• AÑO NASEƊAƊEBENA: 1941

• SAMABENA: BENÍN

• ICHI Ʉ̃RɄBENA MAUCHA JARA ƁUU: KIMARÃ ÃRĨÃ BARA NIIBA, JEOWA ƊEBENA JARANŨRẼRÃ IADAA ÃRĨÃ NIBASII

MɄ BIBLIA ESTUDIAI NAEƊE SAKA NIBASAA:

Mʉ Cotonouɗe naceɗa, puuru choroma Beninɗe. Mʉ católico kĩra waribipeɗaaɗa baɗa, maka ɓumina misaɗaa wãabasii. Catolicorã ãrĩã wẽra ãrĩã bara nureasii, chi gobiernoba idaarabibachii bẽrã. Mʉ wẽrarã kimare bara nibasia.

1970ɗe chi política mʉ paisɗebena cambiaɗa. Mʉa kʉ̃risiaɗa baɗa biʼia ɓuu chi país baita, mauɗeeba mʉ joma ɓeeɗa basii politicaɗe. Chi gobiernoɗerãwãeba bustakabachia chi Jeowa ɗebena Jaranũrẽrã, ãchirã politicaɗe nureaɗakabasii bẽrã, mauɗeeba mʉa biɗa ãchi kaaɗe ãda nibaɗe wãɗaa. 1976ɗe jʉretapeɗaaɗa baɗa Jeowaɗebenarã, mʉa kʉ̃risiaɗa baɗa akawa neeɗaabai baɗa.

BIBLIABA MɄ SAKA NIBAƊA KAMBIASAA:

Jãu guerra 1990ɗe acabaɗa, mʉa kʉ̃risiawẽebasii chi Jeowa ɗebena Jaranũrẽrã isa neeɗai ɓoosii, maabae mʉa kʉ̃risiasii Dachi Akõreba ãchi aiɗamaa ɓoosii. Jãu tiempoɗe mʉ trajo junebe jʉrʉsii. Mama aria mʉ kõpaero Jeowa ɗebena Jaranũrẽrã basii, ichia demorawẽeɗe Biblia ʉ̃rʉbena beɗea basia mʉʉmaa, chi Bibliaɗe texto unubisii Jeowa jipa nibapeɗa kʉ̃ria ãrĩã nibabarii nii (Deuteronomio 32:4; 1 Juan 4:8). Jãuba mʉa ãrĩã bustasia, mʉa mauchaburu kawa kʉ̃riasii bẽrã, ichi baara estudia koɓeeɗa.

Maabae isa wã koɓeesia chi reunión Jeowa ɗebena Jaranũrẽrãɗaa mʉa ãrĩã bustasii saka ãchi kʉ̃ria ãrĩã nuree unubibadau, ãchia ochiaɗakau dachi saka nii chi raza maebʉrã chi nejarra ãrĩã bara niiɗe, ãchi baara ãda koɓeesiiɗe mʉa kawasii ãchirã Jesús kĩraka nuree (Juan 13:35).

Mʉa kawasii Jeowa ɗebena Jaranũrẽ ba kʉ̃ria niibʉrã, chi Católico ida ɓui basii. Jãu mʉ baita poyaawẽebai ɓoosii, mʉa kʉ̃risiasiiɗe kãare jaraɗaiba mʉ vecinorãba aɗa. Mʉ isa jãkawẽe basmina, Jeowaba mʉ aiɗasii kĩra ʉɓʉa nibapeɗa Iglesia ida ɓuiyua.

Ɓoosia maucha cambiayu. Bibliaɗe kawasii kimarã ãrĩã inibaabayu (Génesis 2:​18-​24; Mateo 19:​4-6). Chi naa adauɗa baɗaa mau ome kimabaraapeɗaburu registrabiɗa basii. Chi junebena wẽrarã deɗabena bʉekaɗa basia, maabae mʉa ara jãka duanabiimaaba mau ochia nibaɗa basia. Maaɗakare maarãɗebena ome Jeowa ɗebena Jaranũrẽ bapeɗaaɗa basia.

