Tuchan mi hna i ruahnak le tuahsernak cu a chia chin lengmang lai tiah Baibal nih a chimchung. Mah nih ziazalei phunglam cu a rawk tuk lai i zatlang nun he aa tlaimi nunphung hna zong an ṭumchuk lai ti a langhter. a (2 Timote 3:1-5) Asinain mi cheukhat cu, cu bantuk ziaza nih a iap hna lai lo ti zongin a chimchung. Pathian bawmhnak thawngin a ṭha lomi huham kha an doh khawh lai i Pathian duhnak he aa tlakin ruah awk le tuah awkah an i zuam lai.—Isaiah 2:2, 3.

Hi capar ah

•  Tuchan mi hna ruahnak le tuahsernak he aa tlaiin Baibal nih zeidah a chimchung?

•  Mah zawn lawng aa ruatmi hna nih midang kha zeitindah an hnorsuan hna?

•  Zeicah mi pawl cu an ṭhatlo chin lengmang?

•  Mi pawl an ṭhatlo chin lengmangmi kha zeitindah kan lehrulh hna awk a si?

•  Mikip in an ṭhalo chin lengmang lai maw?

•  Minung bu vialte ningcang loin an um dih lai maw?

 Hmun kip ah kan hmuhmi, mah zawn lawng ruahnak cungah hram aa bunhmi a ṭha lomi ziaza a phunphun kha Baibal nih a langhter. Mi pawl cu “anmah zawn lawng aa ruatmi” le “ṭih a nungmi an si lai,” “Pathian nakin nuamhnak kha an duh deuh lai.”—2 Timote 3:2-4.

 Mah chimchungbia bantukin tuchan mi tampi cu anmah zawn lawng an i ruat. Anmah ca ṭhatnak le duhnak lawng kha biapi ah an chiah. Mah cu a zual chin lengmangmi a lo. Mi tampi nih anmah ṭhatnak ca lawng an zoh caah “ṭhatnak kha an huat” i ziaza ṭha hna kha duh awk hmanh an hngal lo. Cun an ngeihmi le an caah mi nih an tuahpiakmi hna ca zongah i lawmh canah “lawmh a hngal lomi” an hung si.—2 Timote 3:2, 3.

 Mah zawn lawng ruahnak cungah hram aa bunhmi a tanglei sining hna zong hmun kip ah hmuh a si:

•   Hakkauhnak. “A hak a kaumi” cu an tam chin thluahmah i tangka ngeih le rum lawngah hlawhtlinnak hmuh a si tiah an ruah.—2 Timote 3:2.

•   Porhlawtnak. Mi tampi cu “aa porhlawmi le lung a puammi an si” i “porhlawtnak in an khat.” (2 Timote 3:2, 4) Cu bantuk mi hna nih an thiamnak, an thil ti khawhnak le an rumnak kong kha a hleihluat in an chim i an i uangthlar tuk.

•   Thangchiatnak. “Biaknak zeihmanh i a rel lomi” le“mi thangchiat duhmi” cu hmun kip ah hmuh an si. (2 Timote 3:2, 3) Mah cu midang asiloah Pathian kong zei rel loin chim le a hmaan loin chim kha a si.

•   Lungkhonnak. Mi tampi cu “mi zawnruahnak an ngei lo,” “hawi rawi a hmangmi” le “duhpaoh khuasa an si.” (2 Timote 3:2-4) Annih cu midang he remchunhnak le hnatlaknak tuah an duh lo i an biakam ningin zulh zong an duh lo.

•   Zaangennak. Tuchan mi tampi cu “ṭih a nungmi,” a thinhun a fawi i a puarhrangmi an si.—2 Timote 3:3.

•   Nawl buarnak. Atu kan chan ah “ṭhatlonak a karh tuk lai” tiah Jesuh nih a rak chimchung. (Matthai 24:12) “Ralthawhnak” hna a karh lai ti zongin a chimchung.—Luka 21:9.

•   Chungkhar tlaihchan lonak. ‘Nulepa a zawmhtaih i an nawl a ngai duh lomi,’ chungkhar cungah ‘zaangfahnak, [tlaihchannak, NW] a ngei lomi’ an tam tuk caah chungkhar nih hlawtmi, hremmi an tam chin thluahmah.—2 Timote 3:2, 3.

•   Biaknaklei zumhpialnak. ‘Biaknak phung a lenglei in aa tlaihmi’ an tam chin thluahmah. (2 Timote 3:5) Pathian duhnak zulh canah anmah theih duhmi kong a cawnpiaktu biaknaklei hruaitu hna hnu kha an zulh.—2 Timote 4:3, 4.

 Mah zawn lawng aa ruatmi an tam deuhdeuh tikah lungthinlei fahnak a tuarmi an tam deuhdeuh ve. (Phungchimtu 7:7) Tachunhnak ah, tangka a duhmi hna nih midang sinin a miak tampi an lak. Chungkhar tlaihchannak a ngei lomi hna ruangah chungkharmi hna cu lungretheihnak an tong i mahle mah aa thatmi hmanh an um kho. Hawi rawi a hmang i zumhawktlak a si lomi hna ruangah i thihpi awk tlak lungfahnak hna a um kho.

 A ruang kha Baibal nih a langhter:

•   Pathian le innpa dawtnak cu a kik chin thluahmah. (Matthai 24:12) Cucaah mah zawn lawng ruahnak cu a karh chinchin.

•   Satan Khuachia cu vancung in ṭhawl a si i vawlei ah thlak a si. (Biathlam 12:9, 12) A ṭhalo tuk i amah zawn lawng aa ruatmi Satan ruangah vawleicung mi hna zong mah lungput nih a iap hna.—1 Johan 5:19.

 Baibal nih “cu hna cu hrial i zuam hna” tiah a ti. (2 Timote 3:5) Mah cu midang kha kan hrial hna lai i a dang tein kan um lai tinak a si lo. Mah zawn lawng aa ruat i Pathian phunglam zei ah a rel lomi hna he i komh tuk ding a si lo tinak a si.—Jeim 4:4.

 A si lai lo. Baibal nih “thil fihnung an tuahmi ruang i a ṭapmi hna le a ngaih a chiami hna” an um lai tiah a ti. (Ezekiel 9:4) Annih nih mah zawn lawng ruahnak lungput kha an doh i Pathian phunglam ningin an nung. An biachim le an tuahsernak cu mi tampi he an i dang. (Malakhi 3:16, 18) Tahchunhnak ah, mikip he daihnak an ser. Raldohnak le zaangennak ah an i tel lo.—Mikah 4:3.

 An um dih lai lo. Pathian nih a phunglam a zul lomi vialte kha a hrawh dih cang hna lai. (Salm 37:38) “Vawlei thar”—phundang cun minung bu thar kha a dirh lai i toidormi hna cu zungzal in daihnak an hmu lai. (2 Peter 3:13; Salm 37:11, 29) Mah ruahchannak cu saduh thah sawhsawh men a si lo. Atu in Pathian i a dingmi a phunglam ningin nun khawh awkah thlennak tuah dingin Baibal nih a kan bawmh.—Efesa 4:23, 24.