Baibal cu a thiangmi cauk 66 in fonhmi a si. Mah ṭialnak ah kum 1,600 leng hrawng an rau. Baibal ah Pathian sinin a rami “Pathian bia” aa tel.—1 Thesalon 2:13.

Hi capar ah

•  Baibal he aa tlaimi a konglam hna

•  Baibal cu zei kong he dah aa pehtlaih?

•  Baibal cu aa thleng maw?

•  Zeicah Baibal lehnak tampi a um?

•  Baibal ah zeidah telh ding ti kha aho nih dah bia a khiah?

•  Baibal cauk a tlaumi hna a um maw?

•  Baibal caang hna kawl ning

•  Baibal cauk cazin

•   Baibal cu aho nih dah a ṭial? Pathian cu Baibal Ṭialtu Taktak a si nain mah kha ṭial awkah pa 40 hrawng a hman hna. Mah pa hna lak i cheukhat cu Moses, Siangpahrang David, Matthai, Marka, Luka le Johan an si. a Pathian nih a bia ṭialter awkah mah Baibal ṭialtu hna lungthin chungah a ruahnak kha a chiah.—2 Timote 3:16.

   Tahchunhnak ah: Rian ngeitu pakhat nih a cazi pa kha amah aiawh in caṭial a fial i a ruahnak zong a chimh tikah mah ca a ṭialtu taktak cu rian ngeitu kha a si. Cu bantukin Pathian nih a bia ṭial awkah pa pawl a hman ko hna nain Baibal Ṭialtu taktak cu amah a si.

•   “Baibal” timi biafang i a sullam cu zeidah a si? “Baibal” timi cu Greek biafang biblia in a rami a si i “cauk hmetete” ti sullam a ngei. A hnuah biblia cu cauk hmetete dihlak kha hmunkhat ah fonh dihmi Baibal in langhter a hung si.

•   Baibal cu zeitik ah dah ṭial a si? Baibal cu BC 1513 in ṭial a hung si i kum 1,600 leng a rauh hnu, AD 98 hrawngah liim a si.

•   A Hmasa bik rak ṭialmi Baibal cu khoika ah dah a um? A hmasa bik rak ṭialmi Baibal cauk cu an um ti lo. Zeicatiah Baibal ṭialtu hna nih mah lio caan ah rak hmanmi, phaikung (papyrus) le saphaw ti bantuk a rawh a fawimi thil hna an rak hman caah a si. Asinain Baibal lei mifim hna nih kumzabu tampi chung ralring tein le hmaan tein an rak ṭial chin lengmang i hmailei chan i mi pawl nih an rel khawh nakhnga an rak kilven.

•   “Biakam Hlun” le “Biakam Thar” timi cu zeidah a si? Biakam Hlun timi cu Hebru Cathiang ti zongin hngalhmi, Hebru b holh in ṭialmi Baibal cheubang kha a si. Biakam Thar timi cu Khrihfa Greek Cathiang ti zongin hngalhmi, Greek holh in ṭialmi Baibal ṭhen kha a si. Mah ṭhen hnih fonh ah cauk tling pakhat a si i Cathiang ti zongin auh a si. c

•   Baibal ah zei kong dah a um? Baibal ah tuanbia, nawlbia, chimchungbia, biazai, phungthlukbia, hla le cakuat hna aa tel.—“ Baibal cauk cazin” ah zoh.

 Lianngan Bik Pathian nih van le vawlei a sernak kong a tawinak in Baibal cu aa thawk. Pathian nih a min, Jehovah timi kha Baibal in a langhter i mi nih amah an hngalh nakhnga a sawm hna.—Salm 83:18, NW.

 Baibal nih Pathian thangchiat a sinak kong le a min zeitindah a thianter ṭhan lai timi kong kha a fianter.

 Baibal nih minung le vawlei ca i Pathian tinhnak kong kha a langhter. Sifah harnak a chuahtermi thil vialte hmailei ah Pathian nih a hloh lai ning zong a langhter.

