Finca mʉ akõrerãba unibasiɗauɗe naceɗa baɗa Españaɗe. Mʉ 8 warrarãɗebena mʉ chi kimareɗebenabʉ dai deɗabenarã kĩrajʉʉ ãrĩã nureaɗaa. Makaeɗe maarãɗebena chi warr aɓa conventoɗaa wãbasii, dai deɗabena õbea wãpeɗaaɗa.

Trece año niiɗe conventoɗaa wãsii Madridɗebenaɗe, mʉ nawekau jãma ɓoosii. Jamaria ãchi chiya kʉ̃riaɗakabasia, ara ãchi chiya amikorã wãʼãe basia. Jãma daimaa kosarã aseɗai baita obligabachiɗaa, ʉrsaɗapeɗa maabea kosarã ãrĩã uniɗaabai basiɗaa, chibʉrʉbachiɗaa capillaɗe jamaria kauwa kʉ̃risiai basia, mau mʉ baita chaarea ãrĩã ɓoobaɗaa. Maabea chi religionɗebena kãribachiɗau mauɗe misaɗaa wãuribachiɗau. Ãchi beɗea latinɗéburu beɗeabachiɗau bẽrã mʉa akawa ũrikabasia, mʉ kʉ̃risiaɗeeba Dachi Akõre mʉ ome kaita ɓoobasii. Ewariiruucha chũpeaburu duanabachiɗaa. Mʉ nawekau ome unubudauɗe nadu beɗeabachiɗaa “Ave María purísima”. Media horadu deasiɗau bedeaɗai baita akawa kopeɗaaɗakare. Mʉ deɗabena omerã kĩrajʉʉ ãrĩã nureabachiɗaa mʉ akawa du aɓa ɓeepeɗa bari jẽa nibaɗe wãɗaa.

Bariara mʉ Dachi Akõre kaita sentiibasmina, mʉa monja paru jũpeɗa maabea monja baɗaa mʉ 17 año nibasii. Mʉ jãka asesii chi ẽbẽrarãba kʉ̃ria panasii mʉ jãkabibayua. Maabea mʉa kʉ̃riasii wãrabena jãka ase kʉ̃ria nibaabasii. Chi monjarãba jarabachiɗau chi aɓa nii ẽbẽraba kʉ̃risiawẽebʉrã chi wãrabena ɓuu kawamaa ɓuu, infiernoɗaa wãɗayu. Maka ɓumina mʉa waaburu kʉ̃risia ɓeesii jãu wãrabenabʉ o makawẽe ɓuu, mʉa kuitaa ɓoosii Jesús akawa du aɓara nibaabaɗa maka basii ichi ẽbẽra jʉ̃kaaburu nibapeɗa ẽbẽrarã aiɗaidu nibasii (Mateo 4:​23-​25). 20 año nibasiiɗe kʉ̃riasii jãabera mauchaburu monja nibaabayu kʉ̃risiaɗa. Chi monja mandabarii niiba mʉʉmaa jarasii kʉ̃risia niibʉrã nau wãrabenawẽe ɓuubʉrã isa wã́baɗa aɗa, maabeaburu chi convento ɓuisii. Mʉʉɗeebara ichi pera nii basii mʉa waabenarãmaa ara jãka kʉ̃risiabii baɗa.

Mʉ deeɗaa neesiiɗe mʉ akõrerãba mʉ biʼia adoepeɗaaɗa. Puruuɗe trajai baita wãʼãe baɗa bẽrã mʉ Alemaniaɗaa wãsii, jamaria aɓa mʉ ãbarãɗebena bibi nibaɗa. Ichi grupo politicorãɗebena basii Españaɗebena sacapeɗaaɗa. Mʉa bustabachi nibayu ẽbẽrarã chĩobachiɗau chi trajadorna biʼia nureaɗayu baitabena baara, mʉa bustabachi nibayu berekabadau chi wẽrarã mukĩrarã baara araɓau nureabiɗai baitabena baara, mʉ ara jãarã gruporã baara ãbua nibaɗe wãɗaa maabea mʉ kimabaraasii chi mukĩra ara jãarã ome nii baara. Deɗekabachii papelna ara jãarã ʉ̃rʉbena beɗea ɓeerãɗebena, wãbachii mingaɗaa biɗa. Mʉa kʉ̃riabachii chi trajo biʼia ɓee asebudauɗebena.

