Ãchi nibapeɗaaɗabaɗa kambiasia Bibliaɗeeba

¿KAUCHEKE aɓa nii kãare aseɗaba kĩrajʉʉ nibayua ichi sufri nibaɗa basmina? ¿Sakayua mukĩra gobierno ome miru ãrĩã nibaɗa ida ɓuɗaba? Ochiaba cha nauɗebena.

“Mʉa kʉ̃ria ɓoosii mʉ kʉ̃riabii baita” (INNA LEZHNINA)

AÑO NACEƊAƊEBENA: 1981

SÃMABENA: RUSIA

ICHI Ʉ̃RɄBENA MAUCHA JARA ƁUU: CHUBURI NIBASIIƊE NOMAA NIBAƊA

MɄ BIBLIA ESTUDIAI NAEƊE SAKA NIBASAA: Mʉ akõrerã kʉʉrʉba ũriɗakabasiɗau, mʉ siɗa jãka naceɗa. 6 año nibasiiɗe kĩrajʉʉ nibasia, maabea mʉ dana amaapeɗaaɗa, mʉ chuburi nibasmina mʉ baita jãu puʼua ãrĩã ɓoosia. Ãchi ɓuipeɗaaɗakare, mʉ akõre mʉ ãba nabena baara ãbua nibaɗe wãsiɗau Troickɗaa, mauɗe mʉ danaba ichi baara odoeɗa baɗa Cheliabinskɗaa. Maaɗakare ichi waya junebe kimabaraaɗa baɗa. Chi kima mʉ danaɗe itua ãrĩã dobachii mauɗe dai omea ãrĩã sĩbachii.

1993ɗe, mʉ ãba nabena doɗe eɗa biuɗa. Jãu dai baita puʼua ãrĩã ɓooɗa. Mʉ dana ãrĩã do ɓeeɗa basia, mau biɗa mʉ ãrĩã sĩbachia. Mʉ biʼia niba kʉ̃ria nibaɗa. Mʉ kʉ̃riabi kʉ̃ria nibaɗa. Mʉ iglesiarã ãrĩãɗe aiɗabiyua jʉrʉ nibaɗa, wãʼãe basia akawa mʉ aiɗaɗai baita.

BIBLIABA MɄ SAKA NIBAƊA KAMBIASAA: Mʉ 13 año nibasiiɗe, mʉ kõpaero Jeowaɗebena jara nibaɗa, ichia mʉʉmaa nebʉrʉsii historia Bibliaɗebena. Mʉa bustabachii Noeɗebena jara ɓuu, mauɗe Jobɗebena, ãchirã Dios baita traja nibasiɗau ãrĩã sufrisiɗau adua. Maaɗakare mʉ Bibliaɗebena estudia koɓeeɗa Jeowaɗebena jara nuree baara maabea reunionɗaa biɗa wãbachii.

Chi Dios beɗeaɗe kawasii ãrĩãdu chi beɗea mipitaa ãrĩã ɓee. Mʉ corazonɗe ɓaesii kawasiiɗe Dios trʉ̃ bara nii (Salmo 83:18). Mʉ kʉ̃risiaswẽa koɓeeɗa kawasiiɗe Bibliaɗe “chi último diarãɗebena” jãu ara jãka pasayuɗebena (2 Timoteo 3:​1-5). Mʉa bustasii kawasiiɗe biupeɗaaɗa baɗa waya piradruɗaiɗebena. ¡Mʉ ãba waya unui ɓua! (Juan 5:​28, 29).

Maka ɓumina, jomaurã mʉ kĩra kĩrajʉʉ duanaɗaabasii. Mʉ dana mʉ akõreka nii omeeba bustaɗakabasii Jeowaɗebenarã, mʉʉmaa kapichia jarabachiɗau chi Biblia estudiabiɗaamaaba. Maka ɓumina mʉa bustabachii chi kawamaa ɓuuɗebena, jãu ida ɓueebasii.

Mʉ baita poyaabai ɓoosia deɗabenarãba bustaɗaabasii. Jãaɗakare maucha kachirua pasaɗa: mʉ ãba kaaɗebena nii, mʉ ome reunionɗaa wãbarii, mau siɗa doɗe eɗa biuruuɗaa. Chi Jeowaɗebenarã mʉ baara duanasia. Ãchia mʉ kʉ̃riasiɗau ara mʉa biɗa kʉ̃ria nii kĩra. Mʉa biawãrabenadu kawasii religión ariɗe ɓuu, maabea mʉ bautizaɗa baɗa 1996ɗe Jeowaɗebena nibayua.

KÃARE BIA UNUƊE WÃSAA: 6 año basii mʉ kimabaraaɗa chi mukĩra mipitaa ãrĩã nii, ichi trʉ̃ Dmitry. Ãbua Betelɗe traja niɗau San Petersburgoɗe. Maaɗakare, mʉ akõrerãba ida ɓupeɗaaɗa mʉ kachirua jara unibapeɗaaɗa.

¡Mʉ kĩrajʉʉ ãrĩã nii Jeowa unusiiɗeeba! Ichi baita traja nii mʉ kĩrajʉʉ ãrĩã nia.

“Mʉ mistu ãrĩã kʉ̃risia ɓoosii” (RAUDEL RODRÍGUEZ RODRÍGUEZ)

AÑO NACEƊAƊEBENA: 1959

SÃMABENA: CUBA

ICHI Ʉ̃RɄBENA MAUCHA JARA ƁUU: ICHI CHI KĨRU ƁOOSII GOBIERNO OME

MɄ BIBLIA ESTUDIAI NAEƊE SAKA NIBASAA: Mʉ La Habanaɗe (Cuba) naceɗa baɗa mʉ veredaɗe ãrĩã poore ɓoosii mauɗe aria ãrĩã peleabachiɗau. Warr kai bẽe kiruuɗe chi yudo abadau ase karii basiɗau.

