗe, nauɗe kʉ̃risia nibaabayu berekasmina.

¿Mʉa kãare asesaa jãuɗe waaburu kʉ̃risia nibaamaaba? Ome ɓuu aseɗa baɗa. Mʉ deeɗaa neesiiɗe joma chi sintoismoɗebena adaupeɗa chi jãu religionɗebena baakuaɗa. Librorã, cuadrorã, mauɗe chi caro ãrĩã ɓee siɗa baataɗa. Mauɗe aribiáturu tiempo pasaɗa basia ãbarã ome. Mʉ ãchi baara nii bẽrã, aiɗapeɗaaɗa ida ɓui baita chi naeɗe ase nibaɗa.

KÃARE KOSA BIA UNUƊE WÃSAA: Naeɗera mʉ wẽra mʉ warrarã baara ochiakabachii, mauɗeeba du aɓa duanabachiɗaa. Mauɗe chi Bibliaba jara ɓuu aseɗakare, ãchi baara nibaɗe wãyu ãbua duaneesiɗau. Mau kaaɗe, mʉ wẽra mʉ ome Jeowa baita traja kʉ̃risia koɓeesia. Iɗiiɗaa, joma mʉ deɗabenarã dai omeerã, dai warr, dai kau mauɗe ichi kima baare, ãbua Jeowa kʉ̃riaɗapeɗa chi Dachi Akõre ariɗe nii ũriɗapeɗa kʉ̃ria nurea.

Mʉ ɓiɗĩika nibasiiɗe traja kʉ̃riabachia Dachi Akõre baita mauɗe junebena aiɗaɗai siɗa, jãuɗe kʉ̃risiaburuuɗe kuitaa ɓua mau asebaria, mʉa ara kiruma abaria Jeowamaa ichia joma mʉ aiɗa niiɗeeba.

“Mʉʉɗe eɗa kʉ̃risia nibasiiɗe aɓa falta ɓoosii” (LYNETTE HOUGHTING)

AÑO NASEƊAƊEBENA: 1958

SAMABENA: SUDÁFRICA

ICHI Ʉ̃RɄBENA MAUCHA JARA ƁUU: MɄ MISTUBURU NII KɄ̃RISIASII MɄ ƁUIPEƊAAƊAƊEEBA

MɄ BIBLIA ESTUDIAI NAEƊE SAKA NIBASAA: Mʉ puuru ɓiɗĩika kiruuɗe naceɗa baɗa Germistonɗe, mama minaɗe traja nureaɗaa, aria orroabadau ãrĩã wãʼãe basii. Mʉ 14 días naceɗaɗeeɗa, mʉ akõrerãba junebena juamaa deapeɗaaɗa, ãchia kʉ̃risiasiɗauɗe mʉ poyaa biʼia cuidaɗaabai ɓoosii. Chi mʉ adauɗapeɗaaɗaba waribisiɗau mʉ akõrerã́turu kʉ̃risiaɗa baɗa. Mʉa kawasiiɗe chi biawãrabena mʉ akõre wãʼãe panuu, mʉa kʉ̃risiasii mʉ akawa ɓuipeɗaaɗa baɗa. Ãchi mʉ akõrerã biawãrabenawẽeɗeeba mʉʉɗebena biʼia kʉ̃risiaɗaabai ɓoosii, a kʉ̃risiaɗa baɗa.

Mʉ 16 años basiiɗe mʉ amikorã baara cantinaɗaa wãbachii baeraɗe mauɗe música ũriyua. Maabea 17 años basiiɗe cigarrillo do koɓeeɗa. Cartel cigarrilloɗebenaɗe unubarii wẽrarã akawa ɓʉʉrʉa nureerã, mʉa ãchi kĩra unubarii kʉ̃riaɗa. Mʉ 19 años nibasiiɗe, Johannesburgoɗaa wãɗa basii trajaɗe. Chi tiempo ara ɓiɗĩika baburuuɗe amikorã kachirua nureerã baara koɓeesii, chi beɗea miadaabena jarapeɗa, cigarrillo dopeɗa, itua dopeɗa chi semana acabaaruucha.

