Baibal nih biakhiahnak tuah ning kong he aa tlaiin a ṭha tukmi lamhruainak a kan pek. Mah nih ‘fimnak [le] hngalhthiamnak kha cawn’ awkah a kan bawmh khawh. (Phungthlukbia 4:5) Thil sining cheukhat ahcun Baibal nih zeidah a ṭha bikmi biakhiahnak a si ti kha a kan chimh. Asinain a dang thil sining ahcun a ṭhami biakhiahnak tuah awkah a kan bawm khomi ruahnak tu a kan cheuh.

Hi capar ah

•  A ṭhami biakhiahnak tuah awkah a kan bawm khomi ruahnak cheuhnak hna

•  Ka tuah ciami biakhiahnak kha ka thlen awk a si maw?

•  Thlen khawh a si ti lomi a ṭha lomi biakhiahnak ka tuah sual ah tah zeitin?

•   Khulrang tuk in biakhiahnak tuah hlah. Baibal nih hitin a ti: “Mifim nih cun a lamh ding kha ṭha tein a zoh.” (Phungthlukbia 14:15) Khulrang tuk in biakhiahnak na tuah ahcun a biapimi thil kha hmuh loin na um kho. Cucaah naa thimmi kong kha a caanpe in ṭha tein ruat.—1 Thesalon 5:21.

•   Na lung duhnak asiloah na intuarnak cungah i ngat in biakhiahnak tuah hlah. Baibal nih kan lungthin cu a zungzal in zumh khawh a si lo tiah ralrin a kan pek. (Phungthlukbia 28:26; Jeremiah 17:9) Tahchunhnak ah, kan thin a hun lio, kan lungre a theih lio, kan lung a dongh lio, kan thin a tawi lio asiloah kan tha a bat lioah a ṭhalomi biakhiahnak kan tuah khawh men.—Phungthlukbia 24:10; 29:22.

•   Fimnak caah thlacam. (Jeim 1:5) Pathian nih cu bantuk thlacamnak kha a ngaih. Anih cu a fale buaibainak tonter a duh lomi zawnruahnak a ngeimi Pa bantuk a si. “Bawipa nih cun fimnak kha a pek hna i hngalhnak le hngalhthiamnak kha a cawnpiak hna.” a (Phungthlukbia 2:6) A bik in mah fimnak kha a Bia, Baibal hmangin a kan pek.—2 Timote 3:16, 17.

•   Hlathlainak tuah. A ṭhami biakhiahnak tuah khawh awkah zumhawk a tlakmi a konglam a herh. Baibal nih “mifim zong nih an ngaih ahcun an fimnak a ṭhang lai” tiah a ti. (Phungthlukbia 1:5) Bawmtu a simi le zumhawk a tlakmi a konglam kha khoika ah dah na hmuh khawh?

   Pakhatnak, na ruahmi kong he aa tlaiin Baibal nih zeidah a chim ti kha zoh. A kan Sertu nih kan caah a ṭha bikmi kha a hngalh caah a Bia ah zumhawk a tlakmi lamhruainak kha a kan pek. (Salm 25:12) Cheukhat biakhiahnak caah cun Baibal nih zeidah kan tuah awk a si ti kha upadi le nawlbia in fiang tein a kan chimh. (Isaiah 48:17, 18) Asinain a dang kong ahcun Baibal nih cuset khaset tiin a chim lo. Mah canah Baibal phunglam in lam a kan hruai. Mah nih midang biakhiahnak he aa lawh lo hmanhah a ṭhami biakhiahnak tuah awkah a kan bawmh khawh. Aa pehtlaimi Baibal caang pawl kawl awkah mah website ah man loin hmuh khawh a simi Baibal hrambunhmi cauk asiloah capar hna kha hlathlai. b

   Cheukhat biakhiahnak caah cun a konglam i zumhawk a tlakmi a dang a hrampi kha na dothlat a hau kho men. Tahchunhnak ah, a hleiin a man a fakmi thil pakhat na cawk hlanah mah thilri kong le a chuahtu kong, aamahkhannak a um le um lo kong le khirh ṭhan a ngah maw, ngah lo timi kong hna kha na hlathlai awk a si. Cun mah thilri cu na duh taktakmi a si le si lo zong kha ṭha tein na dothlat a hau.

