Mʉ puuru choroma Los Ángeles (California, Estados Unidos) abadauɗebena barrio poore ãrĩã kiruuɗe naceɗa baɗa, jãma aria ãrĩã nejarr nedobʉebadau mauɗe pandilla oɗebena siɗa ãrĩãma. Dairã seis warrarãɗebena mʉ chi ome basia.

Mʉ chuburi niiɗe, mʉ naweba iglesia evangelicaɗaa uaɗobachia. Maamina mʉ kũudrãa baɗakare, chi aria jarabudau mʉ kʉʉrʉ aɓare neepeɗa aɓabenare wãbachii. Domingocha mʉ chi coro iglesiaɗebenaɗe karibachia, maamina semanaɗe mʉ fiestarãɗaa wãpeɗa, mʉa chi droga ũupeɗa, mauɗe wẽrarã ome biɗa kãi ɓeebachia.

Mʉa puʼua ãrĩã asebachii maabea barikiau kakua peliabachia. Barikiau juaɗe ɓeeburuuba mʉa kĩrabara arma kĩraburu adaubachia, chi pelea kuɓuuɗe kanayua. Mʉa chi iglesiaɗe kawaɗa baɗa ãrĩã aiɗaabasia mʉ. Mʉa naka jarabachia: “Chi miadaa ase ɓuu Señorba kastikayua, mauɗe mʉa ichi baita traja ɓua”. Años 60 acabai naeɗe, mʉ 18 años nibasiiɗe, ãrĩã bustabachia chi politicorã Panteras Negras abadauba jarabudau, ãchi naarã unubachiɗau chi ẽbẽrarã derecho kakua luchabadau bẽrã. Mʉ wãɗa baɗa chi grupo estudianterã ome ãchirã ara naarã kĩra asebadauɗeeba. Ãrĩã asebachiɗau daiba minkarã, mau kakua chi escuelaɗe clase deaɗakabachia.

Maamina naarã mʉ baita ariɗe ɓoobasia. Waarã iadaa kakua mʉa ne joma miadaa ɓee aseɗe wãɗaa. Mʉ amikorã mʉ baare cineɗaa wãbachiɗau chi película ochiaɗe wãɗayua jari aɓabena puʼua waubudau chi esclavo Africaɗebenarã Estados Unidosɗe. Dai ãrĩã kĩrupeɗaaɗa baɗa chi jãu jãka puʼua ase panuu unupeɗaaɗa kakua, mauɗeeba daiba chi kapuniarã torrna puʼua waukapeɗaaɗa chi cineɗe duanuurã mauɗe barriorãɗaa biɗa wãbachiɗau chi kapunia torrna jʉrʉɗe audeburu sĩɗikaɗayua.

Makaeɗe, mʉ ãbarã mʉ omeeba ne joma miadaa asepeɗaaɗa baɗa mauɗe problema siɗa ãrĩã bara duanasia policiarã ome. Aɓa mʉ ãba chekerãɗebena kaebeau pandilla kachirua ãrĩã ɓuuɗe ɓoosia maabea mʉ maarã ome meraabachii. Mʉ aude miadaa kãribaɗe wã ɓoosia

Mʉ amiko akõrerã Jeowa ɗebena Jaranũrẽrã basia maabea ãchi reunionɗaa odoepeɗaaɗaa. Chi nabenaɗe mʉ wãsiiɗe kuitaaɗa baɗa joma aria diwara nureasii chi ẽbẽrarã. Jomaurãba Biblia ira ɓeasia maabea lea panuu unusia. ¡Chi aude kũudrãa kirureerã reunionɗe beɗea duanuu unusia! Mʉ ãrĩã peraaruuka sentiɗa baɗa chi Dachi Akõre trʉ̃ Jeowa asiɗauɗe, maabea ãchia trʉ̃ jara panasii ichi ʉ̃rʉbena jarabudauɗe (Salmo 83:18). Ẽbẽrarã puuru choroma ãrĩãɗebena duanasmina, ariɗe unu ɓoosia ãchi chiya iadaa duanaɗaabasii.

Naeɗeeɗara, mʉa chi Bibliaɗebena jaradeabi kʉ̃riabasii. Maamina chi reunionɗaa wãi ãrĩã bustabachii. Ẽsebuɗaa, dai reunionɗe duanuumisa chi nuree mʉ amikorãɗebena música chaabudauɗaa wãuchiɗau, aria mukĩra warr uɗapeɗa beatasiɗau ichi chaqueta paka eeba wau ɓuu ẽebariɗayua. Mau norema ãchia kĩrajʉʉ beɗea panasia chi kãare asepeɗaaɗa baɗa. Chi juicioɗe biɗa kĩrabara waweaɗaabai kĩra duanasia. Kabanaurãmaa ãchi carcelɗe biubudauɗaa duaneeɗai jarasiɗau. Mʉ ãrĩã kĩrajʉʉɗa baɗa ãchi baare wãabaɗa bẽrã. Mʉa kʉ̃risiaɗa baɗa ɓuiyu chi naeɗebena baɗa maabea chi Biblia estudia ɓeesii.

