Baibal na kau tikah ca tampi a ummi kha na hmuh lai. Mah ruangah na lungdong hlah! Mah canah Baibal kha cabuai cungah a ummi rawl phun tampi bantukin hmu. Na hmuhmi a dihlak in cun na ei kho lai lo. Asinain na duhmi rawl kha na ei khawh tawk in naa thim kho.

 Baibal relnak in ṭhatnak tling hmuh awkah na relmi kong kha ṭha tein na ruah a hau. Cutin tuah khawh awkah mah capar nih aan bawmh lai.

Hi capar ah

•  Baibal na relmi kong kha zeicah ṭha tein na ruah a herh?

•  Baibal relnak in zeitindah ṭhatnak tling na hmuh khawh?

•  Ṭhirual chimmi

 Baibal rel dingin naa zuam deuhdeuh tikah mah in ṭhathnemhnak tam deuh na hmu ve lai. Mah tahchunhnak hi ruathmanh: Lakphak tom fate kha tisa chungah chikkhat lawng na ciah ahcun lakphak i a thawtnam tlawmpal lawng a um lai. Asinain caan sau deuh na ciah ahcun a thawhnam a um chinchin lai.

 Baibal relnak zong mah bantukin a si ve. Khulrang tein Baibal rel canah na relmi kong ruahnak caah a caan pe. Salm 119 a ṭialtu nih cutin a rak tuah. Pathian nawlbia kong he aa tlaiin hitin a ti: “Chun nitlak cu lawng cu ka ruat ko.”—Salm 119:97.

 Baibal relnak le ruahnak caah chun nitlak a caan pek a hau tinak a si lo. A chim duhmi cu: Salm caṭialtu pa nih Pathian Bia kong ruahnak caah a caan a rak lak. Mah nih a ṭhami biakhiahnak tuah awkah a bawmh.—Salm 119:98-100.

 “Ka nu nih hitin a ka ti, ‘Zarhkhat ah ni sarih a um i mah caan chungah nangmah pumpak caah thil tampi na tuah. Zeicah Jehovah caah a caan tlawmpal na pek lo? A caan na pek hrimhrim awk a si!’”—Melanie.

 Baibal phunglam pawl na ruah ahcun a ṭhami biakhiahnak na tuah khawh deuh lai—tahchunhnak ah, hawikom naa thim tik asiloah thil ṭhalo tuah dingin lemsoi na si tikah a si.

•   Timhtuahnak ngei. “Baibal relnak caah cazin tuah. Zeidah rel ding, zeitik ah rel ding ti le khoika ah rel ding ti kha hngal” tiah kumhra fai a simi Julia nih a ti.

•   Carelnak caah a ṭhami pawngkam kha i thim. Mino nu Gianna nih hitin a ti: “A daimi hmun kha kawl. Na chungkhar nih hna an in hnawh nakhnga lo Baibal na rel caan kha hngalhter hna.”

   Electronic thilri in na rel ahcun notification kha phit hna. Nammi Baibal zongin rel awkah naa zuam kho. Nammi cauk in relnak nih kan relmi kong kha fawi deuh in a kan hngalhthiamter khawh ti kha hlathlainak nih a langhter. Mah he i ralkah in screen in ca relnak nih lungthin pek awkah a harter khawh deuh.

   “Screen in ca relnak nih lung a vaivuanhter ti kha ka hngalh. Notification a awnh tik, battery a dih tik asiloah internet line a tlak tikah a si. Nammi cauk in ka rel tikah ka phanmi cu ceunak a za in ka hmu lai maw, hmu lai lo ti lawng kha a si.”—Elena.

•   Thlacam hmasa. Na relmi dingmi Baibal kong hngalhthiam awk, i cinken awk le mah in ṭhathnemhnak hmuh awkah Jehovah sinah bawmhnak hal.—Jeim 1:5.

   Thla na cammi ningin tuah awkah na relmi kong kha thukpi in ruat. Zeitindah cutin na tuah khawh? JW Library app asiloah online in Baibal na rel ahcun hlathlainak tuah chap awk le mah he aa tlaimi capar pawl hmuh khawh awkah Baibal cacaang kha hmet.

•   Hitin i hal. Tahchunhnak ah: ‘Mah nih Jehovah kong zeidah a ka cawnpiak? Kaa zohchunh khawhmi a sining pakhatkhat a langhter maw?’ (Efesa 5:1) ‘Mah in ka nunnak ah ka hman khawhmi zei a kong dah ka cawn?’ (Salm 119:105) ‘Midang bawmh awkah ka relmi kong kha lam khatkhat in ka hmang kho lai maw?’—Rom 1:11.

   Hiti zongin i hal, ‘Ka relmi kong le Baibal i a biapi bikmi a kong cu zeitindah aa pehtlaih?’ Mah biahalnak cu a biapi tukmi a si. Zeicah? Genesis in Biathlam tiang ah a ummi Baibal dihlak cu a biapi bikmi mah a kong he lam khatkhat in an i pehtlai: Jehovah nih vancung a Pennak thawngin a min a thianter lai ning, uktu si awkah aa tlak bikmi le a uk ning cu a ṭha bikmi a sinak a langhter lai ning kha a si.