Mʉ Szekesfehervarɗe naceɗaa, puuru naeɗeeɗabena Hungriaɗebena. Segunda Guerra Mundialba mʉ kʉ̃risiaɗe ɓeesii miachuburi ɓuu.

Mʉ Papitorã baara wariɗa baɗa. Mʉa ãchi chi kʉ̃ria ãrĩã inibasii mauɗe aude kʉ̃ria nibasii mʉ mamita Elisabeth. Ichia mʉʉmaa kawabiɗa Dachi Akõreɗe ijãa nibayu. Tres años nibasiiɗeeɗa ẽsebuɗaa ara chi jara ɓúturu jarabibachii Padrenuestro. Mʉ 30 año cumplisiiɗaa kawasii kãareɗebenáturu Dachi Akõremaa wiɗi nibaɗa.

Mʉ papitorãba mʉ ɓiɗĩika nibasiiɗeeɗa ochia ua nibaɗe wãpeɗaaɗa, mʉ akõrerã chi día joma trajabachiɗau bẽrã, ãchia nejarr guardamaa panaɗa de nedoɗai baita. Semana omeecha joma deɗabena chibʉrʉbachiɗau ãbua koɗayua, jãu kʉ̃risiaruuba mʉ ãrĩã kĩrajʉʉ nibabarii.

1958ɗe mʉ akõrerãba nedosiɗau chi de ãrĩã kʉ̃ria nibapeɗaaɗa, jãabera mʉ akõrerã baara vivi nibaɗe wã ɓoosii, mʉ jãuɗeeba kĩrajʉʉ ãrĩã nibasmina, seis mes baaruuɗe mʉ akõre biuɗa baɗa cancerba.

Jãuɗeeba mʉ eɗare chi pua ãrĩã ɓeeɗa baɗa. Mʉa jaraɗa basii Dachi Akõremaa: “Mʉa bichimaa ʉtaa wiɗiɗa baɗa mʉ akõre karibayua. ¡Mʉa mʉ akõre ãrĩã nesita ɓuu! ¿Sakãera ũriibasma? aɗa baɗa. Mʉa ãrĩã kawa kʉ̃ria ɓoosii sama ɓuu mʉ akõre, ¿bajãaɗaa wãsẽe maebʉrã akawa nau iujãaɗe nii wãe?”. Mʉ ãrĩã nomaa nibapeɗa mʉa bustawẽebaɗa junebena warrarã chi akõre chokae unureeɗeeba.

Mʉ cementerioɗaa noremaacha wãbachia. Mʉ akõre tumbaɗe õdarrɗe koɓeepeɗa naka ʉtaa wiɗibachia: “Dada muchuburia, mʉa kuitaa kʉ̃ria ɓuu mʉ akõre sama ɓuu”. Mauɗe mʉa kuitaa kʉ̃ria ɓoosii sakayua dai chokae nuree, mau ʉ̃rʉbena ʉtaa wiɗibachia Dachi Akõremaa.

13 años niiɗe alemán beɗea kuitaa koɓeesii, librorã jãu beɗeaɗe jʉrʉpeɗa kawai baita, chi mʉa Dachi Akõremaa wiɗiɗa baɗa ʉ̃rʉbena. 1967ɗe puuru Jenaɗaa estudiaɗe wã ɓoosii, ara jãu diaɗe jãu puuru Alemania orientalɗe ɓoosia. Chi kuitaa nureerã Alemaniaɗebenaba ɓʉpeɗaaɗa baɗa sakayua ẽbẽrarã chokae nuree ʉ̃rʉbena, jãu ãrĩãdu leabachia. Mʉa ãrĩã kawa ɓosmina, chi mʉa kawa kʉ̃ria ɓoosiira, poyaa kawaabasia. Jãu ʉ̃rʉbena waaburu Dachi Akõremaa ʉtaa wiɗibachia.

1970ɗe mʉ Hungriaɗaa jĩɗaa wã ɓoosii, jãma mʉ kima Rose unuɗa. Ara jãu diaɗe, Hungriaɗe gobierno comunista ɓoosia, jãuɗeeba kimabaraapeɗaaɗakare Austriaɗaa miru wã panasii. Daiba wã kʉ̃ria panasiɗau Sydneyɗaa, Australiaɗe, mʉ tío ɓoabachiimare.

Maamina Austriaɗeburu mʉa trajo unuɗa baɗa. Aria kõpaero aɓa niiba jara ɓoosii Bibliaba kawabii ɓua chi mʉa kawa kʉ̃ria ɓuu ʉ̃rʉbena, maabea libro Bibliaɗebena beɗea ɓeerã ome ɓuu deaɗa baɗa. Ara jãu diaɗe joma leatasii, maamina aude kawa kʉ̃ria ɓoosiiɗeeba, jãu libro ɓʉpeɗaaɗarãmaa, chi Jeowa ɗebena Jaranũrẽrãmaa, karta ɓʉ ɓooɗa baɗa librorã, kartarã siɗa mʉʉmaa bʉei baita.