KÃARE KOSA BIA UNUƊE WÃSAA:

Mʉ wẽra Católica nimina, ida trajabibaria Jeowa baita, dai omeerãba kʉ̃risiabadau jãabera mʉ kima bia ɓuu.

Mʉa naeɗe kʉ̃risiaɗa baɗa politicaba nau iujãa biʼia babiyu, maka ɓumina makawẽe basia. Jãabera mʉa kawasii Dachi Akõre Kobiernoburu joma chi problema arreglayua (Mateo 6:⁠9, 10). Mʉa Jeowamaa ara kiruma abarii jãabera biʼia ãrĩã nibasii bẽrã.

• AÑO NASEƊAƊEBENA: 1977

• PUURU CHOROMA: BRASIL

• ICHI Ʉ̃RɄBENA MAUCHA JARAƁUU: PASTOR PENTECOSTAL BASII

MɄ BIBLIA ESTUDIAI NAEƊE SAKA NIBASAA:

Mʉ wariɗa barrio poore ãrĩã ɓuu Ituɗe, mau puuru choroma São Pauloɗe, jãma chiruaɗapeɗa ãrĩã beabadaa.

Mʉ wẽrarã ãrĩã ome kãibachia mauɗe ãrĩã siruarã nedobʉibachia. Mʉa kawasii ara jãka niibʉrã, carcelɗaa odoeɗai ɓuu makawẽebʉrã beaɗai basia, mauɗeeburu mʉa jãu akawa ida ɓuɗa basia. Maabae Iglesia Pentecostalɗaa wãɗa basia, mama mʉ pastor trʉ̃ jarapeɗaaɗa.

Mʉa kʉ̃risiaɗa baɗa Iglesiaɗe ɓeeburuuba ẽbẽra aiɗakuai ɓoosii, mauɗeeba radioɗeeba programa religionɗe beɗea ɓeeɗa, mauba jomaurãba ũri duaneeɗa basia. Mauɗe, ɓiɗĩi ɓiɗĩia mʉa kawasii mau chi Iglesiaba preocupaɗaabasii chi ẽbẽra araa wãbudaurã kakua maarã biʼia duanaɗai baita, mauɗe akawa Dachi Akõre respetaɗakau. Bari ãchia kʉ̃risiabadau chi nejarra wiɗikaɗaidu. Mauɗeeburu ɓuiɗa basia jãu Iglesia.

BIBLIABA MɄ SAKA NIBAƊA KAMBIASAA:

Biblia empeza estudiasiiɗe Jeowa ɗebena Jaranũrẽrã ome, mʉa kawasii ãchi diwara nuree junebena religionɗeeba. Ãchia i baara jaraɗakau ẽbẽra kʉ̃riaɗapeɗa mauɗe Dachi Akõre siɗa kʉ̃riabadau, maarã mauɗebena wãrabenáturu unubibadaa, mauɗe ãchi política mauɗe guerraɗe biɗa nibakaa (Isaías 2:4). Mʉa nauburu kawasii jã́turu chi religión ariɗe ɓuu: jã́turua chi o pĩchua ɓuu, jãuburu dachi odoebarii biuwẽa nibayu (Mateo 7:13, 14).

Kawasii Dachi Akõre kĩrajʉʉbiyua kachirua nibaɗa ɓuiyu akawa. Juakaya nibaɗaɗeeɗa ida ɓuyu mauɗe akawa mʉ wẽra mʉ warrarã deeɗa biʼia ochia inibayu. Mʉ cambiai baita chaarea ɓooɗa, maka ɓumina Jeowaba aiɗasiiba joma asesii. Mʉ wẽra mʉ naeɗe Biblia estudia koɓeeɗa basia ichi kĩrajʉʉ ãrĩã ɓeesii, mʉ siɗa jãka estudiasiiɗeeba nau unuburuuba ichi mauchaburu kawa kʉ̃ria koɓeesii, maabae chi naeɗe nibaɗa akawa cambiayua. Maabae kʉ̃risiasiɗau Jeowa ɗebena Jaranũrẽ nibaɗayua. Maabae, ara aɓau diaɗe bautizapeɗaaɗa.