Maabea, maucha jãu trajo ase kʉ̃riaabasii. Mʉa kʉ̃risiasii jãarã politicorãba chi kawabi panuu aseɗakabachiɗau. Mʉa aude kʉ̃risiasii jãuɗe 1971ɗe basii, kũudrãarã dai grupoɗebenarãba aokotapeɗaaɗa baɗa chi oficina Fráncfortɗe koɓooɗa chi kosarã kachirua ɓee asepeɗaaɗa baɗa kakua chi gobierno Españaɗebenaba. Mʉa kʉ̃risiasii jãka chĩoɗai baita jãu kakua biʼiwẽe ɓooɗa baɗa.

Dai warr chi naabena nacesiiɗe, mʉa jaraɗa mʉ kimamaa waya wãabai reunión jãu grupoɗebenamaa. Du aɓa ãrĩã sentiɗa baɗa, mʉ mauɗe mʉ wãwa baara amiko ni aɓa biɗa ochiaabasii. Mʉ du aɓa kʉ̃risiasii ¿Sakaẽra nama panuu? ¿Dachi Akõreba sakaẽra dai wauɗa baɗa? ¿Wãrabena biʼia ɓubaaka aiɗayu ẽbẽra biʼia nureabii baita?

1976ɗe Jeowa ɗebena Jaranũrẽrã Españaɗebenaba mʉ deemaa wãpeɗa mauɗe deasiɗau chi karta Bibliaɗebena mʉʉmaa. Ãchia waya neesiɗauɗe, mʉ ãrĩã wiɗi koɓeeɗa baɗa chi sufri panuu mauɗe chi kachirua ẽbẽra pasabadauɗebena. Ãchia joma Bibliaɗeeba panausiɗau. Ara nauɗe Bibliaɗebena kawa koɓeesii.

Naeɗeeda mʉ Bibliaɗebena kawayuaburu baɗa maabae makawẽabasii mʉ kima ome wã kopanesiɗauɗe reunionɗaa ũriɗai baita Jeowa ɗebena Jaranũrẽrã ome. Dai warrarã ome unibachiɗau. Chi Jeowa ɗebena Jaranũrẽ Deemaa odoebachiɗau mauɗe reunión ũri panuumisa dai warrarã ochia uabachiɗau. Mʉ ãchi ome ãrĩã kʉ̃ria nibaɗe wãsii.

Abiɗa maucha kawai basia. Mʉ Españaɗaa mʉ deɗabena ochiaɗe wãsiiɗe, mʉ tio sacerdote niiiba, ida ɓuibi kʉ̃ria ɓoosii Bibliaɗebena kawabimaaba, maka ɓumina chi ãba chekerã jamaribena ãrĩã aiɗasiɗaa mʉʉmaa. Mauɗe chi ãba chekerã Alemaniaɗebena ase ɓoosiɗau kĩraka mʉ kawabisiɗau Bibliaɗeeba. Mʉ deɗaa wãruuɗe waya Bibliaɗebena kawa kʉ̃ria ɓoosia. Mʉ kimaba maucha kawa kʉ̃riawẽe ɓoosiimina, mʉʉra maucha kawa kʉ̃ria koɓeesii. 1978ɗe bautizapeɗa mauɗe Jeowaɗebena jara nibaɗe wãsii.

Bibliaɗebena kauwa kawa ɓuuɗeeba mʉ kĩrajʉʉ ãrĩã nibai ɓuu. Por ejemplo, 1 Pedro 3:1-4 jara ɓuuba chi wẽrarã ãchi kimarã beɗea ijãaɗapeɗa mauɗe ãrĩã respetaɗapeɗa kĩruwẽa nureaɗayua “jãdu aude vale ɓua Dachi Akõre baita”. Mauba ãrĩã aiɗabarii wẽra biʼia nibapeɗa mauɗe nawe biʼia nibayua.

35 año basii, Jeowa baita traja nii. Mʉ kĩrajʉʉ ãrĩã nii ãba chekerã congregacionɗebena ome ãbua duanuuba, Dachi Akõre baita ãchi baree traja panuu mauɗe mʉ 5 warrarã bara nii, ãchiɗebena kimare mʉ kĩraka Jeowa baita trajabadauɗeeba.