Mʉ Paddington, Londresɗe (Inglaterra) naseɗabaɗa, mama aria ẽbẽrarã ãrĩã bibi duanabarii. Mʉ dana mauɗe mʉ nawekaurã nureerã baara bibi nibasii. Mʉ akõre neei kʉ̃riaburuuɗeburu neeɓoosii mauɗe ichia itua ãrĩã dobarii nibasma.

Mʉ chuburi ãrĩã nibasiiɗe, mʉ danaba ẽsabuɗaacha ãrĩã wiɗi ɓee nibasia. Mauɗe mʉ Biblia unibasmina biɗĩika kiruudu mau Salmosdu bara ɓoosii mauɗe mʉ karibasia. Mʉa nau leasii chi libroɗebena: “Wãʼãe bayua uruɗebena siɗa” a jara ɓooɗabaɗa. Mʉ mau leasiiɗe kãiɗekabasia ẽsebuɗe maabea kʉ̃risia koɓeeruuɗe chi uruyuɗebena. Mʉa kʉ̃risiasia: “Nau bida ara aɓadu ɓuuwẽeɗe. ¿Mʉa kãare ase nia?”. ¡Mʉ biui kʉ̃riawẽe nibasii!

Mʉa jari jaurirãɗebena kawa kʉ̃ria nibasii. Mauɗeeburu mʉ biu ɓeerã ome beɗea kʉ̃ria nibasia maabea mʉ cementerioɗaa wãɗabaɗa mʉ amikorã eskuelaɗebena ome. Maubapeɗa maarã ome pelikularã dachi perabibariiɗebena ochia duaneebasia. Jãuba dachi ãrĩã perabipeɗa abarii maamina mʉa bustabachia.

Mauɗe mʉ ʉ̃rãburu 10 año basiiɗe mʉ o biʼiwẽe ɓuuɗe nibaɗe wãɗa. Maabea mʉ tabaco dopeɗa ara mau ome nibaɗe wãɗa bustapeɗa. Makʉ ɓuuɗe nejarr siɗa doɗabaɗa. 11 año baruuɗe itua ãrĩã dopeɗa maabea mʉ itua biuɗe basii bariara mʉa bustawẽa nibasii siɗa saka ɓuu. Música ãrĩã bustapeɗa maabea baerabasia, maabea mʉ piesta discotecarãɗaa wã kʉ̃riabasia. Mau ẽsabuɗaa mʉ miru wãpeɗa mauɗe ewariburuuɗeburu deeɗa neesii kawabiayuwẽe. Mau norema mʉ ãrĩã kãsa ewaripeɗa escuelaɗaa wãwẽebaɗa. Mauɗe escuelɗaa wãburuuɗe ãrĩã itua dopeɗa.

Chi año akababuruu mʉ biʼiwẽe wãpeɗa calificacionɗe. Mʉ danaba kuitaawẽe ɓoosii bẽrã mʉ ãrĩã miadaa ase nibasii, ichi ãrĩã nomaapeɗa maabea mʉ ome mechibena kĩruɗabaɗa. Dai ãrĩã kĩruɗapeɗa maabea mʉ deeɗebena wãɗa. Mau aribia ba ɓoosii mʉ Tony, mʉ novio ome bibiɗeeɗa ichi rastafari abadau basma. Ichi orroapeɗa maabea droka abadau nedobʉi nibaɗa ichi kĩru ãrĩã nibaɗa. Maaɗakare mʉ 16 año niiɗe mʉ warr nabena adauɗaa.

Mauɗe mʉ bibi nibasiimare chi nawerã warrarã adaukuapeɗaaɗa baara kimaswẽe nuree mamaburu mʉa chi Jeowa ɗebena jaranũrẽrã unuɗabaɗa. Kobiernoba mʉ aiɗaɗabasia mama aria bibi niba bẽrã. Wẽra ome niɗau chi Jeowa ɗebena jaranũrẽrãba nawerã aria bibi nureerã ochiaɗe imibasiɗau. Mauɗe mʉa ochiaɗabasii chi maarãba jarabudauɗe maabea mʉ kʉ̃risiamaa ãchia ariɗe jaraabasiɗau kawayua. Maabea ãchia mʉa wiɗikasii biʼia panauɗapeɗa maabea dachia entendeiɗe jarapeɗaaɗabaɗa chi Bibliaburu jaraɗapeɗa. Maabea ãchia mipitaa ãrĩã kawabisiɗau mau mʉa ãrĩã bustaɗabasii. Mauɗeeburu ãchi ome mʉ Biblia estudia kʉ̃riaɗabasii.

Mʉa kawasii chi Bibliaɗe jara ɓuu mauba mʉ bida ãrĩã kambiabisii. Chuburi niiɗeeɗa mʉ ãrĩã perabachii biuyu baita, maabea kawasii Jesusba jaraɗabaɗa dachi biupeɗaaɗabaɗa waya piradrukuaɗayuɗebena (Juan 5:28, 29). Mauɗe mʉa kawasii Dachi Akõreba mʉ kuida nii (1 Pedro 5:7). Jari Jeremías 29:11ba jaraɗabaɗa mʉ korason baita neesia. Jãma jara ɓuu: “Mʉa mʉ kʉ̃risiaɗe kuitaa ɓuu kãare asei machi ome. Machirã pasɗe duanaɗai kʉ̃ria ɓua maamina mia chuburia akʉ duanabiimaaba. Mʉa machi biʼia duanabia kʉ̃ria ɓua mauɗe chi kosa bia uruburuu esperabiai baita kʉ̃ria ɓua”. Maabeaburu mʉa ijãasii chi biuɗawẽa iujãaɗe bibiɗai ɓuu (Salmo 37:29).