KÃARE KOSA BIA UNUƊE WÃSAA:

Mʉ, mʉ wẽra omeeba kĩrajʉʉ ãrĩã dai warrarã aiɗabadau Jeowa amiko babiɗayua. Dai kĩrajʉʉ ãrĩã niɗaa. Mʉa ara kiruma abarii Jeowamaa mʉa chi ariɗe ɓúturu kawabiasiiɗeeba ichi Beɗeaɗebena. Bibliaba aiɗa ɓuu ẽbẽrarã ida ɓuɗayua chi naeɗe nibaɗaa, mʉ siɗa aiɗasia.

• AÑO NASEƊAƊEBENA: 1957

• SAMABENA: AUSTRALIA

• ICHI Ʉ̃RɄBENA MAUCHA JARA ƁUU: CHUBURI NIBASIIƊE ÃRĨÃTURU SUFRIƊA BASII

MɄ BIBLIA ESTUDIAI NAEƊE SAKA NIBASAA:

Mʉ ãbarã siete mauɗe mʉ́turu chi nabena, mʉ puuru Newcastle abadauɗe wariɗaa (Nueva Gales del Sur). Mʉ akõreba dai ãrĩã sĩɗikabachii mauɗe itua siɗa ãrĩã dobachii. Mʉ dana biɗa dai ãrĩã sĩkuabachii mauɗe kachirua jarakuabachii. Ichia noremaacha jarabachii mʉ ẽbẽra kachirua nii mauɗeburu mʉ infiernoɗaa wãyu abachii. Ichia jãka jaraburuuba mʉ ãrĩã perabibarii basia.

Kapichia mʉ danaba ãrĩã sĩbachii mauba mʉ estudiaɗe wãkabasii. 11 año nibasiiɗe, chi autoridarãba mʉ akõrerã baara nibabiɗawẽebasia. Maabae mʉ conventoɗaa odoesiɗau, mamabena 14 año baɗakare wãɗa basii mʉ deeɗaa wã kʉ̃riawẽebasiiɗe, chi calle Kings Crossɗebena (nau Sydneyɗe ɓua) mʉ deeɗe baɗa basia.

Calleɗe nibasiiɗe, itua ãrĩã dopeɗa, siruaɗeeɗa tawa nibaɗe wãɗa, pornografia ãrĩã ochiapeɗa mauɗe mʉ kakua siɗa nedobʉi nibaɗe wãɗa. Ɓoosia ewari, mʉ ãrĩã peraɗa baɗa. Mʉ kãibachii chibari club nocturnoɗebena deemaa, ẽsebuɗaa mukĩra ome niɗau neesiɗau ichi deemaa. Chibariba mʉ piezaɗaa ɓuismina mʉa ũriɗa joma chi beɗeasiɗau. Ichia mʉ chi mukĩra ome niɗaumaa nedobʉi kʉ̃riaɗa, ãchia mʉ barco bʉeɗapeɗa Japónɗaa odoeɗai basii barɗe trajabiɗayua. Mʉ ãrĩã peraɗa bẽrã, ventanaɗe eɗaa jĩdru wãsii, maabae aiɗaɗai wiɗisia.

Mʉ unusii mukĩra chi puuruɗaa pasia neeɗaa ome, mʉa joma jaraɗa baɗa chi mʉ pasasiiɗebena, ichia mʉʉmaa chi nejarra deabiyua. Mau kãyabãra ichi deemaa mʉ odoesii kuipeɗa mauɗe chiko kobiyua. Ichi ome ɓeepeɗa mauɗe año baɗakare kãisiɗau.

