Jehovah Tehte Hna cu zarhkhat ah voihnih Biakinn ah an i pum. Zeitindah pumhnak an tuah i mah in zeitindah ṭhatnak na hmuh khawh?

•  Biakinn ah zei hna dah an tuah?

•  Zeicah naa pumh awk a si?

•  Ṭhirual chimmi

 Biakinn cu Baibal kong fimcawnnak caah a biapi bikmi hmun a si. Cuka ah tuahmi pumhnak nih:

•   Pathian kong biatak hngalh awk

•   atu ah a cangmi thil hna i a ruang hngalhthiam awk

•   a ṭha deuhmi minung si awk

•    hawikom ṭha hmuh khawh awkah aan bawmh lai.

  Na theihmi kong nih aan bawmh lai. Jehovah Tehte Hna pumhnak ah na theihmi Baibal phunglam nih “fimnak hmuh” awkah aan bawmh lai. (Phungthlukbia 4:6) Mah cu Baibal nih na nunnak ah a ṭhami biakhiahnak tuah awkah aan bawmh khawh tinak a si. Nunnak he aa tlaimi, a biapimi mah biahalnak hna i a phi hngalh awk zongah aan bawmh khawh:

•   Nunnak sullam cu zeidah a si?

•   Kan tonmi harnak caah Pathian mawhchiat khawh a si maw?

•   Kan thih tikah zei ah dah kan can?

 A tanglei kong hna hi Jehovah Tehte Hna pumhnak ah an chimmi phungchimnak biatlangpi cheukhat a si:

•   Zeicah Baibal Kha Lam Kan I Hruaiter Awk A Si?

•   Harnak Caan Ah Khoika In Dah Bawmhnak Na Hmuh Khawh?

• Atu Ah Pathian Pennak nih A Kan Tuahpiakmi

 “Sianginn ka kaiṭi hawi pakhat cu a rak i pum ve. Kan chungkhar sinah a ṭhu ve i Baibal kha kan hrawm. A hnuah aa pummi hna pekmi a phi nih ka lung a ka suk tuk tiah a ti. Cun nanmah bantukin cawnnak ah hmanmi thilri pawl kha kan church ah cun kan ngei lo ti zongin a ti.”​—Brenda.

 Na hngal maw? Biakinn ah ṭhutnak man pek a um lo i thawhlawm kholh zong a um lo.

 I hawikomhnak nih thazaang aan pek lai. Baibal nih Khrihfa hna hmunkhat i kan i pumhnak a ruang pakhat cu pakhat le pakhat “i forh chin” awkah a si tiah a ti. (Hebru 10:24, 25) Anmahle anmah nakin Pathian le midang biapi ah a chiami hna lakah a ummi hawikomhnak nih mahzawn lawng aa ruatmi hi vawlei ah hrimhnak a kan hmuhter.

 “Chun nitlak ka ngaih a chia i ka tha zong a ba tuk, asinain Biakinn ka kal tikah hrimhnak ka hmu. Pumhnak in ka ṭin tikah kaa nuam tuk i nidang caah timhcia a ka siter.”​—Elisa.

 Na hngal maw? Vawleicung pumpi ah Jehovah Tehte Hna i Khrihfabu 120,000 leng a um i hmun 60,000 lengah an i pum. Aa pummi an karh chin lengmang caah kum fatin buaktlak in Biakinn 1,500 hrawng sak a si. a