Pathian nih hmasa bik mipa le minu a ser hna hnuah a ṭhitumter hna. Ṭhitumnak timi cu a fekmi chungkhar pakhat dirh awkah nu le pa kar ah a ummi pehtlaihnak kha a si.—Genesis 1:27, 28; 2:18.

 Pathian nih aa ṭhiummi nuva cu i nuam hna seh ti a duh. (Phungthlukbia 5:18) Baibal ah innchungkhar hlawhtlin awkah a bawm khomi phunglam pawl a um.

Hi capar ah

•  Aa ṭhiummi hna caah Pathian phunglam cu zei hna dah an si?

•  I ṭhennak le a dang tein umnak kong he aa tlaiin zeidah a chim?

•  Pathian mithmai ṭha hmuh awkah upadi ningin i ṭhitum a hau maw?

•  Baibal nih vale le nupile kha zei rian dah a pek hna?

•  Tuchan ah aa ṭhiummi nuva hna kha Pathian nih fa ngeih dingin a hal hna maw?

•  Kan chungkhar kha Baibal nih zeitindah a kan bawmh khawh?

•  Ṭhitumnak kong he aa tlaimi Baibal caang hna

 A hramthawk tein Pathian nih minu pakhat le mipa pakhat kha a fonh hna i a ṭhitumter hna. (Genesis 2:24) Pathian nih nupi tampi ṭhit, ngeihkhat sualnak tuah le i ṭhitumnak tuah loin hmunkhat ah umṭi hna kha a duh lo. (1 Korin 6:9; 1 Thesalon 4:3) Jesuh nih a zultu pawl kha ṭhitumnak he aa tlaiin Pathian i a hrampi phunglam kha zulh dingin a cawnpiak hna.—Marka 10:6-8.

 Pathian nih ṭhitumnak kha zungzal ca in a hmuh. Nu pakhat le pa pakhat nih ṭhitumnak an tuah lioah pakhat le pakhat cungah zumhawktlak tein kan um lai i kan thih tiang hmunkhat ah kan umṭi lai tiah biakamnak an tuah. Pathian nih mah biakamnak kha an fehter peng lai tiah aa ruahchan.—Marka 10:9.

 Chungkhar ca i a biapimi kong he aa tlaiin khual an tlawn tikah nupi le vale cu chikkhat an i ṭhen caan a um kho men. Asinain buaibainak ruangah nuva a dang tein um tu cu Baibal nih tha a pe lo. Mah canah nuva hna cu rem tein umṭi ṭhan awkah an i zuam awk a si.—1 Korin 7:10.

 Baibal nih i ṭhennak nawl a awnhmi cu nulepa sualnak lawng a si. (Matthai 19:9) Innchunghawi zuanzam ruangah si loin innchunghawi he a dang tein a ummi hna asiloah aa ṭhenmi hna cu midang he i ṭhitum asiloah i duh khawh a si lo.—Matthai 5:32; 1 Korin 7:11.

 Pathian nih Khrihfa hna nih ṭhitumnak he aa tlaiin vawlei lei upadi kha zul hna seh ti a duh. (Titas 3:1) Nuva hna nih upadi ningin ṭhitumnak an tuah tikah vawlei nawlngeitu pawl an upat hna an langhtermi a si. Cun ṭhitumnak cu zungzal ca a si timi Pathian phunglam an upat ti an langhtermi zong a si. a

•   Rian i bawm u. Nupi le vale cu pakhat le pakhat an i dawt awk le an i upat awk a si. (Efesa 5:33) Nupa umṭinak he aa tlaiin pakhat le pakhat dawtnak he an i pehtlaih awk a si i zumhawktlak lomi ziaza hna kha an hrial awk a si. (1 Korin 7:3; Hebru 13:4) Fa an ngeih a si ahcun nuva hna nih an pahnih ningin an zohkhenhṭi hna awk a si.—Phungthlukbia 6:20.

   Nuva hna nih pawcawmnak rian le inn rian kha zeitindah an ṭuan awk a si timi a dikthliar cu Baibal nih a chim lo. Chungkhar caah zeidah a ṭha bikmi a si ti kha biachahnak an tuah khawh.

•   Vale rian. ‘Vale cu nupile lu an si’ tiah Baibal nih a ti. (Efesa 5:23, NW) Amah cu chungkhar lu a si caah a chungkhar kha lamhruainak a pek khawh hna i a nupi le a fale nih ṭhatnak an hmuh nakhnga biachahnak a tuah khawh.

   A chungkhar hna i pumsalei, lungthinlei le thlaraulei an herhmi a pek khawh hna nakhnga aa zuam awk a si. (1 Timote 5:8) Biachahnak hna a tuah tikah a nupi a intuarnak le a ruahnak hna kha ṭha tein a tuaktannak thawngin a nupi he naih tein rian a ṭuanṭi khawh lengah a nupi a upat zong a langhtermi a si. (Phungthlukbia 31:11, 28) Vale nih an rian kha dawtnak he an ṭuan awk a si tiah Baibal nih a ti.—Kolose 3:19.

•   Nupile rian. “Nupile nih nan vale cu nan hmaizah hna” awk a si tiah Baibal nih a ti. (Efesa 5:33) Nupi pakhat nih a rian a simi a vapa a upat tikah Pathian cu a lung aa lawm.

   A vapa nih a ṭhami biakhiahnak a tuah khawh nakhnga a bawmh i a vapa lu sinak tangah aa dor. (Genesis 2:18) Chungkhar ah a rian tlamtling tein a ṭuanmi a man a sungmi nupi kong kha Baibal nih a chim.—Phungthlukbia 31:10.

 A hal hna lo. Hlanlio ah Pathian nih amah a biami cheukhat kha fa ngeih dingin nawl a pek hna. (Genesis 1:28; 9:1) Asinain mah nawl peknak cu Khrihfa he aa pehtlai lo. Jesuh nih a zultu hna kha fa nan ngei lai tiah zeitikhmanh ah nawl a pe hna lo. A hmasa zultu hna zong nih nuva hna nih fa an ngeih hrimhrim awk a si tiah an rak chim bal lo. Nuva hna nih fa kan ngei lai maw, ngei lai lo ti kha anmah tein biachahnak an tuah khawh.

 Nuva hna nih chungkhar ah hlawhtlinnak an hmuh nakhnga a bawm khomi Baibal phunglam hna a um. Baibal phunglam hna nih harnak hna tei awk le hrial awkah nuva hna kha a bawmh khawh hna.

 Baibal phunglam hna nih nuva kha . . .

•   dawtnak taktak langhter awk.—1 Korin 13:4-7; Kolose 3:14.

•   lung i khahlonak kha tawngtham awk.—1 Korin 10:24.

•   ṭha tein bia a ngaimi si awk.—Jeim 1:19.

•   upatnak langhter awk.—Rom 12:10.

•   i ngaihthiam awk.—1 Peter 4:8.

•   zumhawktlakmi si awk.—Marka 10:9.

•   a lungsaumi si awk.—Efesa 4:2, 3.

•   hmunkhat ah rian ṭuanṭi awk.—Phungchimtu 4:9.

•   an biakamnak fehter awkah a bawmh khawh hna.—Solomon Hla 8:7.