Hawikom pawl nih a nuammi le hlawh a tlingmi nunnak ngeih awkah a kan bawmh khawh. Hawikom ṭha cu pakhat le pakhat cungah a ṭhami huham an i ngei i mi ṭha si deuh awkah an i bawm.—Phungthlukbia 27:17.

 Asinain Baibal nih hawikom ralring tein i thim awkah tha a kan pek. Miṭhalo pawl he i hawikomhnak ruangah a chuak khomi ṭhatlonak kong zong kha ralrin a kan pek. (Phungthlukbia 13:20; 1 Korin 15:33) Cu bantuk hawikom pawl nih mi pakhat kha a ṭhalomi biakhiahnak an tuahter khawh asiloah a ṭhami a ziaza zong kha an hrawh khawh.

Hi capar ah

•  Zeitindah hawikom ṭha na si khawh?

•  Baibal ah hawikom ṭha a simi ahote kong dah a langhter?

•  Minung cu Pathian he hawikom an si kho maw?

•  Hawikom sernak kong he aa tlaimi Baibal caang hna

 Baibal nih hawikom ṭha pawl i an i hawikomhnak cu an duhmi le an huammi aa khahmi nakin a thuk deuhmi thil cungah hram aa bunh awk a si tiah a kan cawnpiak. Tahchunhnak ah, Salm 119:63 ah hitin a ti: “Na a rian a ṭuanmi hna cu ahohmanh an si ah ka hawikom an si, na phunglam a zulmi hna i an hawikom ka si.” Mah Baibal ṭialtu nih Pathian lunglawmhter lai lo kha a ṭih i Pathian phunglam ningin nun a duhmi hna kha hawikom ah aa thim hna ti kha i cinken.

 Hawikom ṭha pakhat nih a ngeih awk a simi sining kong zong kha Baibal ah a langhter. Tahchunhnak ah:

•   “Hawikom nih cun zeitik paohah dawt zungzal a si, u le nau cu harnak i hrawm awkah hrin kan si.”—Phungthlukbia 17:17.

•   “Hawikom a cheukhat cu pakpalawng biachim lawngah an ṭhahnem, sihmanhsehlaw unau nakin a fek deuhmi hawikom zong an um ve.”—Phungthlukbia 18:24.

 Mah Baibal caang hna nih hawikom ṭha cu zumhawk a tlak, dawtnak a ngei, zaangfahnak a ngei i a siang ti kha a kan cawnpiak. Hawikom ṭha timi cu harnak kan ton caan ah bawmh awkah timhcia in a ummi pakhat kha a si. Hawikom ṭha nih cun thil ṭhalo kan tuah tik asiloah a ṭhalomi biakhiahnak kan tuah tikah chimh awkah ralṭhatnak zong a ngei.—Phungthlukbia 27:6, 9.

 Baibal ah an kum, an hnulei sining, an nunphung le an nawlngeihnak aa khat lo nain hawikom ṭha a simi pawl kong kha a langhter. Mah lakah pathum in zohhmanh hna u sih.

•   Ruth le Naomi. Ruth cu Naomi monu a si i an kum zong aa thlau tuk lai ti cu a fiang ko. Mah lengah Ruth le Naomi cu an hnulei sining zong aa khat lo. Cu bantukin an i theidannak a um ko nain annih cu aa daw tukmi hawikom ṭha an rak si.—Ruth 1:16.

•   David le Jonathan. Jonathan cu David nakin kum 30 a upa deuh ko nain Baibal nih David le Jonathan cu ‘a fekmi hawikomhnak an ngei’ tiah a ti.—1 Samuel 18:1, NW.

•   Jesuh le a lamkaltu pawl. Jesuh cu an saya le an bawipa a si caah a lamkaltu pawl cungah nawlngeihnak a ngei. (Johan 13:13) Asinain Jesuh nih a hawile si awkah an i tlak lo tiah a hmu hna lo. Mah canah Jesuh cu a cawnpiaknak a zulmi hna he a fekmi hawikomhnak a ngei. Hitin a ti: “Ka Pa sinin ka theihmi vialte kha kaan chimh dih hna caah ka hawile ti tu ah kaan ti cang hna.”—Johan 15:14, 15.

 An si kho ko. Minung cu Pathian he hawikom kan si kho. Baibal nih hitin a ti: “Miding cu Pathian nih a zumhmi an si.” (Phungthlukbia 3:32) Phundang in cun Pathian nih miṭha mi, a dingfelmi, upat awk a tlakmi si awkah aa zuammi hna le a hmaan, hmaan lo kong ah a phunglam ningin nun awkah aa zuammi hna kha hawikom ah a thim hna tinak a si. Tahchunhnak ah, Baibal nih zumhfekmi pa Abraham kha Pathian hawi tiah a auh.—2 Chanrelnak 20:7; Isaiah 41:8; Jeim 2:23.