Baibal phunglam ningin na nung i Pathian he a ṭhami hawikomhnak na ngeih ahcun tipil in dingin na ruahmi cu a phung a si ko. Asinain tipil in awkah timhcia na si cang maw? a

Mah capar nih a tanglei kong hna hi a langhter:

•  Baibal kong zeitluk in dah hngalh a herh?

•  Zeidah ka tuah awk a si?

•  Ṭhirual chimmi

 Camipuai awn khawh awkah sianginn ca hna baihat in ciah bantukin tipil in khawh awkah Baibal kong hna kha baihat in ciah a hau lo. Asinain Baibal kong biatak kha lungthin dihlak in na zumh khawh nakhnga ‘tuaktan khawhnak’ kha na hmang a hau. (Rom 12:1, NW) Tahchunhnak ah:

•   A nungmi Pathian biak ding a si ti kha fek tein na zum maw?

   Baibal nih hitin a ti: “Ahohmanh nih zumhnak loin Pathian lungton khawh a si lo; zeicahtiah Pathian a fuhmi paohpaoh nih cun, Pathian cu a um i amah a kawlmi cu laksawng a pek hna, ti kha an zumh awk a herh.”—Hebru 11:6.

   Hitin i hal: ‘Zeicah Pathian ka zumh?’ (Hebru 3:4) ‘Zeicah Pathian ka biak?’—Biathlam 4:11.

   A phi hngalh na duh ahcun “Sernak asiloah Thlennawnnak?—Ṭhen 1: Zeicah Pathian ka zumh?” timi capar kha rel.

•   Pathian sinin a rami Baibal bia kha na zum maw?

   Baibal nih hitin a ti: “Cathiang hi a dihlak in Pathian thaw chuah hnawhmi a si i biatak cawnpiaknak caah le palhnak cawnpiaknak alnak caah le palhmi remhnak caah le ding tein nunnak ding cawnpiaknak caah a ṭhahnemmi a si.”—2 Timote 3:16.

   Hitin i hal: ‘Baibal cu minung ruahnak in ṭialmi cauk a si lo tiah zeicah ka zumh?’—Isaiah 46:10; 1 Thesalon 2:13.

   A phi hngalh na duh ahcun “Baibal Nih Zeitindah A Ka Bawmh Khawh?—Ṭhen 1: Ṭha Tein Baibal Hlathlainak” timi capar kha rel.

•   Jehovah nih a duhnak tlinter awkah Khrihfabu a hman ti kha na zum maw?

   Baibal nih hitin a ti: “[Pathian cu] Khrihfabu chungah Khrih Jesuh thawngin zungzal in zungzal tiang sunglawi ko seh!”—Efesa 3:21.

   Hitin i hal: ‘Khrihfabu pumhnak in ka theihmi Baibal kong hna cu minung ruahnak maw an si, Jehovah ruahnak dah? Zeitindah ka hmuh? (Matthai 24:45) ‘Ka nu le ka pa nih an ka zulh lo (nawl an ka awnh lo) hmanhah keimah tein kaa pum maw?’—Hebru 10:24, 25.

   A phi hngalh na duh ahcun “Biakinn Ah Zeicah Kan I Pumh Awk A Si?” timi capar kha rel.

 Tipil in awkah Baibal kong dihlak hngalh a hau lo. Asinain “ṭhatlonak kha hrial u law ṭhatnak kha tuah u” timi Baibal bia hi na zulh awk a si. (Salm 34:14) Tahchunhnak ah:

•   Jehovah phunglam ningin na nung maw?

   Baibal nih hitin a ti: “Nan chiaṭha thleidannak lungthin kha thiang tein umter u.”—1 Peter 3:16.

   Hitin i hal: ‘Ka ngeihmi “thleidan khawhnak” kha “chia le ṭha” hngal kho dingin ka cawnpiak maw?’ (Hebru 5:14) ‘Ṭhirual pawl nih a ṭhalomi thil tuah dingin an ka fial tikah voi zeizat dah ka al cang hna? Ka hawile nih a hmaanmi thil tuah dingin tha an ka pe maw?’—Phungthlukbia 13:20.

   A phi hngalh na duh ahcun “Chiaṭha Thleidannak Lungthin Kha Zeitindah Ka Cawnpiak Khawh?” timi capar kha rel.

•   Ka tuahsernak cungah rian ka ngei ti kha na cohlang maw?

   Baibal nih hitin a ti: “Kan dihlak hin Pathian hmaiah kan kong kan i chim cio a herh lai.”—Rom 14:12.

   Hitin i hal: ‘Keimah cungah siseh, midang cungah siseh ka dingfel maw?’ (Hebru 13:18) ‘Ka palhnak kha ka cohlang maw, asiloah chim loin ka thup maw, asiloah midang tu maw sual ka puh hna?’—Phungthlukbia 28:13.

   A phi hngalh na duh ahcun “Palhnak Ka Tuah Tikah Zeitindah Ka Tawnghtham Khawh?” timi capar kha rel.

•   Jehovah he nan i hawikomhnak kha na kilveng maw?

   Baibal nih hitin a ti: “Pathian cu naih u law aan naih ve hna lai.”—Jeim 4:8.

   Hitin i hal: ‘Jehovah he i naih chin awkah zeidah ka tuah?’ Tahchunhnak ah, ‘Baibal kha zei can dah asiloah voi zeizat dah ka rel?’ (Salm 1:1, 2) ‘Hmaan tein thla ka cam maw?’ (1 Thesalon 5:17) ‘Cuset khaset tiin thla ka cam maw? Ka hawile cu Jehovah a biami an si maw?’—Salm 15:1, 4.

   A phi hngalh na duh ahcun “Baibal Nih Zeitindah A Ka Bawmh Khawh?—Ṭhen 2: Baibal Relnak Kha A Nuammi Siter” timi le “Zeicah Thla Ka Cam Awk A Si?” timi capar kha rel.

 RUAHNAK CHEUHNAK: Tipil in naa timh ahcun Mino Pawl Biahalnak—Hmualngeimi Lehnak, Ṭhen 2 i ṭhen 37 kha rel. A hleiin cahmai 308 le 309 i cazin kha rel khawh i zuam.