Hlanlio Israel mi cu a hmaanmi biaknak bawmhnak caah kumkhat chung an hmuhmi tangka chungin cheu hra cheu khat a kha thawhlawm in pek awkah hal an si. Pathian nih hitin a ti hna: “Kum fatein lo in a chuakmi nan thlaici theipar vialte cu cheu hra ah cheu khat nan pekchanh lai.”—Deuteronomi 14:22.

 Hlanlio Israel mi sin pekmi Moses Nawlbia ah cheu hra cheu khat pek ding timi nawlbia aa tel. Khrihfa hna cu Moses Nawlbia tangah kan um ti lo caah cheu hra cheu khat pek a hau lo. (Kolose 2:13, 14) Mah canah “nanmah le nan lungthin nan i thleh ning cio in rak tho u, nan thawh tikah i ngaihchih bu le hnekchom in si hlah seh, lunglawm tein a thomi kha Pathian nih a dawt hna” timi Baibal bia ningin Khrihfa a simi nih thawhlawm kan pek.—2 Korin 9:7.

•  Biakam Hlun Baibal ah aa telmi cheu hra cheu khat

•  Biakam Thar Baibal ah aa telmi cheu hra cheu khat

 Biakam Hlun tiah auhmi Baibal ah cheu hra cheu khat kong voi tampi a langhter. Thil sining tam deuh cu Moses sinin Israel miphun nawlbia pek an si hnu, caan he aa pehtlai. Asinain thil sining pahnih tu cu nawlbia pek an si hlan, caan he aa pehtlai.

Moses Nawlbia pek an si hlan

 Cheu hra cheu khat a rak pe hmasa bikmi cu Abram (Abraham) a si. (Genesis 14:18-20; Hebru 7:4) Salem siangpahrang Melkhizedek, Cungnung Bik Pathian tlangbawi sinah Abram nih cheu hra cheu khat a pekmi cu voikhat lawng si dawh a si. Abraham le Abraham fale nih cheu hra cheu khat an pek ṭhan ti a langhtertu thil Baibal ah hmuh a si lo.

 A pahnihnak cheu hra cheu khat a rak pemi cu Abraham i a tupa Jakob a si. Pathian nih thluachuah na ka pek ahcun ka hmuhmi “thil vialte cheu hra ah cheu khat kaan pek lai” tiah bia aa rak i kam. (Genesis 28:20-22) Baibal lei mifim cheukhat chimmi ningin Jakob nih a pekmi cheu hra cheu khat cu saram raithawinak a si kho men. Jakob nih a biakam ningin cheu hra cheu khat a rak pek peng ko nain a chungkhar pawl kha cheu hra cheu khat pek ve dingin a fial bal hna lo.

Moses Nawlbia pek an si hnuah

 Biaknaklei rianṭuannak bawmh khawhnak lam pakhat in cheu hra cheu khat pek awkah hlanlio Israel mi cu hal an rak si.

•   Cheu hra cheu khat cu caantling in biaknaklei rian a ṭuanmi Levi mi le tlangbawi pawl bawmhnak caah pekmi a si. Annih cu cinthlaknak caah vawlei ro an ngei lo. (Nambar 18:20, 21) Tlangbawi rian a ṭuan lomi Levi mi nih mi pawl sinin cheu hra cheu khat kha an lak. An hmuhmi “cheu hra cheu khat chungin cheu hra cheu khat kha” tlangbawi pawl caah an pek ṭhan.—Nambar 18:26-29.

•   Kum fatin pekmi cheu hra cheu khat a dang phun zong um dawh a si. Mah in Levi mi he, Levi miphun a si lomi hna he ṭhatnak an hmu. (Deuteronomi 14:22, 23) Israel chungkhar hna nih mah cheu hra cheu khat kha a hleikhunmi puai hna ah an rak hman. Cheukhat kum hna ahcun sifakmi pawl bawmhnak caah mah kha an rak hman.—Deuteronomi 14:28, 29; 26:12.

 Cheu hra cheu khat cu zeitindah rel a si? Israel mi nih kum fatin an lo in a chuakmi theitlai chungin cheu hra cheu khat kha a dang tein an chiah. (Levitikas 27:30) Asinain cheu hra cheu khat kha lo in a chuakmi theitlai in si loin tangka in pek awkah bia an khiah ahcun cheu nga cheu khat bet chap dingin hal a si. (Levitikas 27:31) “Tuurun chungin siseh, cawrun chungin siseh . . . saṭil pahranak paohpaoh” zong kha pek dingin hal an si.—Levitikas 27:32.

