Armageddon raldohnak timi cu minung cozah le Pathian karah a ummi hmanung bik raldohnak kha a si. Minung cozah le an sin i a ṭangmi hna nih Pathian uknak an cohlan lonak thawngin atu hmanhin Pathian kha an ralchanh. (Salm 2:2) Armageddon raldohnak nih minung uknak kha a donghter cang lai.​—Daniel 2:​44.

 “Armageddon” timi biafang kha Baibal ah Biathlam 16:16 ah voikhat lawng hmuh a si. “Vawleicung siangpahrang vialte” cu “Lianngan Bik Pathian ni lianngan ni ah” pakhat le pakhat i doh dingin hmunkhat ah an i pum. “Cu hmun cu Hebru holh in Armageddon ti a si.”​—Biathlam 16:14.

 Armageddon ah ahote dah aa do lai? Jesuh Khrih nih vancung ralkapbu kha a hruai hna lai i Pathian ral pawl kha a hrawh dih hna lai. (Biathlam 19:11-​16, 19-​21) Mah ral lakah Pathian nawlngeihnak a ralchanhmi le Pathian zei i a rel lomi an i tel.​—Ezekiel 39:7.

 Armageddon raldohnak cu Nichuah Laifang ah a si lai maw? A si lai lo. Armageddon raldohnak cu hmun pakhat lawngah si loin vawleicung pumpi ah a tlung dingmi a si.​—Jeremiah 25:32-​34; Ezekiel 39:17-​20.

 A caan ah “Har–​Magedon” (Hebrew Har Meghiddohnʹ) tiah lehmi Armageddon timi cu “Megiddo Tlang” ti sullam a ngei. Megiddo khua cu hlanlio Israel ram i khua pakhat a si. Mah khua pawngah teinak le sunghnak a hliahmi raldohnak hna a rak um ti kha tuanbia nih an langhter. Baibal ah hmuhmi raldohnak cheukhat zong cuka ah a rak si. (Biaceihtu 5:​19, 20; 2 Siangpahrang 9:​27; 23:29) Asinain Armageddon raldohnak cu hlanlio Megiddo khua pawngkam ah a si lai lo. Cuka ah a ngan i a rawnmi tlang a um lo. Pathian a domi ral vialte an i pumh ahcun Jezreel Nelrawn tiang hmanhah an i tlum lai lo. Cucaah Armageddon timi cu Pathian uknak kha hmanung bik tiang ralchanh dingin miphun pawl an i pumhmi vawlei thil sining kha a si.

 Armageddon raldohnak ah zeidah a cang lai? Pathian nih a ṭhawnnak zeitindah a hman lai ti kha kan hngal lo. Asinain hlanah a rak hmanmi hriamnam pawl kha Armageddon zongah a herh ningin a hman khawh. Mah hriamnam hna lakah​—rial, lihnin, tilian, mei le kat, ṭek le zawtnak hna an i tel. (Job 38:22, 23; Ezekiel 38:19, 22; Habakkuk 3:​10, 11; Zekhariah 14:12) Pathian ral pawl cu anmahle anmah i tuai-ur in an i that lai. Asinain anmah a dotu taktak cu Jehovah Pathian a si kha a donghnak ah an hngalh lai.​—Ezekiel 38:21, 23; Zekhariah 14:13.

 Armageddon raldohnak ruangah vawlei hi a rawk dih lai maw? Hi vawlei cu minung nih zungzal in an umnak ding hmun a si caah a rawk lai lo. (Salm 37:29; 96:10; Phungchimtu 1:4) Armageddon raldohnak ah mi vialte cu an thi dih lai lo. Pathian salle a simi “mibu nganpi” cu a nung in an luat lai.​—Biathlam 7:​9, 14; Salm 37:34.

 Asinain Baibal nih “vawlei” timi biafang kha hi vawlei taktak ca i a hman lengah a caan ah Pathian a ralchanhmi misual pawl ca zongah a hman tawn. (1 Johan 2:​15-17) Cu bantukin Armageddon raldohnak ruangah “hi vawlei donghnak” a phan lai.​—Matthai 24:3, King James Version.

 Armageddon raldohnak cu zeitik ah dah a si lai? ‘Harnak nganpi’ i a zik a simi Armageddon raldohnak he aa tlaiin Jesuh nih hitin a chim: “Asinain cu ni le cu caan cu zeitik ah dah a si lai ti kha ahohmanh nih an hngal lo; vancungmi zong nih an hngal lo, Fapa zong nih a hngal hlei lo, Pa lawnglawng nih a hngalh.” (Matthai 24:21, 36) Asinain Armageddon raldohnak cu 1914 in aa thawkmi, mit in hmuh khawh lomi Jesuh ratnak caan chungah a si lai ti kha Baibal nih a langhter.​—Matthai 24:37-​39.