Mʉ escuelaɗe biʼia wãsii bẽrã, mʉ akõrerãba universidaɗaa wãi baita a jarasiɗaa. Aria empeza kʉ̃risia ɓoosii politicoba miadaa asesiɗauɗeeba, mauɗe mʉ ãrĩã kĩrubachii gobierno ome. Mʉ amiko omeeba chi pistola orroasiɗau policiarãmaa mauɗe ãchi boromaa usiɗauɗe kõpetasiɗau. Jãuɗeeba carcelɗaa bʉesiɗau mauɗe ãchia mʉ pistolaba beataɗai basii ¡20 años nibasiiɗe bera biui baɗa!.

Calabozoɗe ɓoosiiɗe ãrĩã kʉ̃risiabachia kãare asei baɗa mʉ beabudauɗe, mʉa unubiibasii mʉ ãchi kakua pera ɓoosii. Maka ɓumina mʉ sõɗe ãrĩã kʉ̃risia ɓoosii sakayua ãrĩã supribadaa ẽbẽrarã maebʉrã chi biʼia neeburubaaka.

BIBLIABA MɄ SAKA NIBAƊA KAMBIASAA: Jãabera policía jaraɗa baɗa mʉ beaɗaabai asiɗau maka ɓumina 30 años carcelɗe panaɗai basii. Carcelɗe unusii chi Jeowa ɗebena Jaranũrẽ, ãchia aria panasii ãchia politicaɗe mete kʉ̃riaɗaabasiiɗeeba. Ãchi kĩra ʉɓʉa nureasii, ãchia miadaa aseɗaabasmina ãchi kĩruɗaabasii.

Chi Jeowa ɗebena Jaranũrẽba mʉʉmaa kawabisiɗau Dachi Akõreba kʉ̃ria ɓuu chi biʼia ɓuudu ẽbẽrarã baita. Ichia nau iujãa kĩrawãrea ɓuuɗéburu kuɓuyu chi ẽbẽrarãba kachirua aseɗaabayua mauɗe chi ẽbẽra bia nureerã biuɗawẽa duanaɗayua (Salmo 37:29).

Mʉa bustabachii chi mʉʉmaa jaradea panuu, maka ɓumina mʉ ãchi kĩra nibaabasia. Kʉ̃risia ɓoosii ida ɓuebayu chi política adua jara nibayu, mauɗéburu du aɓa chi Biblia lea ɓeeɗa basia. Leaɗakare, kawaɗa baɗa chi Jeowa ɗebena Jaranũrẽrã jãarãburu ase nuree chi nabena cristianorã kĩra.

Biblia estudiasiiɗe kawasii ãrĩã́turu cambiayu. Beɗeawẽe basii beɗea miadaa jarawẽa. Mauɗe cigarrillo do nibayu siɗa ida ɓui basii maabae politicaɗe nibawẽa basia. Poyaawẽebai basmina, Jeowaba aiɗa ɓoosia mauɗe aseɗa basia.

Mʉ baita poyaawẽebai ɓoosii ida ɓuyu kĩru nibabariiɗebena. Wabiɗa ãrĩã wiɗibarii dachi Akõremaa mʉ aiɗabiyua mʉ kĩru nibaamaaba. Proverbios 16:32ba, ãrĩã aiɗa ɓuu: “Chi isa kĩrukau chi ẽbẽra ãrĩã poder bara nii kãyabara aude nii mauɗe chi kĩadarr kachirua nii ida kuɓuubarii ichíturu biʼia ãrĩã nii chi ẽbẽra chi puuru adaubariiɗeeba”.

1991ɗe mʉ bautizasii Jeowa ɗebena Jaranũrẽbariiɗe carcelɗe baldeɗe bania eɗa nuɓuuɗe. Mau kaaɗebena añoɗe, chi carcelɗebena awara bʉepeɗaaɗa mauɗe Españaɗaa bʉepeɗaaɗa mʉ deɗabena duanuurãmaa. Neeɗakare, reunionɗaa wã koɓeeɗa Jeowa ɗebena Jaranũrẽrãba ãchi amiko kĩra unibaɗe wãsiɗau maabae mʉ ãrĩã aiɗasiɗaa.

KÃARE BIA UNUƊE WÃSAA: Iɗibea mʉ mukĩra kĩrajʉʉ nibaɗe wãsia mauɗe Dachi Akõre baita traja nibaɗe wãsii mʉ wẽra mauɗe mʉ kaurã baare. Mʉ kĩrajʉʉ ãrĩã nii Bibliaɗebena ãrĩã jaradea niiɗeeba. Mʉ pasaɗa baɗa kʉ̃risiaburuuɗe mauɗe mʉ biukauɗaa mʉ kĩrajʉʉ nii chi biʼia ɓuudu unu bẽrã. Mʉ chokae nii mauɗe kuitaa niiba chi biʼia ɓuu neeburuu ãrĩã kʉ̃ria ɓuu chi iujãa Paraíso ɓeebiyua mauɗe “biui baɗa waa unuɗaabai” (Apocalipsis 21:​3, 4).

[Comentario]

“Mʉ corazonɗe ɓaesii kawasiiɗe Dios trʉ̃ bara nii”

[Foto]

Mʉ kima mʉ omeeba ãrĩã bustabadaa jaradeaɗayua kʉʉrʉ ũriɗaka ɓuu kirureerãmaa.