   Baibal nih “ruahnak i cheuhnak a um lo ahcun khuakhannak kha a pingah a kal tawn” tiah a ti. (Phungthlukbia 15:22) Cucaah biakhiahnak na tuah hlanah zumhawktlak a simi hna he i ruahceihṭi u. Tahchunhnak ah, ngandamnak kong he aa tlaimi a si ahcun siibawi he i ruahceihṭi a hau. (Matthai 9:12) Cheukhat thil sining ahcun nangmah bantukin a tong vemi hna he nan i ruahceihṭi kho. Asinain biakhiahnak a tuah dingmi cu nangmah na si i a phichuak zong nangmah nih na in lai ti kha philhhlah.—Galati 6:4, 5.

•   A kong dihlak kha ruat. Na theihmi a konglam cungah i hngat in a dang naa thim khawhmi kong hna le a ṭhatnak le a chiatnak kong hna kha cazin tuah. Cun na biakhiahnak ruangah a chuak khomi thil kong kha ṭha tein ruat. (Deuteronomi 32:29) Tahchunhnak ah, na biakhiahnak nih nangmah, na chungkhar asiloah midang kha zeitindah a hnorsuang khawh hna? (Phungthlukbia 22:3; Rom 14:19) Baibal phunglam cungah hrambunh in mah biahalnak hna hi na leh ahcun a ṭhami le dawtnak aa telmi biakhiahnak na tuah khawh lai.

•   Biakhiahnak tuah. A fiang lo tiah kan ruah caah a caan ah biakhiahnak tuah kha kan i harh men lai. Asinain biakhiahnak tuah loin kan um ahcun tinvo sung kha kan sung kho asiloah thil sining cu a chia chin kho. Phundang in cun zeihmanh tuah loin um cu a ṭha lomi biakhiahnak tuah bantuk a si. Baibal nih mah thil sining kha lo thlawh he a tahchunhnak thawngin mah kong kha hngalhthiam awkah a kan bawmh. Hitin a ti: “Thlitu le nikhua an ṭhat tiang na ngan peng ko ahcun thlaici zeihmanh na tuh bal lai lo i zeihmanh na zun bal pek fawn lai lo.”—Phungchimtu 11:4, Good News Translation.

 A ṭha bik in bia kan khiahmi a si hmanhah a tlingmi biakhiahnak a si men lai lo ti kha i cinken. Pakhatkhat kan i thim tikah kan hlawtmi zong a um. Mah lengah kan i ruahchan lomi thil zong kan tong kho men. (Phungchimtu 9:11) Cucaah a ṭha bikmi a konglam kha hmang law a hlawh a tling dingmi biakhiahnak kha i thim.

 Biakhiahnak dihlak cu a donghnak a si tinak a si lo. Na sining cu aa thleng kho asiloah a hmasa ah na tuahmi biakhiahnak ruangah naa ruahchan lomi thil hna a chuak kho. Cucaah thil sining kong kha ruat ṭhan law a ṭhami a phichuak a si kho dingmi a dang pakhat kha i thim awkah biakhiahnak na tuah khawh.

 Asinain thlen awk a si lomi cheukhat biakhiahnak zong a um. (Salm 15:4) Tahchunhnak ah, Pathian nih aa ṭhiummi nuva hna nih ṭhitum biakamnak kha zul peng hna seh ti a duh. c (Malakhi 2:16; Matthai 19:6) Cucaah an chungkhar ah buaibainak a um tikah i ṭhen loin a si khawh chungin an tawnghthamṭi awk a si.

 Caankhatkhat ah kan dihlak in a ṭhalomi thil asiloah hrut ngaiin biakhiahnak kan tuah tawn. (Jeim 3:2) Mah tikah kan i ngaichih asiloah sualnak kan ngei tiah kan ruahmi cu a phung a si ko. (Salm 69:5) Cu bantuk ruahnak kan ngeihmi nih mah bantuk palhnak kha tuah ti lo awkah a kan bawmh khawh. (Phungthlukbia 14:9) Asinain Baibal nih lungretheih tuk lo awkah ruahnak a kan cheuh. Lungretheihnak nih ṭha tein khua a kan ruahter khawh lo caah a si. (2 Korin 2:7) d Baibal nih ‘Jehovah cu zaangfahnak le dawtnak in a khat’ tiah a ti. (Salm 103:8-13) Cucaah na thlen khawh ti lomi a ṭha lomi biakhiahnak in cawng law thil sining kha a ṭhat deuh nakhnga i zuam.