Inn asiloah mawṭaw ti bantuk a man a sungmi kan thilri hna kha kilven a hau. Pathian he kan i pehtlaihnak zongah cutin a si ve. Tipil in hnuah Pathian he kan i pehtlaihnak zeitindah kan fehter peng khawh?

Hi capar ah

•  Baibal kha hlathlai peng

•  Jehovah sinah thlacam peng

•  Na zumhnak kong kha midang sinah chim peng

•  Hmaan tein i pum peng

 A biapimi Baibal caang: “Thilṭha tuahnak kip ah nan nunning cu zumhawk tlak a si lai i Pathian nan hngalhnak ah khan nan ṭhang lai.”—Kolose 1:10.

 A sullam: Tipil na in hnu zongah Baibal kha na rel peng a hau i na hngalhmi kong hna kha na ruah a hau.—Salm 25:4; 119:97.

 I ruahchanh dingmi: A caan ah hlathlainak tuah na huam lo caan a um kho men. Mah ruangah “hlathlainak tuah a huammi” ka si lo tiah na ruah men lai.

 Na tuah khawhmi: Hngalh na duhmi Baibal kong hna kha thukpi in hlathlai. Pumpak hlathlainak program hna kha ngei peng. Cutin na tuah ahcun na caah thilrit a si lai lo. Jehovah dawt chin awk le Baibal sunsak chin awkah hmuitinh chia. Cu bantuk phun hlathlainak cu a ṭhahnem i a nuamh zong a nuam.—Salm 16:11.

 Ruahnak cheuhnak: Hlathlainak in ṭhathnemhnak tam deuh hmuh awkah hnahnawhnak a um lonak a daihnak hmun kha kawl.

 A dang bawmhnak

•   Rel:

   “Baibal Nih Zeitindah A Ka Bawmh Khawh?—Ṭhen 2: Baibal Relnak Kha A Nuammi Siter”

   “Lungthin Pek Awkah Zeitindah Ka Tuah Khawh?”

•   Zoh:

   Ṭhirual Pawl Chimmi—Baibal Relnak

•   Download tuah:

   “Baibal-Relnak Program”

 A biapimi Baibal caang: “Zeithil kong hmanh ah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u.”—Filipi 4:6.

 A sullam: Pathian he pehtlaihnak tuah timi cu pakhat le pakhat i pehtlaih kha a si: Baibal na relmi cu a bia na ngaihmi a si i a sinah thla na chimmi cu bia na ruahmi a si. Na thlacamnak ah na herhmi thil hna na hal khawh bantukin na hmuhmi thluachuah caah lawmhnak bia zong na chim khawh ti kha i cinken.

 I ruahchanh dingmi: A caan ah na thlacamnak cu sullam a ngei lo tiah na ruah khawh men. Mah tikah Jehovah nih ka thlacamnak hi a ngai taktak hnga maw asiloah a ngai duh hnga maw ti hmanhin lunghrinnak na hun ngei kho men.—Salm 10:1.

 Na tuah khawhmi: Na thlacamnak ah na telh khawhmi kong hna kha nikhat chung ruat. Caan saupi thlacam dingin thil sining nih aan pek lo ahcun mah kong kha zanlei ah cam dingin biakhiak. Na caah a biapimi kong hna lengah midang ca zongah na cam khawh.—Filipi 2:4.

 Ruahnak cheuhnak: Na thlacamnak cu sullam a ngei lo tiah na ruah ahcun mah kong kha Jehovah sinah chim. Na lungretheihnak kong i telin na thlacamnak vialte kha Pathian nih ngaih a duh.—1 Johan 5:14.

 A dang bawmhnak

•   Rel:

   “Zeicah Thla Ka Cam Awk A Si?”

•   Download tuah:

   “Na Thlacamnak Ṭhanchoter Khawh Ning”

 A biapimi Baibal caang: “Nangmah kha ṭha tein i ralring law na cawnpiaknak zong kha i ralring fawn. Cun nangmah naa khamh hlei ah na bia a theimi kha na khamh khawh hna [lai.]”—1 Timote 4:16.

 A sullam: Midang sinah na zumhnak kong na chimh hna tikah nangmah zong na zumhnak a fek chin ve. Cun mah nih nangmah nunnak aan khamh hleiah na bia a ngaimi hna nunnak zong a khamh khawh.

 I ruahchanh dingmi: A caan ah na zumhnak kong chimh na duh hna lo caan a um kho men. A hleiin sianginn ah na zumhnak kong chim awkah ṭihnak hmanh na ngei kho men.

 Na tuah khawhmi: Ṭihnak ti bantuk a ṭhalomi ruahnak kha na tuah awk a simi thil i ukter lo awkah biakhiah. Lamkaltu Paul nih hitin a ti: “ka rian hrimhrim a si tiin ka ṭuan hi Pathian nih hi rian [thawngṭha chim] hi ka kut chungah a ka pek caah a si.”—1 Korin 9:16, 17.

 Ruahnak cheuhnak: Na nulepa hnatlaknak in phungchim rianṭuannak ah aan bawm kho dingmi le na caah zohchunhawk ṭha a simi mi pakhat kha kawl.—Phungthlukbia 27:17.

 A dang bawmhnak

•   Rel:

   “Ka Zumhnak Kong Chim Kha Zeicah Ka Ṭih?”

 A biapimi Baibal caang: “Pakhat le pakhat kan i dawt khawh nakhnga le thil ṭha kan i tuah piak khawh nakhnga, i bawm tliahmah u sih. Pakhat le pakhat hmun khat i i pumh lengmang kha ngol hlah u sih.”—Hebru 10:24, 25.

 A sullam: I pumh a biapitnak a ruang cu Jehovah biak awkah a si. Asinain naa pumh tikah a dang ṭhathnemhnak pahnih zong na hmu. Pakhatnak, zumtukhat unau pawl sinin thazaang peknak na hmu. Pahnihnak, naa pumh tik le a phi na pek tikah unau pawl kha thazaang na pek khawh hna.—Rom 1:11, 12.

 I ruahchanh dingmi: A caan ah pumh lioah a dang kong hna na ruah men lai. Cucaah an in cawnpiakmi a sunglawi tukmi thil hna in cawn awk na ngei men lai lo. Asiloah pumhnak hna na hun bau kho. Sianginn ca ti bantuk a dang thil hna kha biapi tuk in na chiah caah pumhnak caah a caan pe kho loin na um kho men.

 Na tuah khawhmi: Sianginn ca ah lungthin na pek buin pumhnak zong hmaan tein i pumh awkah biakhiak. Pumhnak in ṭhathnemhnak tling hmuh awkah hmuitinh chia. A phi pek awkah i zuam. Pumh dih hnuah a tlawm bik ah unau pakhat kha a pekmi a phi caah thangṭhat dingin i zuam.

 Ruahnak cheuhnak: Naa pumh hlanah i timtuah chung. JW Library® app kha download tuah, cun pumhnak pakhat cio caah i ruah dingmi kong hna kha “Pumhnak” timi tangah zoh.

 A dang bawmhnak

•   Rel:

   “Zeicah Kan I Pumh Awk A Si?”