Baibal Cu Thlen A Si Maw?

AWNG

A si lo. Kum thong tampi chung Baibal kha a rawh a fawimi thilri hna hmangin an rak tlen thluahmah ko nain hlanlio kut in ṭialmi Baibal he tahchunh tikah a hrampi biatak cu aa thleng lo.

Mah cu an tlen tikah an palhnak a um lo tinak a si maw?

Hlanlio kut in ṭialmi Baibal thong tampi hmuh a si. Mah ah aa lawh lonak cheukhat a um caah an tlen tikah an palhnak a um ti cu a fiang ko. Aa lawh lonak cu tlawmpal lawng a si i a sullam cu aa thleng lo. Biatak tein aa dannak cheukhat cu Baibal biatak merh a duhmi Baibal tlengtu cheukhat nih hramhram in an telh chihmi bia hna ruangah a si. Tahchunhnak pahnih in zoh hna hmanh u sih:

Kuatkhat Johan 5:7 kha hlanlio Baibal lettu cheukhat nih hitin an leh: “Vancung ah kan Pa, Bia le Thiang Thlarau tiin tehte pathum an um i an pathum in an i khat dih.” Asinain zumh awk tlakmi kut in ṭialmi ca he tahchunh tikah mah bia cu a hrampi Baibal ah aa tel lo ti kha kan hngalh. Mah bia cu a hnuah an bet chommi a si. a Cucaah tuchan i zumh awk tlakmi Baibal lehnak hna ahcun an telh ti lo.
Pathian pumpak a min kha hlanlio kut in ṭialmi Baibal ah voi thong tampi aa tel. Asinain Baibal lehnak tampi nih Pathian min canah “Bawipa” asiloah “Pathian” ti bantukin an airolh.

A dang palhnak hna a um lo tiah zeicah kan chim khawh?

Atu ah kut in ṭialmi Baibal tampi an hmuh cang caah palhnak a um maw, um lo ti kha a hlan nakin kawl awkah a fawi deuh cang. b Mah ca hna le atu kan hmanmi Baibal tahchunh tikah Baibal a hmaannak kong he aa tlaiin zeidah kan hngalh?

Hebru Baibal (“Biakam Hlun” tiah auhmi) kong he aa tlaiin Baibal lei mifim William H. Green nih hitin a ti: “Baibal bantukin a hmaan ning tein tlenmi hlanlio kut in ṭialmi ca a um lo tiah ka chim ngam.”
Khrihfa Greek Baibal asiloah “Biakam Thar” kong he aa tlaiin Baibal lei mifim F. F. Bruce nih hitin a ṭial: “Biakam Thar Baibal cu Greek le Rom caṭialtu hna an ca nakin a let tampi in a hmaan deuh. Asinain Greek le Rom ca a hmaannak kong he aa tlaiin ahohmanh nih alnak an tuah lo.”
Kut in ṭialmi Baibal kong ṭha tein a hngalmi, a min a thangmi mifim Sir Frederic Kenyon nih hitin a ti: “Baibal kha kut ah i tlaih in mah hi kumzabu tampi chung chankhat hnu chankhat a biapimi a kong tlau loin mi sin a phan khomi Pathian Bia biatak a si tiah ahopaoh nih ralṭha tein an chim khawh.”

Baibal a hmaan ti kan zumh khawhnak a dang zei a ruang hna dah a um rih?

Pathian miphun nih an tuahmi sualnak ngan kong kha Judah mi le Khrihfa Baibal tlengtu hna nih hmaan tein an rak tlen. c (Nambar 20:12; 2 Samuel 11:2-4; Galati 2:11-14) Cu bantukin Judah mi hna nawl an ngaih lo ruangah mawhchiat an sinak kong le minung ruahnak kong a langhtermi Baibal caang hna zong a hmaan ning tein an rak tlen. (Hosea 4:2; Malakhi 2:8, 9; Matthai 23:8, 9; 1 Johan 5:21) Mah kong hna a hmaan ning tein an tlenmi nih Baibal tlengtu hna cu zumh awk a tlakmi le Pathian Bia a sunsakmi an si ti kha a lang.
A hramthawk tein Baibal kha a thiang thlarau thawngin a ṭialtertu Pathian nih Baibal a hmaannak kha a kilven peng lai a si ko lo maw? d (Isaiah 40:8; 1 Peter 1:24, 25) Pathian nih hlanlio i minung pawl lawng si loin atu chan i mi zong nih Baibal in ṭhatnak hmu hna seh ti a duh. (1 Korin 10:11) “Cathiang nih lungsaunak le lungthin ṭhawnnak a kan pekmi thawngin ruahchannak kha kan ngeih khawh nakhnga Cathiang chung i aa ṭialmi vialte cu kanmah cawnpiaknak caah a si.”—Rom 15:4.
Jesuh le a zultu hna nih Hebru Baibal kut in ṭialmi ca hna kha zumhnak he an cherhchan.—Luka 4:16-21; Lamkaltu 17:1-3.

a Mah bia kha Codex Sinaiticus, Codex Alexandrinus, Vatican Manuscript 1209, a hrampi Latin Vulgate, Philoxenian-Harclean Syriac Version asiloah Syriac Peshitta hna ah cun an telh lo.

b Tahchunhnak ah, Biakam Thar asiloah Khrihfa Greek Baibal tiah auhmi kut in ṭialmi Greek Baibal 5,000 leng an hmuh cang.

c Baibal nih Pathian a aiawhmi minung hna cu mitling an si tiah a ti lo. Mah canah “a sual lomi minung an um lo” tiah a ti.—1 Siangpahrang 8:46.

d Pathian nih Baibal a ṭialter hna tikah a auh in a auhmi hna si loin an lungthin le an ruahnak kha lam a hruai hna tiah Baibal nih a ti.—2 Timote 3:16, 17; 2 Peter 1:21.