Mʉ Santodomingoɗe naceɗa baɗa, chi capital República Domicanaɗebena; mʉ chi kaaɗebena warr kimare bara ɓuu. Dai akõrerãba biʼia waribia kʉ̃ria nibasia ãchi kʉ̃risia choroma ãrĩã nureasiiɗeeba. Cuatro año mʉ nacei naeɗe ãchia misionero mormonɗebenarã unusiɗaa, ãchia ãrĩã bustasiɗau biʼia arreglaɗapeɗa jayoaswẽe nureaɗapeɗa mauɗe ẽbẽra biʼia kirureasiɗauɗeeba. Mau kaaɗe, mʉ deɗabenarã naa wãuchiɗau chi Iglesia mormonaɗaa maebʉrã chi Iglesia de Jesucristo de los Santos de los Últimos Diasɗaa República Dominicanaɗebenaɗe.

Mʉ chi Iglesiaɗe asebadauɗaa nibabarii basia, chi ãchia jaradeabadau deɗabenarã ome biʼia duanaɗai baita mauɗe ẽbẽra bia nibai baita ãrĩã bustabachia. Mʉa mormón nibayu ãrĩã kʉ̃riabachii mauɗeeburu misionero bai baita kʉ̃risiasia.

Mʉ 18 año baɗakare, mʉ deɗabenarã baare Estados Unidosɗaa ɓooɗe wã panasii Universidad biʼia ɓuuɗaa estudiayua. Aɓa año baɗakare, mʉ tiorã ãchi Jeowa ɗebena Jaranũrẽrãbʉ dai ochiaɗe neesiɗaa Floridaɗaa maabea jarasiɗaa asamblea Bibliaɗebena beɗeabudauɗaa wãɗayua. Mʉ ãrĩã bustabachii ẽbẽrarã joma chi texto biʼia jʉrʉbachiɗauɗeeba ãchi Bibliaɗe mauɗe ɓʉ adaubachiɗau maabea mʉa karta lapiceroɗeeɗa wiɗisia ara maka ɓʉ adauyua.

Asamblea acabaɗakare, mʉ tiorabã mʉʉmaa jarasiɗau mʉ misionero ba kʉ̃ria ɓuubʉrã ãchia aiɗa kʉ̃ria panasii Bibliaɗebena biʼia kawayua. Mʉʉmaa biʼia ɓoosia Libro Mormonɗebenadu aude kuitaa ɓoosii bẽrã Biblia kãyabara.

Ãchi wãpeɗaaɗakare Bibliaɗebena berrea bara ɓeesia telefonoɗeeba. Mʉʉmaa jarabachiɗaa chi mʉa ijãa nibaɗa Biblia ome biʼia ochiayua. Ãchia kʉ̃ria panasii ara mʉchia kawayua chi biawãrabena ɓuu.

Mʉ religionɗebena mʉa ijãa nibaɗa jãu biawãra kuitaa ɓoosii maka ɓumina mʉa adua basii jãu Biblia ome ariɗe ɓuu. Mʉ tiaba mʉʉmaa deabʉesii chi revista ¡Despertad! 8 de Noviembre 1995ɗe jãu Jeowa ɗebena Jaranũrẽrãba wau duanua, mama eɗa ome artículo religión mormonaɗebena beɗea ɓuu. Mʉa kuitaa koɓeesia mʉa adua baɗa jari mʉ iglesiaɗe jaradea ɓuuɗebena mauɗéburu dai página interneɗe ochiaɗe wãsii chi revistaba jara ɓuu biawãra jara ɓuu kuitaayua; maerã, biawãra baɗa. Museo mormonɗebenaɗaa estado Utahɗe ochiaɗe wã ɓoosiiɗe audeburu unusia mʉa jãu religionɗebena adua baɗa.

Mʉʉmaarã chi Biblia Libro Mormón ome ara aɓau ɓuu beɗea panua. Mʉ chi Biblia lea koɓeesiiɗe audeburu unusii ara aɓaudu beɗea panuuwẽe. Jari Ezequiel 18:4ɗe Bibliaba jara ɓuu dachi alma biubaria. Maka ɓumina Libro de Mormonba jara ɓuu Alma 42:9ɗe dachi alma biuka ɓuu nii.

