A hau. Pathian nih hmunkhat te ah rak ka bia hna seh ti a duh. Baibal nih hitin a ti: “Pakhat le pakhat kan i dawt khawh nakhnga le thilṭha kan i tuahpiak khawh nakhnga, i bawm tliahmah u sih. Pakhat le pakhat hmunkhat i, i pumh lengmang kha ngol hlah u sih.”​—Hebru 10:24, 25.

 Jesuh nih a zultu pawl cu phu pakhat in ṭha tein dirh an si lai ti kha mah bia a chimmi nih a langhter: “Pakhat le pakhat nan zawn nan i ruah ahcun mi vialte nih, hi hna hi amah a zultu kha an si, tiah an in hngalh hna lai.” (Johan 13:35) Khrih zultu hna nih cu bantuk dawtnak a bik in an langhter khawhnak lam cu hmunkhat ah i pumhṭi kha a si. Cucaah biaknak caah hmunkhat ah hmaan tein i pumhṭi khawh awkah Khrihfabu kha an dirh. (1 Korin16:19) Khrihfabu dihlak fonh tikah vawleicung pumpi unau rual an hung si.​—1 Peter 2:​17.

Biaknak bu pakhat chungah umnak men in a za lo

 Mi pawl cu Pathian biak khawh awkah hmunkhat ah an i pumh awk a si tiah Baibal nih a ti. Asinain mi pakhat cu biaknak bu pakhat chungah umnak men in Pathian lung a tong tiah Baibal nih a kan cawnpiak lo. Pathian cohlanmi a si nakhnga biaknak phunglam kha nifa a nunnak ah a langhter a hau. Tahchunhnak ah, Baibal nih hitin a ti: “Nuhmei, ngakṭah ṭha tein zohkhenh le vawleicung ah thurhnawm lo tein um tu hi Pathian kan Pa nih biaknak thiang le biaknak taktak i a ruahmi cu a si.”​—Jeim 1:​27.