MINO PAWL BIAHALNAK
Online ah a Laarmi Si cu Zeitluk in dah a Biapit?
Elaine timi mino nu pakhat nih hitin a chim: “Sianginn ka kaiṭi hawi hna nih online ah follower tampi an ngeihmi ka hmuh tikah ‘Wow—an laar bak si!’ tiah ka ruah. A hmaan tein chim ahcun tlawmpal cu ka nahchuah hna.”
Nangtah cutin na um bal maw? Na um ahcun online ah a laarmi si i zuamnak hrial khawh awkah mah capar nih aan bawmh lai.
Ṭih a nunnak cu zeidah a si?
Phungthlukbia 22:1 ah Baibal nih “minṭhat maw, chawva tampi dah naa thim lai ti na si ahcun minṭhat kha vaa thim deuh” tiah a ti. Cucaah midang nih sunsakmi si duh le minṭhatnak hmuh duh cu a palh lo.
Asinain a caan ah cohlanmi si duhnak cu a laarmi si duh tuknak ah a cang kho. Mah cu ṭih a nung maw? Kum 16 a simi Onya nih ṭih a nung tiah a ti:
“Sianginn ah a laarmi si duh ruang men ah inn dothnih cung in a zuangmi kha ka hmuh hna.”
Ṭhirual pawl lungthin lak duh ah mi cheukhat cu hrut ngaiin thil a phunphun an tuah i mah kha online ah an taar. Tahchunhnak ah, kumhra fai tampi cu midang nih an tuah bal lomi, siivai aa telmi thil suknak chatpiat tlang hna kha an ei i video an i thla, cun mah kha online ah an taar!
Baibal nih hitin a ti: “Mah pumpak thangṭhat kawlnak kha nan lakah umter hlah u.”—Filipi 2:3.
Ruah dingmi:
Online ah a laarmi si cu na caah zeitluk in dah a biapit?
Ṭhirual pawl lungthin lak duh le uarmi si duh ruangah na ngandamnak le na nunnak kha na thap lai maw?
“A laarmi sinak he aa tlaiin a hmaan lomi hmuhnak”
A laarmi si dingin i zuamnak ah mi nih ṭih a nungmi thil kha an tuah zungzal lo. Kum 22 a simi Erica nih mi cheukhat hmanmi lam dang kong kha hitin a chim:
“Mi nih an nunnak ah an tonmi hmanthlak tampi kha an taar i anmah he caan a hmangṭi pengmi hawikom tampi a ngeimi bantukin an taar. Mah nih a laarmi sinak he aa tlaiin a hmaan lomi hmuhnak kha an chuahter.”
Kum 15 a simi Cara nih a hmaan loin ruahter awkah mi cheukhat nih a ding lomi lam an hman tiah a ti:
“Mi nih inn ah an um ko buin party tuahnak ah a ummi bantukin hman an i thlakmi kha ka hmuh bal.”
Kum 22 a simi Matthew nih cutin a tuahnak kong kha a phuan:
“Asia kha a phanh hmanh ka phan bal lo nain ka hmanthlak pakhat kha Everest Tlang he ka tag i ka taar!”
Baibal nih hitin a ti: “A hmaanmi thil kha tuah kan duhmi a si zungzal.”—Hebru 13:18.
Ruah dingmi:
Social media ah a laar deuhmi na si nakhnga a hmaan loin post pakhatkhat na taar bal maw?
Na taarmi hmanthlak le comment nih zei bantuk minung dah na si i zeidah na sunsak ti kha a langhter maw?
Follower le like cu zeitluk in dah a biapit?
Mi tampi nih online i a laarmi sinak caah a biapi bikmi cu follower le like tampi hmuh kha a si tiah an ruah. A hmasa ah langhtermi Matthew nih cutin a ruah venak kong kha a phuan:
“Mi pawl kha ‘Follower zeizat dah na ngeih?’ asiloah ‘Zeizat dah like tam bik na hmuh bal?’ tiah ka hal hna. Follower tampi hmuh duh ah ka hngalh bal lomi kha follow ka tuah hna, mah cu follow an ka tuah ṭhan lai timi ruahchannak he a si. A laarmi si kha ka hun duh i social media nih mah duhnak kha a alhter chin.”
Online ah a laarmi sinak cu ei supsap he aa lo—chikkhat caah cun a ṭha ko nain lungsinak a pe taktak lo
Kum 25 a simi Maria nih mi cheukhat cu follower le like an hmuhmi cungah i hngat in anmahle anmah kha biachahnak an i tuahmi kha ka hmuh tiah a ti:
“Nu pakhat nih selfie aa thlakmi kha a taar i like tampi a hmuh lo tikah ka mui a chia tiah biachahnak a tuah. Mah cu a hmaan lomi ruahnak a si nain mi tampi zong cu bantuk ruahnak an ngei ve. Mah cu anmahle anmah an i serhsatmi a si.”
Baibal nih hitin a ti: “Kan ruam a kai awk a si lo, pakhat le pakhat kan thin kan i hunter awk a si lo, pakhat le pakhat kan i nahchuah awk a si lo.”—Galati 5:26.
Ruah dingmi:
Social media na hman tikah mah nih midang he aan tahchunhter maw?
Hawikom ṭha taktak ngeih nakin follower ngeih kha biapi deuh ah na chia maw?