Pathian nih “nu le pa sualnak aa summi” si hna seh ti a kan duh tiah Baibal nih a ti. (1 Thesalon 4:3) Baibal ah a hmanmi “nu le pa sualnak” timi biafang ah zuanzamnak, nulenu palepa sualnak le aa ṭhium rih lomi nu le pa umṭinak ti bantuk hna aa tel.

•  Ṭhitumnak an tuah maw, tuah lo ti cu zeicah Pathian caah a biapit?

•  Nuam tein kan umṭi kho lai maw ti hngalh awkah ṭhitum hlanin umṭinak he aa tlaiin tah zeitin?

•  Nuva hna nih a fekmi chungkhar kha zeitindah an dirh khawh?

• Ṭhitumnak cu Pathian nih a dirhmi a si. Pathian nih hmasa bik nuva a fonh hna lioah ṭhitumnak kha a hram a rak thawk. (Genesis 2:22-24) Pathian nih ṭhitum biakamnak tuah loin nu le pa umṭi ding kha a timhmi a si lo.

• Pathian nih minung caah zeidah a ṭha bik ti kha a hngalh. Pathian nih nu pakhat le pa pakhat a funtomtu ṭhitumnak kha zungzal ca in a timh. Mah thawngin chungkhar mi vialte nih ṭhathnemnak le huhphenhnak an hmuh lai. Tahchunhnak pakhat hi ruathmanh. Thilri sertu ṭialmi lamhruainak nih thilri pawl zeitindah hmaan tein bunh ding ti kha a langhter, cu bantukin Pathian lamhruainak nih chungkhar pehtlaihnak ah hlawhtlinnak hmuh khawh ning kha a kan chimh. Pathian phunglam a zulmi hna cu ṭhathnemhnak an hmu zungzal.—Isaiah 48:17, 18.

• I ṭhitum loin nupa sualnak tuahnak nih ṭih a nungmi thil tampi a chuahter. Tahchunhnak ah, duh loin fapawinak, nupa ihṭinak in chawnh khawhmi zawtnak le lungfahnak hna a chuahter khawh.

• Pathian nih nupa umṭinak thawngin fa ngeih khawhnak a pek hna. Pathian nih nunnak kha a sunsak tuk i fa ngeih khawhnak cu a sunglawi tukmi laksawng a si. Ṭhitumnak he aa tlaiin Pathian timhtuahnak kha kan upatnak thawngin Pathian nih mah laksawng kha sunsak hna seh ti a kan duh.—Hebru 13:4.

A hlawh a tlingmi chungkhar ngeih khawh awkah ṭhitum biakamnak tuah hlanin hmunkhat ah umṭi hmasa a hau lo. Mah canah an pahnih ningin a fekmi biakamnak an tuah tik le buaibainak hna an tawnghthamṭi tikah an i pehtlaihnak cu a fek chin lai. a Ṭhitumnak nih biakamnak kha a fehter chin lai.—Matthai 19:6.

A tlingmi chungkhar a um lo. Asinain nuva hna nih Baibal ruahnak cheuhnak an zulhnak thawngin a hlawh a tlingmi chungkhar an ser khawh. Tahchunhnak cheukhat hi zohhmanh:

• Nanmah nakin nan innchunghawi herhmi kha biapi deuh ah chia u.—1 Korin 7:3-5; Filipi 2:3, 4.

• Pakhat le pakhat i daw u law i upat zungzal u.—Efesa 5:25, 33.

• Nan biachim kha i ralring u.—Phungthlukbia 12:18.

• Lungsaunak ngei u law i ngaithiam colh u.—Kolose 3:13, 14.