Chi Jeowa ɗebena jaranũrẽrãba mʉ chi kʉ̃riasiɗau. Mʉ wãsii diaɗe chi reunionɗaa mʉʉmaa mipitaa ãrĩã ɓoosia. Jomaurã ẽbẽra biarã basia (Juan 13:34, 35). ¡Mʉʉmaa iklesiaɗe unubipeɗaaɗaɗeeba ãyaa ɓuu unuɗabasia! Chi Jeowa ɗebena jaranũrẽrãba ãyaa kʉ̃risiaɗaabasiɗau mʉ pasa nibaɗa kakua. Ãchirãba mʉ chi kʉ̃riaɗapeɗa maabea mʉ aiɗasiɗaa. Mauba mʉʉmaa dachi deeɗabena mechibena duanuu bara ɓuu kĩraka sentibipeɗaaɗabasia.

Mʉ chi Biblia estudiasiiɗe, ãrĩã bustaɗabasia maabea dachi bida kambiayu Dachi Akõreba kʉ̃riayua. Maka ɓuumina mʉ chi tabaco dobarii ɓui poyaawẽe ɓoosia. Maubapeɗa ɓoosia música mʉa ãrĩã bustaɗabaɗa chi nejarr doyu baita, maabea mʉa música ãyaa ɓuu ũri koɓeesii. Maabea mʉ ida ɓuesii chi discotecarãɗaa wãi baita, mama aria itua do kʉ̃riaɗabaɗa kakua. Maabea amikorã jʉrʉɗabaɗa mʉ aiɗaɗayua chi biʼia ɓuudu aseɗayua (Proverbios 13:20).

Mauɗe Tony siɗa chi Biblia empesa kawasii chi Jeowa ɗebena jaranũrẽ ome. Ichimaa chi Bibliaɗebena jaradea kopaneesiiɗe, kawasii chi warãbena ɓuudu, mauɗeeba ichi ãrĩã kambiapeɗa, maabea waabenarã chĩo ãrĩã nureerã baare nibaabasii mauɗe ichi ne orroabaribapeɗa mauɗe nejarr dobariibaɗa siɗa ida ɓuiɗa. Mauɗe kawasiɗau chi Jeowaba bustabarii maabea kimabaraaɗai kʉ̃risiasiɗau maabea chi wãwarã waribudauɗe biʼia deeɗabena nureerã biʼia nureerã baare. Mauɗeeburu 1982ɗe dai kimabaraapeɗaaɗabasii.

Mʉa kawa ɓuu Chi Kartaba mauɗe ¡Despertad! * baare nauɗe eɗa chi ẽbẽrarã biʼia nureapeɗa mauɗe ãrĩã kambiapeɗaaɗabaɗa. Maabea mʉa jãu leasiiɗe jãarã nebʉrʉbadauɗebena mʉa ãrĩã bustaɗabasii, mauba mʉ chaarea kʉ̃risiabipeɗa naaburu kãribapeɗa apii akʉ nuɓeebayu kʉ̃risiasii. Maabea mʉa ãrĩã wiɗi ɓeesii Jeowamaa mʉ waa aiɗayua. Mʉ Tony ome bautisaɗapeɗa maabea Jeowa ɗebena jaranũrẽrã basiɗau Julio 1982ɗe.

Mʉ Jeowa ɗebena jaranũrẽrã basiiba mʉ biuubai nii. Tony mʉ ome jãabea kĩrajʉʉ nibaɗe wãɗapeɗa mauɗe Jeowaba ãrĩã aiɗapeɗa miadaa ɓee pasaabayu. Mauɗeeburu ãrĩã jãuɗe ijãa nibaɗe wãsiɗau problema bara panuubudauɗe, ichia ãrĩã ochia ɓuu dachi deeɗabenarãɗebena (Salmo 55:22).

Jãuba kĩrajʉʉ ãrĩã niɗau dai kau mauɗe dai warr baare ãchi amiko Jeowaɗe baɗayua. Mauɗe mʉ kĩrajʉʉ ãrĩã nii mʉ ãi chekerã siɗa Jeowa ɗebena jaranũrẽ bẽrã.

Jãuɗeeburu mʉ chokae ɓeekau ẽsabuɗe kʉ̃risia ɓuuɗe chi uruɗebena mauɗe chi biubariiɗebena. Mʉ Tony ome kĩrajʉʉ ãrĩã niɗau semanacha chi konkrekasion ochiaɗe wãbudau waaburu jua deaɗayua aiɗaɗapeɗa dai ãba chekerã. Maabea ãchirã ome kawabiabadau ẽbẽrarãmaa ãchirãba Jesusɗe ijãaɗarã biuɗawẽã nureaɗayu.