Mʉa chi iadaabas bẽrã mʉ razaɗebenawẽe, chi Jeowa ɗebena Jaranũrẽrãba ase panuu ãrĩã bustasia. Jeowa ɗebena Jara nibabarii kapunia chi torrba ichi puuru kaitawẽebenaɗaa wãaruuɗeeba, ichi wãwarã de aɓa kiruuɗe joma paimaa kirureerã juaɗe ɓuiɗa basia. Mauɗe, aɓa kiruu deɗebena kapunia chi torrnaba kũudrãa paimaa kiɗii irsibipeɗaaɗa baɗa ãchi deɗe chi sama ɓooyu unuwẽeɗeeba. Jãuba mʉʉmaa ijãabisia chi Jeowa ɗebena Jaranũrẽrãba ãchia asebadau Jesusba jara ɓuu kĩra Juan 13:35ɗe: “Makaburu jomaurãba kuitaaɗayua machi mʉ kaaɗe ãda nureabarii: machi chiya kʉ̃ria panuubʉrã”. Mʉa kawaɗa baɗa jãmaburu ãbachekerã arikʉɗe nuree unusii.

Chi mʉa Bibliaɗebena kawasiiba, mʉa kuitaasia ida ɓuyu mʉ naeɗebena baɗa. Mʉ ãrĩã berekaɗa baɗa ẽbẽrarã ome biʼia nibayurawẽe, bari biʼia nibayua mʉ eɗareeɗa (Romanos 12:2). Bikãa mʉ aude biʼia kãribaɗe wãɗa baɗa, mauɗe akawara, enero de 1974ɗe, mʉ bautizapeɗa maabea Jeowa ɗebena Jara nibabarii basii.

Mʉ bautizaɗakare, ara jãka bereka koɓeeɗa baɗa ara ɓiɗĩikaɗeeba kĩru nibaamaaba. Ɓes aɓa de ɓuumaa wãusiɗau ẽbẽrarãmaa jaradeaɗe, maabea mʉa unusii chi orroabarii niiba radio mʉ carroɗebena odoeɗa baɗa. Mʉ ichi kaaɗe pira wãsii. Mʉa ichi jidauburuu dauchia, chi radio jirataɗa basia maabea pira wãɗa basma. Ãbarãmaa mʉa jarasiiɗe saka waya adausii mʉ radio, ãba aɓa kuitaa ãrĩã niiba mʉʉmaa jarasii: “¿Kãare asei basaa bichia jidauɗa basirã?”. Jãuba mʉʉmaa kʉ̃risiabisii waaburu ida ɓuyu mʉ naeɗe nibaɗa.

Octubre 1974ɗe, mʉa jaradeɗekaɗe nibaɗe wãɗa mau bari. Ẽbẽrarãmaa kawabia koɓeesii Bibliaɗebena 100 hora aude. Maaɗakare mʉ iusiɗau trajayua chi central Jeowa ɗebena Jaranũrẽrãɗeɗe Brooklynɗe (Nueva York). 1978ɗe waya neesii puuru Los Angelesɗaa mʉ dana ẽpermo ɓuu cuidayua. Dos años baɗakare, mʉ kimabaraaɗa baɗa Aarhonda ome. Ichia mʉ ãrĩã aiɗasii mʉ dana cuidayua aɓa ichi biusiiɗaa. Maaɗakare dai invitasiɗau Escuela Bíblica de Galaadɗaa Watchtowerɗebena. Chi escuela acabaɗakare, dai Panamaɗaa bʉesiɗau misionero kĩraka, iɗiiɗaa aria niɗau.

Mʉ bautizaɗakare, abiɗa bereka nii mʉ ara ɓiɗĩikauba kĩru nibaamaaba. Mʉ ãyaa wãbarii pelea nibaamaaba maebʉrã biʼia kʉ̃risiabarii chi problema solucionayua. Ẽbẽrarã ãrĩãrãba, mʉ wẽra biɗa felicitabarii mʉchi ase niiɗeeba. Ara mʉchi du aɓa biɗa kĩrajʉʉbarii mʉchi ase nii kakua. Mʉa kʉ̃risiabarii ara mʉchiɗeebara cambiabasii. Mʉ kʉ̃risiamaara chi Biblia poder ãrĩã bara ɓuu chi ẽbẽrarã ida ɓubiyua chi naeɗe nureapeɗaaɗa baɗa. (Hebreos 4:12).

Bibliaba mʉ aiɗa ɓuu kĩrajʉʉ nibabiyua, kawabi ɓuu jãabea biʼia nibayua peleayuswẽa. Jãabera waabenarã siɗa drʉdukakau bari aiɗabarii ẽbẽrarã Dachi Akõreɗebena kawabiayua. Bibliaɗebena kawabisii aɓa nii mʉ ome pelea ãrĩã nibaɗamaa. Ichi bautizaɗakare ara aɓa ɓuu deeɗe vivi paneeɗa baɗa, jãabea iɗiiɗaara dai amiko biʼia basiɗau. Iɗiiɗaa, mʉ wẽra omeerãba aiɗasiɗau ochenta ẽbẽrarã Jeowa ɗebena Jaranũrẽ babiɗayua.

Mʉa Jeowamaa ara kiruma abarii mʉ kĩrajʉʉ nibabisiiɗeeba ãbarã biawãra nureerã ome.