“Baibal rel ning he a tlaiin a ṭhami lam kha na hngalh lo ahcun Baibal cu mi a normi a si kho” tiah kumhra fai a simi Will nih a ti.

 Baibal relnak kha a nuammi siter khawh ning lam hngalh na duh maw? Mah capar nih aan bawmh lai.

•  Baibal kha nunter

•  A dikthliar in hlathlai!

•  Ṭhirual chimmi

 Na relmi kongah i telter ve. Mah lam hna hi na hman khawh:

1.   Baibal tuanbia kha thim. Hlathlai na duhmi kha thim. Thawngṭha Baibal cauk chungin a kong pakhat asiloah jw.org ah taarmi drama phun in Baibal relmi pakhat kha na thim khawh.

2.   Mah tuanbia kha rel. Nangmah tein na rel khawh asiloah na hawile le na chungkharmi hna he awchuah in nan rel khawh. Pakhat nih tuanbia kong chimtu in a rel khawh i a dang nih tuanbia ah aa telmi hna zawn kha an rel khawh.

3.   A tanglei i ruahnak cheuhnak pakhat asiloah mahnak tam kha tuah i zuam:

   •   Tuanbia kha zuk in suai. Asiloah thil sining kha aa changchang in langhter law hmanthlak suai. Hmanthlak pakhat cio ah thil sining a langhtermi ca kha ṭial.

   •   Cazin suai. Tahchunhnak ah, zumhfekmi pakhat kong na rel tikah a sining le thluachuah a hmuhtermi a tuahsernak hna kha pehtlaihter.

   •   Tuanbia kha thawngpang in thleng. A konglam kha hmuhning a phunphun in langhter law a bik in aa telmi hna le thil sining a hmutu hna “biahalnak” ti bantuk kha telh.

   •   A kong ṭialmi pakhat nih a ṭhalomi biakhiahnak a tuah ahcun a donghnak ah zei thil dah a ton lai ti kha ruat. Tahchunhnak ah, Peter nih Jesuh a hlawtnak kong kha ruat. (Marka 14:66-​72) Peter nih a tonmi hneknak kha zeitindah ṭha deuh in a lehrulh khawh?

   •   Thil thar tuah a huammi na si ahcun Baibal tuanbia pakhat cungah hrambunh in nangmah tein drama pakhat ṭial awkah naa zuam kho. Cun tuanbia in cawn khawhmi a kong hna zong na telh khawh.​—Rom 15:4.

 A konglam kha a dikthliar in na hlathlai ahcun aa thupmi lungvar hna kha na hmuh khawh lai. A tak ti ahcun tuanbia ah aa telmi biafang pakhat asiloah pahnih te zong a biapi tuk.

 Tahchunhnak ah, Matthai 28:7 kha Marka 16:7 he tahchunh.

•    Marka nih Jesuh cu a rauhhlan ah a zultu hna “le Peter” sinah a lang lai tiah a dikthliar in zeicah a langhter?

•  Langhtertu: Marka cu mah thil sining a hmutu a si lo. Mah kong kha Peter sinin a hngalhmi a si men lai.

•  Aa thupmi lungvar: Jesuh nih hmuh ṭhan a duh kha a hngalh tikah Peter cu zeicah a tha a um tuk lai? (Marka 14:66-​72) Jesuh nih Peter caah hawikom ṭha a si kha zeitindah a langhter? Zeitindah Jesuh kha naa zohchunh khawh i midang caah hawikom ṭha na si khawh?

 Baibal kha na nunter i a konglam a dikthliar in na hlathlai tikah Baibal relnak cu a nuam deuhmi a hung si lai.