BIBLIABA MɄ SAKA NIBAƊA KAMBIASAA:

Mʉ Jeowaɗebena estudia koɓeesiiɗe, kawaɗa basii Satanasburu joma jãka kachirua asebi nii, mʉ ãrĩã kĩruɗa baɗa; chuburi niiɗeeɗa kawabipeɗaaɗa Dachi Akõreburu jãka supribi nii. Maka ɓumina mʉ kĩrajʉʉ ãrĩã sentiɗa Dachi Akõre dachi infiernoɗe eɗa kastikakau, nauburu mʉ ɓiɗĩika nibasiiɗe ãrĩã perabibachii.

Mʉa ãrĩã bustasii Jeowa ɗebena Jaranũrẽrã ara jari Bibliaba jara ɓuu kĩraka nurea, ara jari ãchia jaradea nuree kĩraka ara jãka asebadaa. Mʉ poyaa jaraɗaabaidu nibaɗa, maka ɓumina ãchia mʉ biʼia ãrĩã́turu jaradeaɗapeɗa mauɗe ãrĩã ʉrrespetabadau kʉ̃ria ãrĩã jarabachiɗaa bariara mʉa ãi jarapeɗa miadaa asebachmina.

Chaarea ãrĩã ɓoosii mʉ baita ida ɓooyu chi mia nomaa kʉ̃risia nibaɗaɗebena. Kʉ̃risiaɗa baɗa mʉ akawa serbiwẽa nii mauɗe ara mʉchi du aɓa iadaa nibaɗa. Mʉ Jeowaɗebena Jaranũrẽ ba wãsmina, ara jãu kachirua ɓuuɗeburu kʉ̃risia ɓeeɗa. Mʉa Dachi Akõre kʉ̃ria wãsmina, mʉa kʉ̃risiasii ichia mʉ kʉ̃riawẽe mʉ jãka nibaɗa kakua.

15 año baɗakare mʉ bautizaɗa baɗa joma cambiaɗaa. Jeowa ɗebena Jaranũrẽrã Deeɗe discurso deasiɗauɗe jara ɓuu Santiago 1:23, 24ɗe. Chi versiculorãɗe jara ɓuu chi Dachi Akõre Beɗea espejo kĩraka ɓuu mauɗe dachi unuɗai ɓuu Jeowaba unu nii kĩra. Mʉa kʉ̃risia koɓeesiiɗe mʉ june diwara kʉ̃risia ɓuu, mʉ diwara unu ɓuu Jeowaba mʉ unubi ɓuuɗeebiɗa. Naeɗeeɗa mʉa jãuɗe poyaa ijãawẽebasii, mʉa kʉ̃risiasii mʉ Jeowaba kʉ̃riaabai ɓuu.

Maaɗakare mʉa texto leasiiɗe cambiabisii mʉ kʉ̃risia nibaɗa. Mau Isaías 1:18 basii, mauɗe Jeowaba jara ɓuu: “Jʉrʉ́sturu, mʉ ome beɗeapeɗa biʼia paneeɗayua [...]. Machi pekao purea ãrĩã ɓemina, torroa nieve kĩra ɓeeɗai ɓua”. Jeowa mʉ ome beɗea kuɓuu kĩraka sentiɗaa, mʉʉmaa jara ɓoosii: “Uruchãu, Vicky, dachi ome beɗeaɗapeɗa biʼia paneeɗaika. Mʉa unubaria, Mʉa bichi pekao unu ɓua, bichi corazón unubaria, maka nimina, mʉa kʉ̃ria inia”.

Mʉ jãu ẽsebuɗe poyaa kãibasia. Abiɗa kʉ̃risia ɓoosii Dachi Akõreba mʉ kʉ̃ria ɓuuwẽe, maka ɓumina Jesús biuɗaɗeburu kʉ̃risia koɓeesii. Mʉa kawasii Jeowa mʉ ãrĩã́turu espera ɓoosii, ichia mʉ kʉ̃ria unii ãrĩã́turu unubi ɓoosii. Maka ɓumina, mʉa ichimaa jara ɓuu kĩra ɓoosii: “Bichia mʉ kʉ̃ria ɓuuɗeebiɗa awara ɓuu. Bichi warr biusiiɗeebiɗa jãuba mʉ pekao perdonawẽa ɓuu”. Mau mʉa chi Jesús biuɗa baɗaɗe kʉ̃risia inibawẽebasia. Jãabera mʉa kʉ̃risia koɓeesii Jeowaba asesiiɗebena, mʉ kʉ̃risiaɗeeba koɓeesii ichia mʉ kʉ̃ria unii.

