MINO PAWL BIAHALNAK
Tipil Ka In Awk A Si Maw?—Ṭhen 1: Tipil Innak Sullam
Jehovah Tehte chungkhar ah a ṭhangmi mino tampi cu kum fatin tipil an ing. Nangtah tipil in dingin timhtuahnak na ngei maw? Na ngeih ahcun pumpeknak le tipil innak a sullam kha na hngalhthiam hmasa a hau.
Tipil in timi cu zeidah a si?
Baibal nih a langhtermi tipil innak cu ti in theh sawhsawh si loin pum dihlak in ti chungah hnim dih kha a si. Ti chungah i hnim dihnak nih a biapi tukmi a kong pakhat kha a langhter.
Tipil in lio i ti chungah naa hnim dihmi cu keimah duh ningin ka nung ti lai lo tiah mi hmaiah na langhtermi a si.
Ti chungin na hun chuahmi cu Pathian duh ningin nunning thar in ka nung cang lai ti na langhtermi a si.
Tipil na inmi nih a hmaan, hmaan lo kong ah Jehovah cu phunglam sernak nawl a ngei i Pathian nih tuahter a ka duhmi lawng ka tuah cang lai tiah mi hmaiah bia naa kammi a si.
Ruah dingmi: Jehovah duh ning lawngin ka nung cang lai tiah mi hmaiah zeicah langhter a hauh? 1 Johan 4:19 le Biathlam 4:11 ah zoh.
Pumpeknak timi cu zeidah a si?
Tipil na in hlanah nangmah tein Jehovah sinah naa pumpek awk a si. Zeitin in dah?
Zei bantuk thil a chuah hmanhah, midang nih zei thil an tuah hmanhah nangmah lawng kaan biak zungzal lai, nangmah nih tuahter na ka duhmi lawng kha ka tuah lai tiah thlacamnak in Jehovah sinah na chim.
Tipil in cu Jehovah sinah nangmah tein naa pumpekmi kha mi hmaiah na langhtermi a si. Nangmah ta si ti loin Jehovah ta na si cang ti kha mi hmaiah na langhtermi a si.—Matthai 16:24.
Ruah dingmi: Jehovah ta na si tikah nan nunnak cu zeitindah a hun ṭhat deuh? Isaiah 48:17, 18 le Hebru 11:6 ah zoh.
Zeicah tipil in cu a biapit?
Jesuh nih ka zultu a simi nih cun tipil an in a hau tiah a ti. (Matthai 28:19, 20) Cucaah Khrihfa a simi nih cun tipil in a hau. Khamh nan si nakhnga tipil nan in a hau tiah Baibal nih a ti.—1 Peter 3:21.
Asinain Jehovah kha na dawt ca le Pathian he nan i pehtlaihnak na sunsaknak nih tipil in awkah aan forh awk a si. Na ruahnak cu Salm caṭialtu pa ruahnak he aa khah awk a si, hitin a ti: “BAWIPA cu ka cung i a ṭhatnak vialte ruangah hin zeidah ka pek khawh lai? . . . A mi vialte an i pumhnak ah khan bia kaa kammi kha ka pek lai.”—Salm 116:12-14.
Ruah dingmi: Na caah Jehovah nih zei ṭhatnak dah a tuah, zeitindah na cham lai? Deuteronomi 10:12, 13 le Rom 12:1 ah zoh.
Mah Kong Hna Zong Hi Na Duh Khawh Men
MINO PAWL BIAHALNAK
Tipil Ka In Awk A Si Maw?—Ṭhen 2: Tipil In Awkah Timhtuahnak
Tipil in dingin timhcia na si le si lo hngalh awkah mah biahalnak hna hi hmang.
MINO PAWL BIAHALNAK
Tipil Ka In Awk A Si Maw?—Ṭhen 3: Tipil In Awkah Zeicah Kaa Cungcang?
Pumpeknak le tipil innak kong na ruah tikah ṭihnak na ngeih ahcun mah capar nih na ṭihnak kha tei awkah an bawmh lai.
BAIBAL BIAHALNAK A PHI
Tipil In Timi Cu Zeidah A Si?
Baibal ah tipil a ingmi hna kong tampi a langhter. Cun tipil in timi sullam le a biapitnak kong zong kha a langhter.
