“Samaria Miṭha Pa” timi biafang cu herhbaunak a ngeimi hna bawmh awkah thil pakhatkhat a tuahmi hna kong an chim tikah an hman tawn. Mah biafang cu innpa ṭha le mi cungah dawtnak a ngeimi hna nih miphun le hnulei sining thleidannak ngeih loin zaangfahnak he mi an bawmh hna ti kha langhter awkah Jesuh chimmi tahchunhnak in a chuakmi a si. a

Hi capar ah

•  “Samaria Miṭha Pa” tahchunhnak cu zeidah a si?

•  Jesuh nih mah tahchunhnak kha zeicah a chim?

•  Mah tahchunhnak in zeidah cawn khawh a si?

•  Samaria mi hna cu ahote dah an si?

•  “Samaria Miṭha Pa” tahchunhnak kong cu a cang taktakmi a si maw?

Jesuh chimmi tuanbia a tawinak cu hitin a si: Judah mipa pakhat cu Jerusalem in Jeriko khua ah khual a tlawng. Mah pa cu lampi ah damiah nih an tlaih, a puan an phoih, an tuk i thi lo nung lo in an kaltak.

Judah mi tlangbawi pakhat, a hnuah Levi mipa pakhat zong hma a pumi pa pawngin an kal. An miphun aa khat ko nain mah mipa kha an bawm duh lo.

A donghnak ah, an miphun aa khat lomi pa pakhat cu cuka lam in a kal. Amah cu Samaria mipa a si. (Luka 10:33; 17:16-18) Hma a pumi pa kha a zaang a fak tuk i a hma kha a thloppiak. Cun khual riahnak inn pakhat ah a kalpi i zan khuadei a zohkhenh. A thaizing ah riahnak inn a hngaktupa kha tangka a pek i rak zohkhenh law a dihmi vialte cu kan pek ṭhan lai tiah a ti.—Luka 10:30-35.

Miphun le biaknak aa khatmi cung lawngah dawtnak langhter awk a si tiah a ruatmi hna kha a biapimi kong cawnpiak a duh hna caah Jesuh nih mah tahchunhnak kha a chimmi a si. Miphun khat a simi Judah mi hna cung lawngah dawtnak langhter ding a si lo ti kha hngalhter a duh hna. (Luka 10:36, 37) Pathian lunglawmhter a duhmi paoh nih ṭhatnak an hmuh nakhnga mah tuanbia kha Baibal ah langhter a si.—2 Timote 3:16, 17.

Mah tahchunhnak nih mi cungah dawtnak a ngeimi nih cun zaangfahnak a ngeih kha a tuahsernak in a langhter ti kha a kan cawnpiak. Hnulei sining, miphun le ram an i khah lo hmanhah harnak a tongmi kha a herh ningin a bawmh. Mi cungah dawtnak a ngeimi nih cun mi nih ka cungah tuah hna seh ti a duh bantukin midang cung zongah a tuah ve.—Matthai 7:12.

Samaria mi pawl cu Judah chaklei ah a ummi an si. Judah mi le Judah mi a si lomi hna nih an hrinmi tefa hna zong an i tel.

Kumzabu pakhatnak a phanh tikah Samaria mi hna nih anmah tein biaknak an dirh. Hebru Baibal chung i a hramthawk uknga nak tiang lawng kha an cohlan i a dang kha cu an cohlang lo.

Jesuh chan lioah Judah mi hna nih Simaria mi kha an nek hna i pehtlaihnak an tuah duh hna lo. (Johan 4:9) Judah mi cheukhat nih nihsawhnak phun in “Samaria” timi biafang kha an hman.—Johan 8:48.

Samaria miṭha pa tahchunhnak cu a cang taktakmi a si maw, si lo timi kong cu Baibal ah a um lo. Asinain Jesuh nih phung a chim tikah mi nih an hngalhmi phunglam le hmunhma hna kha a chim tawn. Cucaah a bia a ngaitu hna nih a chim duhnak kha an theihthiam.

Mah tahchunhnak chung i a konglam a dikthliar cu tuanbialei zongin a hmaan. Tahchunhnak ah:

• Jerusalem in Jeriko kalnak lam cu kilometer 20 (meng 12) leng a sau i kilometer 1 (meng 0.6) tiang hrawng a chuk. Khual a tlawngmi hna Jerusalem in Jeriko ah ‘an vung kal’ tiah tuanbia nih fiang tein a langhter.—Luka 10:30.

• Jeriko khua ah a ummi tlangbawi hna le Levi mi hna cu mah lam in Jerusalem ah an kal lengmang.

• Damiah pawl nih mi tlungkal an tlawmnak mah lam ah a hleiin anmah lawngin khual a tlawngmi kha an thil chuh awkah an bawh tawn hna.