KÃARE KOSA BIA UNUƊE WÃSAA:

Jãabera mʉ chokae ɓuu kĩra ɓua mauɗe kʉ̃risia biʼia jayoaswẽe. Mʉ kima ome mʉ biʼia ãrĩã nii, mʉ pasaɗaɗeeba junebena siɗa aiɗai ɓua. Ewariiruucha Jeowa kaita koɓeesia.

• AÑO NASEƊAƊEBENA: 1974

• SAMABENA: RUSIA

• ICHI Ʉ̃RɄBENA MAUCHA JARA ƁUU: CHI HEAVY METAL ÃRĨÃ BUSTABACHIA

MɄ BIBLIA ESTUDIAI NAEƊE SAKA NIBASAA:

Mʉ nacesiiɗe mʉ deɗabenarã ãrĩã poore ɓoosii Votkinskɗe nureasiɗau, ara mau puuruɗe nace ɓoosii Piotr Ilic Chaikovski ẽbẽrarãba joma ichi unubachiɗau música wau ɓoosiiɗeeba. Mʉ akõre ẽbẽra bia nibasmina, ichi ãrĩã do ɓoosii itua, mauɗeeba mʉ deeɗa ãrĩã problema baraasii.

Mʉ estudiai bustakabasii, tiempo pasaɗakare mʉa miadaa kʉ̃risia basii mʉ ʉ̃rʉbena. Mʉ pera ɓoosii beɗeai baita mauɗe mʉa chi waa ẽbẽrarã akawa ijãawẽebasia, jãuɗeeba mʉ chaarea ãrĩã ɓoosii escuelaɗaa estudiaɗe wãi baita. Escuelaɗe mʉ ʉtʉ aka noɓeeburuuɗe salonɗeeɗa kõpaerorã kĩraare ãrĩã pera ɓoosii beɗeai baita mechia baɗakare. Año terminaburuuɗe chi profesorba boletin deabʉe ɓoosii ichia naka ɓʉ ɓoosii: “Ichi adua beɗeai baita; chi ichia kʉ̃risia ɓuu poyaa jaraabai”. Chi ichia jara ɓoosiiɗe ãrĩã nomaa sentibii ɓoosii. Mʉa mistu kʉ̃risiasii mʉ kãare kakua chokae ɓuu.

Mʉ kũudrãa nibasiiɗeeɗa ãrĩã dobachii. Mʉ doburuuɗe kĩrajatua ɓoosii, maamina mimichia biu ɓoosiiɗe mʉa kʉ̃risia ɓoosii jãka miadaa ase ɓoosii aseebai baɗa. Mʉ ara kapichia mia nomaa sentibachii, jãuɗeeba deɗebena awara wãwẽa koɓee ɓoosii. Mʉa kʉ̃risia ɓoosii mʉ mistu biu kʉ̃ria ɓuu.

Mʉ 20 año ba ɓoosiiɗe mʉa heavy metal ãrĩã ũribachii, biʼia sentibi ɓoosiiɗeeba. Mʉa música ũrisiiɗe jãuba mʉ chaarea sentibi ɓoosii, jãuɗeeba mʉ chi mau música bustabadau ome meraa koɓeesii, mʉ buɗa ida che atausia, kʉʉrʉ siɗa uyakuasia arete jʉ̃i baita, camisa jʉ̃ koɓeesii chi cantante mʉa bustabarii unubii baita. Mʉ bikãa kãribasiiɗe ẽbẽra kachirua nibaɗe wãsia, jãuɗeeba mʉ ẽbẽrarãba ãrĩã pera senti panasii.