Maubapeɗa kawayuswẽa koɓeesia ãchia ãchi paisdu ãrĩã kʉ̃riabadauɗeeba. Ãchia jarabadau Adán Eva baara duanabachiɗau iujãa ɓeesia puuru Jackson abadauɗe (Misuri, Estados Unidos). Mauɗe chi Iglesiaɗebena profetarãba jara panuuɗeebara “Dachi Akõre goberna koɓeeburuuɗe bandera Estados Unidosɗebena jiranui”.

Mʉa kʉ̃risia koɓeebachia nau joma pasaburuuɗe kãare pasai mʉ país mauɗe waabenarã siɗa. Earaɓa mʉʉmaa iusia ichi estudia kãri basii misionero bai baita, mau ʉ̃rʉbena berrea kopaneesia. Mʉa ichimaa naka wiɗisia: “Bichi país junebena ome guerraɗe niibʉrã, ¿bichi june mormón ome kenayua guerraɗe?”. Mʉʉmaa “maerã” aɗa basia. Waaburu jʉrʉ koɓeesia chi mʉ religionɗe jaradea panuu mauɗe chi Iglesiaɗebena líder mechia nureerãmaa wiɗi koɓeesia. Maabea ãchia mʉʉmaa jarasiɗau maarã iɗibea poyaa kawaabai ɓuu ɓoapeɗaburu kawayua.

Mʉʉmaa biʼia jaradeaɗaabasia. Kʉ̃risia koɓeesii sakayua misionero ba kʉ̃ria nibasia. Maabea kawasia mʉ baita jãu barikiau trajo kĩra ɓuu ẽbẽrarã aiɗai baita mauɗe mʉa bustasia jãu trajo aseburuuɗeeba waabenarã aude koɓooyu. Maamina ɓiɗĩikaburu kuitaa ɓoosia Dachi Akõre ʉ̃rʉbena. Textorã Bibliaɗebena ãrĩã lea ɓosmina, mʉa kʉ̃risiakabachii jãu librodu aude biʼia ɓuu barauɗeebiɗa. Mauɗe mʉa adua baɗa chi Dachi Akõreba nau iujãa mauɗe ẽbẽrarã baita kʉ̃ria ɓuuɗebena.

Jeowa ɗebena Jaranũrẽabarii ome Bibliaɗebena estudiaburuuba ãrĩã kawa ɓoosia: sãu Dachi Akõre trʉ̃, dachi biupeɗaaɗakare kãare pasa ɓua mauɗe sakayua Jesús biusii... Jãabaeburu unu kawasia nau libro kĩrawãrea ãrĩã ɓuu, ¡mʉa chi ariɗe ɓuu kawa kãriɗebena waabenarãmaa jarayu ãrĩã bustabachia! Mʉa Dios nii kuitaa ɓoosia, jãabeaburu ʉtaa wiɗi ɓua kĩrabara amiko biʼia kiruu ome berrearuu kĩraka. 12 julio 2004ɗebenaɗe mʉ bautizasia Jeowaɗebena Jara nibabarii bayua mauɗe seis meses baɗakare mʉ precursor basii.

Mʉ cinco añosɗe traja nibasii chi Betel principal Jeowa ɗebena Jaranũrẽrãɗe Brooklynɗe (Nueva York). Mʉ kĩrajʉʉ ãrĩã aiɗa nibasii Biblia mauɗe waabenarã kartarã siɗa waukayu baita, jãuɗeeba ẽbẽrarã joma nau iujãaɗebenarã kawaɗai ɓua. ¡Mʉ kĩrajʉʉ ãrĩã nibabaria año ãrĩã baburuu mauɗe mʉ joma nau añoraɗe waabenarã aiɗa ɓuuɗeeba Dachi Akõre ʉ̃rʉbena kawabiayua!