Biaknak Vialte Hi Aa Lo Dih Maw? Pathian Nih Tah A Cohlang Dih Maw?
Baibal a phi
Biaknak vialte hi aa lo dih lo. Baibal ah Pathian nih a cohlan lomi biaknak tampi kong a langhter. Pathian nih a cohlan lonak a ruang pahnih a um.
A ruang 1: A hmaan lomi pathian biaknak
Baibal nih a hmaan lomi pathian biaknak kha “hlennak men,” “pakpalawng,” le “santlai lomi” timi biafang hna in a langhter. (Jeremiah 10:3-5; 16:19, 20) Jehovah a Pathian nih hlanlio Israel mi kha hitin nawl a pek hna: “Keimah hleiin pathian dang zeihmanh nan bia lai lo.” (Exodus 20:3, 23; 23:24) Israel mi nih pathian dang hna an biak tikah ‘BAWIPA thinhunnak cu an cungah a alh.’—Nambar 25:3; Levitikas 20:2; Biaceihtu 2:13, 14.
Tuchan zongah “pathian timi” hna biaknak he aa tlaiin Pathian hmuhnak cu aa thleng rih lo. (1 Korin 8:5, 6; Galati 4:8) Amah a biami hna kha a hmaan lomi pathian a biami hna he i komh lo awkah nawl a pek hna i “annih cu nan kaltak hrimhrim hna lai i an sin cun nan i ṭhen hrimhrim lai” tiah a ti hna. (2 Korin 6:14-17) Biaknak vialte cu aa lawh dih i Pathian nih a cohlan dih ahcun zeicah mah nawlbia cu a pek hna lai?
A ruang 2: Pathian nih a cohlan lomi lam in biaknak
A caan ah Israel mi nih a hmaan lomi biaknak in a rami zumhnak le phunglam hna kha hmangin Jehovah Pathian kha an biak. Asinain a hmaan lomi biaknak he i cawhkalh kha Pathian nih a duh lo. (Exodus 32:8; Deuteronomi 12:2-4) Jesuh nih a chan i biaknaklei hruaitu hna kha Pathian an biak ning he aa tlaiin a mawhchiat hna; biaknak a ṭanhmi bantukin nan i umter i “Nawlbia nih biapi taktak a si a timi dinnak le mi zaangfahnak le zumhtlakmi sinak hna cu zeihmanh ah nan rel ṭung lo” tiah a ti hna.—Matthai 23:23.
Cu bantukin tuchan zongah Pathian nih biatak cungah hram aa bunhmi a hmaanmi biaknak pakhat lawng kha a cohlan. Mah biatak cu Baibal ah hmuh khawh a si. (Johan 4:24; 17:17; 2 Timote 3:16, 17) Baibal he i ralkah in mi a cawnpiakmi biaknak hna nih mi pawl kha Pathian he a hlatter hna. Thumkomh pathian, a thi kho lomi thlarau le zungzal hremnak ti bantuk cawnpiaknak hna cu Baibal ah hram aa bunhmi a si tiah mi tampi nih an ruah. Asinain mah cu a hmaan lomi biaknak in a rami an si. Cutin a cawnpiakmi biaknak nih Pathian halmi kha si loin biaknaklei phungphai tu kha biapi an chiah caah an cawnpiaknak cu “zeihmanh a ṭhahnem lo.”—Marka 7:7, 8.
Pathian nih biaknaklei chungthu lengnal sinak kha a huat. (Titas 1:16) Biaknak nih phunglam le phungphai hna kha si loin nifa nunnak ah ṭhathnemhnak a pek hna awk le Pathian he i naih awkah a bawmh hna awk a si. Tahchunhnak ah, Baibal nih hitin a ti: “Mi pakhatkhat nih kei cu biaknaklei ah aa zuammi ka si, tiah aa ruat ko lai, sihmanhsehlaw a lei kha a uk khawh lo ahcun a biaknak cu pakpalawng a si i amahle amah aa hlengmi a si. Sihmanhsehlaw nuhmei ngakṭah ṭha tein zohkhenh le vawleicung ah thurhnawm lo tein um tu hi Pathian kan Pa nih biaknak thiang le biaknak taktak i a ruahmi cu a si.” (Jeim 1:26, 27) Thurhnawmhnak a um lomi biaknak kha Hakha Baibal ah “biaknak thiang” tiah a leh. A ruang cu a thiang i, i titernak a um lomi biaknak a si ruangah a si.