Baibal nih vawlei cu a per tiah a kan cawnpiak lo. a Baibal cu science lei cauk a si lo. Asinain science fimnak he aa kalhnak a um lo. Baibal chimmi cu “zungzal in an hmun.”​—Salm 111:8.

•  Baibal nih “vawlei ki li” a ti tikah zei sullam dah a ngeih?

•  Satan nih Jesuh a tukforhnak he aa tlaiin tah zeitin?

Baibal ah hmanmi “vawlei ki li” le “vawlei kil kip” timi biafang kha a ca ningin lak khawh a si lo, cutin lak a si ahcun vawlei cu ki li a ummi asiloah a donghnak a ummi bantuk a si lai. (Isaiah 11:12; Job 37:3) Mah bia cu vawlei pumpi dihlak kha langhternak caah hmanmi a si. Nichuah, nitlak, chaklei, thlanglei tiin hmun li caah a hman duhmi a si.​—Luka 13:29.

“Ki li” asiloah “kil kip” tiah lehmi Hebru biafang cu “a deng” timi biafang cungah i hngat dawh a si. Cauk pakhat nih [The International Standard Bible Encyclopedia] “va pakhat i a thla cu a fale khuhnak ah a hman caah [mah Hebru biafang] aa samh khawhnak dihlak kha a chim duhmi a si” tiah a ti. Job 37:3 le Isaiah 11:12 i hmanmi “biafang nih rilikam, ramri asiloah vawleicung pumpi kha a chim duhmi a si” ti zongin a ti. b

Jesuh tukforh awkah “Khuachia nih cun Jesuh cu tlang sang ngaingaimi pakhat ah a kalpi i vawleicung peng le ram vialte le an sunparnak vialte kha a hmuhsak dih.” (Matthai 4:8) Mah Baibal kong nih hmun pakhat in vawlei pumpi hmuh khawh a si timi langhternak nih vawlei a per tiah a kan cawnpiak tiin mi cheukhat nih an ti. Mah Baibal caang i “tlang sang ngaingaimi” timi cu a um taktakmi si loin langhternak si dawh a si. Cutin biachahnak tuah a sinak a ruang kha zoh hna u sih.

• Vawleicung pennak vialte hmunkhat ah hmuh khawh a sinak tlang cu hi vawlei ah a um lo.

• Satan nih Jesuh kha pennak lawng si loin “an sunparnak” zong a hmuhsak. Cu bantuk thil hna cu lam hlat in hmuh khawh a si lo, cucaah Satan nih langhnak phun pakhatkhat hmangin Jesuh kha a hmuhsakmi si dawh a si. Mah cu projector le screen hmangin vawleicung hmun a phunphun i hmanthlak hna hmuhsak bantuk khi a si kho men.

• Mah kong a langhter vemi Luka 4:5 nih Satan nih Jesuh cu “chikkhatte ah khin vawleicung ram vialte kha a hmuhsak dih” tiah a ti. Minung mit in vawleicung ram vialte kha chikkhat ah zoh khawh ti cu a si kho lomi a si. Cucaah Satan nih lam pakhatkhat hmangin Jesuh kha a tukforh tiah ti khawh a si.