Dai kimabaraasiɗau año baɗakare, dai deemaa Jeowaɗebena Jara nii nee ɓoosii. Chi mʉa kartarã wiɗiɗa baɗa, ichia anee ɓoosii mauɗe Bibliaɗebena daimaa kawabiɗai aɗa baɗa. Ara mama mʉa maera aɗa basma. Jãuɗebena ãrĩã kawa kʉ̃ria ɓoosiiɗeeba, semanacha dos ɓesɗe estudiabachiɗau.

Kĩrajʉʉ ãrĩã ɓoosia Jeowaɗebena Jaranũrẽrãba mʉʉmaa kawabisiɗau Bibliaɗeeba. Ãchia chi Dachi Akõre trʉ̃ mʉ Bibliaɗe húngaro beɗeaɗe unubisiɗauɗe, jãu mʉ corazonɗe ɓaeɗaa. 27 años misaɗaa wãbachmina, Dachi Akõre trʉ̃, Jeowa ʉ̃rʉbena ũrikabasia, mau sakaba aɗa basia mʉa jãu kawasiiɗe chi Bibliaba ariɗe jara kuɓuu ʉ̃rʉbena. Mʉa kawaɗa baɗa chi biupeɗaaɗa kʉ̃risiaswẽa duanua, kĩrabara kãi nuɓuuka duanuu (Eclesiastés 9:​5, 10; Juan 11:11-​15). Mauɗe kawasia nau iujãa chi wiɗiɗe babiirua mama aria “biui baɗa waa unuɗaabai” (Apocalipsis 21:​3, 4). Jãabera kuitaa ɓua “chi biupeɗaaɗarã waya piradrukuayua” nau iujãa chi wiɗi ɓuuɗe jamaria mʉ akõre biuɗa baɗa waya unuyua (Hechos 24:15).

Roseba joma corazonɗeeba mʉ aiɗasia. Dos mesɗe chi libro joma isa estudiasiɗau. Joma chi reunión Jeowa ɗebena Jaranũrerãɗaa wã kopaneesia, daiba ãrĩã bustasiɗau ãchia dai biʼia irsibiɗapeɗa, kʉ̃riaɗapeɗa mauɗe ãbua duanuu (Juan 13:34, 35).

1976ɗe daimaa permiso deasiɗau Australiaɗaa ɓooɗe wãɗayua. Aria bapeɗaaɗakare jʉrʉ panasii chi Jeowaɗebena Jaranũrẽrã mauɗe ãchia dai biʼia irsibisiɗau. 1978ɗe dai Jeowa ɗebena Jaranũrẽ basiɗau.

Jãabaeburu mʉa kawasia naeɗeeɗa kawa kʉ̃ria nibaɗa mauɗe mʉa unu kawasia chi Akõre aude biʼia nii barauɗebena: Jeowa (Santiago 4:8). Mauɗe jãabera mʉa waya unu kʉ̃ria ɓuu mʉ akõre biu ɓooɗa baɗa iujãa mipitaa kiruuɗe Dachi Akõreba deai aɗa baɗaɗe (Juan 5:​28, 29).

1989ɗe, dai Hungriaɗaa waya wãi kʉ̃risiasiɗaa beɗeaɗayua daiba ijãa nureeɗebena dai deɗabenarãmaa, amikorãmaa mauɗe waabenarã ẽbẽrarãmaa biɗa. Ẽbẽrarã aribiaurãmaa daiba kĩrajʉʉ ãrĩã kawabiapeɗaaɗa. Maarãɗebena setenta wãyaa Jeowaɗebena Jaranũrẽ basiɗau, mauɗe mʉ dana kʉ̃ria ãrĩã nii siɗa.

Mʉ 17 año basii Dachi Akõremaa ʉtaa wiɗi baɗa mauɗe mʉʉmaa kawabiyua chi naeɗeeɗa kawa kʉ̃ria nibaɗaɗebena. Jãabera 39 año basii ichia mʉʉmaa kawabiɗaɗeeɗebena. Iɗiiɗaa biɗa ara maka ʉtaa wiɗi ɓoobaria, jãabera mʉa nadu jarakeraabaria: “Ara kiruma, Akõre ʉtarebena, mʉ kũudrãa nibasiiɗe bichimaa ʉtaa wiɗi nibaɗa mʉʉmaa panausiiɗeeba”.