 Israel mi nih saṭil run chungin cheu hra cheu khat ca an thim tikah kiam chungin a chuakmi a pahranak saṭil paohpaoh kha a dang tein a chiah lai. A dang tein a chiahmi saṭil kha a ṭhat, a chiat a dothlat lai lo; a thlen zong a thleng lai lo; tangka zongin tlanh khawh a si lai lo tiah Nawlbia nih a langhter. (Levitikas 27:32, 33) Asinain kum fatin tuahmi puai hna ah hmanmi a dang cheu hra cheu khat tu cu tangka in thlen khawh a si. Mah cu puai zawh awkah lamhlapi in a rami Israel mi hna caah a fawi deuh nakhnga timhtuahpiakmi a si.—Deuteronomi 14:25, 26.

 Cheu hra cheu khat cu zeitik ah dah pek a si? Israel mi nih kum fatin cheu hra cheu khat kha an pek. (Deuteronomi 14:22) Asinain a kum sarihnak kum ahcun aa thleidang. Mah kum cu sabbath kum asiloah Israel mi nih zei bantuk cintlaknak hmanh an tuah lo kum, dinh zirziarnak kum a si. (Levitikas 25:4, 5) A hleikhunmi mah thil sining ruangah cheu hra cheu khat pek a um lo. Sabbath kum, kum sarih chungin a kum thumnak le a kum ruknak paohah Israel mi nih a dang phun cheu hra cheu khat kha an rak put i sifakmi le Levi mi kha an cheuh hna.—Deuteronomi 14:28, 29.

 Cheu hra cheu khat an pek lo ahcun zeitindah dantat an si? Moses Nawlbia ah cheu hra cheu khat an pek lo ahcun zeitindah dantat an si lai ti kha a langhter lo. Cheu hra cheu khat an pekmi cu mah lungtho tein pekmi a si. Israel mi nih Pathian hmaiah cheu hra cheu khat kan pek cang, cucaah thluachuah rak kan pe tiah an rak hal. (Deuteronomi 26:12-15) Pathian nih cheu hra cheu khat a pe lomi hna kha a sinin a firmi bantukin a hmuh hna.—Malakhi 3:8, 9.

 Cheu hra cheu khat pek cu thilrit a si maw? A si lo. Pathian nih Israel mi kha cheu hra cheu khat nan pek ahcun zeihmanh bau loin thluachuah kaan pek hna lai tiah bia a kamh hna. (Malakhi 3:10) Cheu hra cheu khat an pek lo tikah Israel mi cu harnak an rak tong. Pathian thluachuah kha an rak sung. Tlangbawi le Levi mi nih pumsalei rian hna an rak ṭuan caah biaknaklei in Israel mi kha an bawm kho ti hna lo.—Nehemiah 13:10; Malakhi 3:7.

 Jesuh vawleicung a um lioah Pathian a biami hna nih cheu hra cheu khat pek an hau rih. Asinain Jesuh a thih tikah mah halmi cu hrawh a rak si.

Jesuh chan lioah

 Jesuh vawleicung a um lioah Israel mi cu cheu hra cheu khat an pe rih tiah Biakam Thar Baibal nih a langhter. Israel mi cu cheu hra cheu khat pek awkah rian an ngei ti kha Jesuh nih a hngalh. Asinain biaknaklei hruaitu hna cu thil hmetete tiangin cheu hra cheu khat kha an pek ko nain Jesuh nih “dinnak le mi zaangfahnak le zumhtlakmi sinak hna cu zeihmanh ah nan rel ṭung lo” tiah a rak mawhchiat hna.—Matthai 23:23.

Jesuh a thih hnuah

 Jesuh a thih hnuah cun cheu hra cheu khat pek a hau ti lo. Raithawinak caah Jesuh a thihnak nih ‘cheu hra cheu khat kholhnak nawlbia’ i telin Moses Nawlbia vialte kha a donghter dih cang.—Hebru 7:5, 18; Efesa 2:13-15; Kolose 2:13, 14.