 Baibal nih nifa kan nunnak he aa tlaimi ruahnak cheuhnak hna a kan pek. Tahchunhnak ah:

•   Pehtlaihnak ṭha kilvennak. “Mi nih kan cungah tuah hna seh ti nan duh bantuk khan midang cung zongah va tuah ve u.”—Matthai 7:12.

   A sullam: Mi nih rak kan pehtlaih hna seh ti kan duhmi lam in midang kha kan pehtlaih hna awk a si.

•   Lungretheihnak tawnghthamnak. “Thaizing kong ah lungrethei in um hlah u; thaizing nih cun lungretheihnak cu a za in aa ngeih ve ko lai.”—Matthai 6:34.

   A sullam: Hmailei a cang dingmi kong ah a hleihluat tuk in lungretheih canah atu kan tonmi thil sining tu ah lungthin pek cu a ṭha deuh.

•   A nuammi chungkhar ngeihnak. “Vale nih nan nupile cu nan pum nan i dawt bantukin nan dawt hna lai i nupile nih nan vale cu nan hmaizah hna lai.”—Efesa 5:33.

   A sullam: Dawtnak le upatnak cu a nuammi innchungkhar caah a biapi tukmi a si.

 Aa thleng lo. Baibal lei mifim pawl nih hlanlio kut in rak ṭialmi Baibal ca hna kha tuchan Baibal he ṭha tein an tahchunh tikah Baibal i a hrampi a konglam cu aa thleng lo ti kha an hmuh. Pathian nih a bia kha rel hna sehlaw hngalthiam hna seh ti a kan duh ahcun a bia aa thlen lo nakhnga ṭha tein a huhphenh lai ti cu aa tlakmi a si ko lo maw? d—Isaiah 40:8.

 Tuchan mi tampi nih hlanlio holh hna in rak ṭialmi Baibal kha ṭha tein an hngalthiam lo. Asinain Baibal ah “phun kip, ram kip, holh kip” caah “thawngṭha” a um. (Biathlam 14:6) Cucaah mi nih Pathian bia kha an rel khawh i a hmaan ningin an hngalhthiam khawh nakhnga an hngalhthiammi holh in lehmi Baibal an herh.

 Baibal leh ning phun thum a um:

•   A biafang ningin lehnak cu a si khawh chung a ca ningin lehmi kha a si.

•   A sullam ningin lehnak cu a hrampi holh i a sullam a langhtermi biafang hna hman kha a si.

•   Holh phun in lehnak cu rel a nuammi ca a si nakhnga timi tinhnak he zalong tein lehmi kha a si. Asinain holh phun in lehnak cu zalong tuk in lehmi a si caah a ca tam tuk in aa thleng kho i a caan ah a sullam zong aa thleng kho.

 A ṭhami Baibal lehnak timi cu mi nih Pathian bia kha a hmaan ning tein an hngalh khawh nakhnga hngalhthiam a fawimi chanthar holh in le a ca ningin, a tlari tein lehmi a si. e

 Baibal Ṭialtu a simi Pathian nih Baibal ah zeidah telh ding ti kha bia a khiah. A hmasa ah Pathian nih ‘a bia kenter’ awkah hlanlio Israel mi kha a rak thim hna i annih nih Hebru Cathiang kha an rak zohkhenh.—Rom 3:2.

 A um lo. Baibal cu a tling; “a tlaumi” cauk a um lo. Mi cheukhat nih kum tampi chung rak thuhmi hlanlio cauk cheukhat cu Baibal ah aa telmi an si tiah an zumh. f Asinain Baibal chung i a ummi a konglam hna nih a hmaan i a tlingmi cauk a si kha a langhter. (2 Timote 1:13) Pathian thaw chuah hnawhmi Baibal cauk hna cu pakhat le pakhat an i tlak dih. Mi cheukhat an chim bantukin hlanlio rak ṭialmi ca vialte cu Baibal ah aa tel tiah ti khawh a si lo. g