Jehovah sinah i pumpek dingin le tipil in dingin na ruah tikah na ṭih maw? Cutin a si ahcun mah capar nih na ṭihnak kha tei awkah an bawmh lai.

Hi capar nih

•  Tipil ka in hnuah sualnak ngan ka tuah sual ahcun zeitin?

•  Tipil in dih in ṭuan dingmi rian kha ka ṭih ahcun zeitin?

•  Jehovah rian ṭuan awkah kaa tlak lo tiah ka ruah ahcun zeitin?

•  Ṭhirual chimmi

 Na thin a phannak a ruang: Sualnak ngan a tuah caah Khrihfabu chungin chuahmi mi pakhat kha na hngalh men lai. (1 Korin 5:11-13) Nang zong cutin ka si sual lai tiah na thin a phang men lai.

 “Tipil innak kong ka ruah hmasa lioah tipil ka in hnuah sualnak ngan ka tuah sual lai tiah ka thin a phang. Cutin a si ahcun ka nu le ka pa zeitlukin dah an lungre a theih lai ti kha ka mitthlam ah ka cuanter.”—Rebekah.

 A biapimi Baibal caang: “Miṭhalo nih an zulhmi an lam kha hlaw hna sehlaw . . . BAWIPA kan Pathian leiah cun i mer hna seh, amah cu mi zaangfah a thiam i khulrang in mi a ngaithiam khotu a si.”—Isaiah 55:7.

 Ruah dingmi: A sualnak aa ngaichih lomi hna cu bu chung in chuah an si ko nain toidornak lungthin a ngei i a sualnak aa remhmi cu Jehovah nih a zaangfah hna.—Salm 103:13, 14; 2 Korin 7:11.

 A tak ti ahcun mitlinglo na si ko nain Pathian bawmhnak thawngin lemsoinak hna kha na al khawh. (1 Korin 10:13) Zeidah na tuah lai ti kha ahonih dah bia a khiah awk a si? Nangmah maw? Asiloah midang dah?

 “Tipil ka in hnuah sualnak ngan ka tuah sual lai tiah ka thin a phang. Asinain mah ruangah tipil awkah a caan thawn cu a ṭha lo ti kha ka hun hngalh. Thaizing caah ka lungre a theih ruangah tuni ah ka tuah dingmi kha tuah loin ka um awk a si lo ti zong ka hung hngalh.”—Karen.

 A biapimi kong: Jehovah salle tampi bantukin nang zong sualnak ngan tuah kha na hrial khawh.—Filipi 2:12.

 Bawmhnak tam deuh na herh maw? “Lemsoinak Hna Kha Zeitindah Ka Tei Khawh?” timi ah zoh.

 Na thin a phannak a ruang: Tahchunhnak ah, na hngalhmi mino cheukhat cu Jehovah rianṭuan awkah chungkhar le hawile sinin a hlatnak ah an i ṭhial kho men. Kei tah cutin ṭhialter a kan duh ve lai maw tiah na thin a phang.

 “Tipil a in cangmi Khrihfa pakhat cu Jehovah rian kauhter awkah sining a tlinh. Asinain cheukhat cu cutin tuah awkah timhcia an si rih lo asiloah thil sining nih a pe hna lo.”—Marie.

 A biapimi Baibal caang: “Kan rian ṭuanmi cu kanmah cio nih a ṭhat a chiat a cuaithlai ning kan thiam awk a si; cucaah tuah awk aa tlakmi thil kan tuah tikah midang nih a ṭha a ṭhalo ti hau loin kan lung aa lawm kho lai.”—Galati 6:4.

 Ruah dingmi: Midang he i tahchunh canah Marka 12:30 nih a chimmi ‘Bawipa nan Pathian cu nan lungthin dihlak in daw u’ timi bia cungah lungthin pe.

 Jehovah kha midang lungthin si loin nangmah lungthin dihlak in na dawt awk a si. Jehovah kha na dawt taktak ahcun na si khawh chungin a rian ṭuan khawh ning lam kha na hmuh lai.

 “Tipil in cu a biapimi kehlan a si ko nain thilrit cu a si lo. Hawikom ṭha na ngeih ahcun an i bawmh khawh lai. Duhsah tein na rian na hun ṭuan khawh tikah naa nuam deuh lai. Tipil in loin na ummi cu nangmahle nangmah harnak naa pekmi a si.”—Julia.

 A biapimi kong: Jehovah nih na cungah a langhtermi dawtnak kha sunsak. Mah nih a ṭha bik in pek ṭhan awkah aan forh lai.—1 Johan 4:19.

 Bawmhnak tam deuh na herh maw? “Zeitlukin Dah Ka Rian Ka Hngalh?” timi ah zoh.

 Na thin a phannak a ruang: Van le vawlei zeizong vialte a sertu, Lianngan Bik Jehovah he tahchunh ahcun minung cu zeihmanh kan si lo. Cucaah Jehovah nih hngalh hmanh a ka hngal hnga maw tiah na ruah men lai.

 “Ka nu le ka pa cu Jehovah Tehte an si caah keimah zong Jehovah he kaa naihmi a si. Jehovah nih a sinah a ka hnuhmi a si lai lo tiah ka thin a phang.”—Natalie.

 A biapimi Baibal caang: “A ka thlahtu ka Pa nih ka sinah a hnuh hna dah ti lo ahcun ahohmanh ka sinah an ra kho lo.”—Johan 6:44.

 Ruah dingmi: Tipil innak kong na ruah le cangka Jehovah nih a sinah aan hnuhmi a si ti cu a fiang. Mah sawmnak hi na cohlang lai maw?

 Jehovah he naih a duhmi hna caah phunglam a chiatu cu nangmah na si lo, midang zong an si lo i Jehovah a si ti kha i cinken. “Pathian cu naih u law an naih ve hna lai” timi bia kha zum.—Jeim 4:8.

 “Jehovah kong na hngalhmi le a sinah aan hnuhmi cu an dawt ti a langhtermi a si. Pathian rianṭuan awkah kaa tlak lo tiah na ruah ahcun Jehovah nih cutin a ruat lo ti kha i cinken. Jehovah cu a zungzal in a dingmi a si.”—Selina.

 A biapimi kong: Tipil in awkah Baibal halmi kha na tlinh ahcun Jehovah rian ṭuan awkah sining na tlinh tinak a si. Jehovah cu na biaknak hmuh awkah aa tlak.—Biathlam 4:11.

 Bawmhnak tam deuh na herh maw? “Zeicah Thla Ka Cam Awk A Si?” timi ah zoh.