Mʉ ãrĩã cambiasii. Mʉa kʉ̃risia ɓoosii jãu música ũrisirã ãrĩã kĩrajatua koɓeei basii madu jãu jãkawẽe basii. Chi música mʉa ãrĩã busta nibaɗa mau chaabadaurã ãchia miadaa ɓee ase panuu kawasiiɗe, mʉa kʉ̃risia ɓoosii ãchia mʉʉmaa chi sea jarasiɗauka ɓuu.

Mʉ waya biui baita kʉ̃risia ɓoosii mauɗe mʉ mistu bẽrã biusii. Mʉa ãrĩã kʉ̃risia ɓoosii mʉ danadu ichia mʉ ãrĩã kʉ̃ria ɓoosiiɗeeba, mʉ poyaabasii mistu biui baita. Mʉ biui kʉ̃ria ɓoosii maka ɓumina mʉ capazwẽe basii mistu biui baita.

Libro chi sore Rusiaɗebena lea koɓeesii. Libro aɓa ɓuuɗe pastor religión ʉ̃rʉbena jara ɓuu. Ara jãu momentoɗe kawa kʉ̃ria ɓoosii Dachi Akõre ʉ̃rʉbena mauɗe chi waabena aiɗa kʉ̃ria ɓoosii. Mʉa Dachi Akõremaa akawa wiɗikabasii. Ara jãu momentoɗe ʉtaa wiɗi ɓoosii Dachi Akõremaa, mʉa wiɗi ɓoosii ichi ʉ̃rʉbena biʼia kawabii baita. Dos hora baɗakare Jeowa ɗebena Jaranii mʉ deemaa neesii ichia Biblia ʉ̃rʉbena jaradeai a ɓoosii. Mʉa Dachi Akõremaa ʉtaa wiɗiɗa baɗa biʼia ɓooi baita mauɗe ichia ũri ɓoosii. Jãbeburu kĩrajatua koɓeesii.

BIBLIABA MɄ SAKA NIBADA KAMBIASAA:

Chi música heavy metal ʉ̃rʉbena ɓatakuaɗamina, mʉ boroɗe koɓeesii. Chi mau música chaa kuɓuumare ãdabachiiɗe mau ũriɗakare, mʉ waya jĩɗaa kachirua ʉ̃rʉbena kʉ̃risia koɓeesii. Mʉa mipitaa kawa kãribasii bẽrã, boroɗe miadaa ʉ̃rʉbena kʉ̃risia kʉ̃riaabasii, jãuɗeeba mʉ jãmare wãwẽa ɓeesii. Mau aseɗaɗeeba “Dachi Akõreba biʼia ãrĩã kĩrukaraayuwẽa” nibabibarii ​(Filipenses 4:7).

Mʉ Bibliaɗebena kawa ɓoosii chi cristianorã waabenarãmaa jaradeaɗayu chi ãchia kawasiɗau ʉ̃rʉbena (Mateo 28:​19, 20). Mʉa kʉ̃risiaɗa baɗa poyaawẽebasii junebenamaa jaradeaɗe wãi baita, mʉa Bibliaɗebena kawa koɓeesiiɗe kĩrajatuasii. Mʉa kʉ̃risia ɓoosii chi waa ẽbẽrarãba kawaɗarã biʼia ãrĩã ɓuu ãchi kĩrajʉʉɗai baita. Mʉ pera koɓesmina, beɗeaɗe wã ɓoosii waabenarã ome chi kawa kuɓuuɗebena. Jãabeaburu mʉ biʼia senti koɓee ɓoosii chi Bibliaba jara kuɓuu mʉ corazonɗe ɓee ɓoosia.

KÃARE KOSA BIA UNUƊE WÃSAA:

Jãabeaburu mʉ kĩrajatua koɓeesii mʉ wẽra ome, mʉa ẽbẽrarã ãrĩãmaa Bibliaɗebena kawabiɗa basia jari mʉ nawekau, mʉ danamaa biɗa. Dachi Akõre baita trajapeɗa waabenarãmaa ichi ʉ̃rʉbena kawabiaburuuba mʉʉmaa kʉ̃risiabisii kãare baita mʉ nama ɓuu.