Mʉ ejercicio ãrĩã asebachii. Gimnasia aeróbica, squash mauɗe fútbol jemeneyua. Mʉ ãrĩã́turu traja nibaɗe wãɗa, mauɗeeba ẽbẽrarãba kuitaa nureasii mʉ biʼia traja nii computadorna ome. Mʉ biʼia vivi nibapeɗa mauɗe chi nejarra siɗa bara nibaɗa, ãrĩãrãba kʉ̃risiabachiɗau mʉ kĩrajʉʉ ãrĩã nii. Mau makawẽe basii: mʉ ãrĩã nomaa nibapeɗa, ãrĩã kĩrajʉʉ nibaabasii mʉa kʉ̃ria ɓuu kĩra. Mʉ eɗare kʉ̃risia nibasiiɗe mʉ vidaɗe aɓa falta ɓoosii.

BIBLIABA MɄ SAKA NIBAƊA KAMBIASAA: Mʉa Bibliaɗebena kawasiiɗe, Jeowaba ãrĩã kʉ̃riabarii kawasii, jãuɗéburu dachimaa deasii ichi Beɗea. Biblia jãu karta kĩraka ɓuu dachimaa kawabiyua kãare ase nibayu (Isaías 48:17, 18). Mʉa kawasii, Dachi Akõreba jara ɓuu chi naeɗe kachirua ase nibaɗa ida ɓui baraachesia.

Chi naa kʉ̃risiasii ida ɓuiyua chi amikorã chi kachirua ɓuu ase panaɗa. Proverbios 13:20ɗe jara ɓuu kĩra, “chi biʼia kʉ̃risiabadau baare ãda ɓuubʉrã makarã mau siɗa biʼia kʉ̃risia kerai, maka ɓumina biʼia kʉ̃risiaɗakaurã baare koɓeesirã biʼiawẽe wãi”. Mʉ ara jari Bibliaɗe nau consejo jara ɓuu kĩra, chi amikorã kachirua nuree ɓuiɗakare, june amikorã baraasii congregacionɗebena ome.

Poyaa ɓuibai ɓoosii chi cigarrillo do niiɗebenáturu. Chi cigarrillo do nibaɗa ida ɓuiɗakare, 14 kilos (30 libras) ʉtaa wãsii. Mʉ kakua ãrĩã boreaɗakare kʉ̃risiasii mʉ chi miadaa ãrĩã nii, mauɗe 10 años demorasii mʉ kakua eɗaa wãi baita. Maka ɓumina kuitaa ɓoosii ida ɓui basii chi cigarrillo do nibabarii. Ewariiruucha wiɗi ɓeeɗa baɗa Jeowamaa, ichia mʉ chaareabisii ida ɓuibiyua cigarrillo do nibabarii.

KÃARE KOSA BIA UNUƊE WÃSAA: Jãabera mʉ salud alentao ãrĩã nibaɗe wãsii. Mʉ kĩrajʉʉ ãrĩã nii chi mʉ ua niiɗeeba. Mʉa kʉ̃risiakau trajo biʼia ɓuu bara nibapeɗa mauɗe chi nejarra ãrĩã bara nibayuɗebena, jãubara mʉ biawãrabena kĩrajʉʉ nibabiibai ɓuu. Mʉ kima ome mʉ kĩrajʉʉ ãrĩã nii kawabiayua Bibliaɗebena junebenarãmaa, jãabera kawabiasii wẽrarã õbea trajoɗebenamaa ãchirã siɗa Jeowa baita traja koɓeesiɗau. Mʉ akõrerãba mʉ adaupeɗaaɗa baɗa biuɗai naeɗe, mʉa kawabiaɗa baɗa Dachi Akõreba piradrubiayu biupeɗaaɗa baɗa nama iujãa mipitaa kiruuɗe.

Mʉ Dachi Akõre kaita nibaɗe wãsii bẽrã, jãabera kʉ̃risiakau mʉ ɓuipeɗaaɗa baɗa. Mʉ ãbua nibaɗe wãsii ãbarã nau iujãaɗebena ome, jãarã mʉ akõrerã kĩra, mʉ nawekaurã, mʉ ãbarã, jãka nuree (Marcos 10:29, 30).

[Foto]

Jeowa ɗebena Jaranũrẽba ãchi chiya kʉ̃riabadaa

[Foto]

Chi sintoísmo abadau de