Buanchukcho cu a um taktakmi a si. Pathian nih miṭhalo pawl hrawh awkah a umtermi a si, asinain miṭha pawl le saram pawl him tein an um khawh nakhnga Noah kha lawng sak a fial. (Genesis 6:11-20) “Pathian thaw chuah hnawhmi” Baibal cauk ah a ummi a si caah Buanchukcho cu a um taktakmi a si tiah kan zumh khawh.—2 Timote 3:16.

•  A um taktakmi asiloah tuanbia maw a si?

•  Zeicah Buanchukcho cu a um?

•  Mi nih Buanchukcho a tlung lai ti kha an hngal maw?

•  Noah sakmi lawng cu zeidah a lawh?

•  Noah nih lawng saknak ah zei can dah a rauh?

•  Buanchukcho tuanbia

Baibal nih Noah le Buanchukcho kong kha tuanbia si loin a um taktakmi in a langhter.

• Baibal ṭialtu hna nih Noah cu a um taktakmi in an cohlan. Tahchunhnak ah, Baibal ṭialtu Ezra le Luka nih tuanbialei kong ṭial awkah ṭha tein hlathlainak an tuah. Israel mi chuahkehnak kong an ṭial tikah Noah aa tel, cucaah Noah cu a rak um taktakmi a si ti a fiang. (1 Chanrelnak 1:4; Luka 3:36 ) Thawngṭha Cauk ṭialtu Matthai le Luka nih Jesuh chimmi Noah le Buanchukcho kong kha an rak ṭial.—Matthai 24:37-39; Luka 17:26, 27.

  Mah lengah profet Ezekiel le lamkaltu Paul nih Noah kha zumhnak le dinnak kong ah zohchunh awk ṭha in an langhter. (Ezekiel 14:14, 20; Hebru 11:7) Tuanbia chung i mi pakhat kha zohchunh awk ṭhami in mah Baibal ṭialtu hna nih an langhter lai maw? Noah le a dang zumhfekmi nu le pa hna cu a um taktakmi an si caah zohchunh awk ṭha an si.—Hebru 12:1; Jeim 5:17.

• Baibal nih Buanchukcho kong he aa tlaiin a dikthliar in a langhter. Buanchukcho kong Baibal tuanbia cu tuanbia sawhsawh bantukin “Hlan lioah” timi bia in aa thawk lo. Mah canah Buanchukcho he aa tlaiin a kum, a thla le a ni kha Baibal nih a langhter. (Genesis 7:11; 8:4, 13, 14) Cun Noah sakmi lawng i a sau, a kauh zong a langhter. (Genesis 6:15) Mah kong hna nih Buanchukcho cu tuanbia men si loin a um taktakmi a si ti kha a langhter.

Baibal nih Buanchukcho hlanah mi cu ‘an ṭhalo tuk hringhran’ tiah a ti. (Genesis 6:5) Vawleicung ah zaangennak le nupa sualnak in a khah caah “Pathian mithmuh ah miṭhalo an si dih” ti zongin a ti.—Genesis 6:11; Judas 6, 7.

Cu bantukin ṭhatlonak a tam tukmi cu a ṭhalomi vancungmi hna nih minung nu hna he an i ṭhitum caah a si tiah Baibal nih a ti. Mah vancungmi nih an hrinmi fale cu Nefalim tiah auh an si, annih nih mah lio caan i a nungmi hna kha harnak le fahnak an pek hna. (Genesis 6:1, 2, 4) Cucaah Pathian nih miṭhalo pawl hrawh awk le miṭha pawl kha nunning thar in nun khawh awkah bia a khiah.—Genesis 6:6, 7, 17.

An hngalh. Pathian nih Noah kha a cang dingmi kong a chimh i a chungkhar le saram pawl him tein an um khawh nakhnga lawng sak dingin lamhruainak a pek. (Genesis 6:13, 14; 7:1-4) Noah nih mi pawl kha a ra laimi hrawhnak kong ralrin a pek hna nain zei ah an rel lo. (2 Peter 2:5) Baibal nih hitin a ti: “Tilian a hung tlun taktak i a fenh dih hna hlantiang kha cu, zeihmanh an hngal lo.”—Matthai 24:37-39.

Lawng cu a ngan tukmi kuang bantuk a si i a sau pe 437 (133 meter), a kauh pe 73 (22 meter), a san pe 44 (13 meter) a si. a Lawng cu thing ṭha in an sak i a chung he, a leng he kattaza sii an thuh. Dot thum a um i a khaan zong tampi a um. Lawng a kam ah innka a um i a cungah thlalang awng a um. Ti a tlak khawh nakhnga a cung khuh kha a lai in zumter dawh a si.—Genesis 6:14-16.

Noah cu lawng saknak ah zei can dah a rauh ti kha Baibal nih a chim lo, asinain kumhrabu tampi rauh dawh a si. Noah cu a fapa upa bik a ngeih lioah kum 500 leng a si i Buanchukcho a tlun lioah kum 600 a si. b—Genesis 5:32; 7:6.

Pathian nih Noah kha a fapale pathum an cutzat i nupi an ngeih hnuah lawng sak a fial, mah caan karlak cu kum 50 asiloah 60 hrawng a rau men lai. (Genesis 6:14, 18) Mah cungah i hngat in lawng saknak ah kum 40 asiloah 50 an rau tiah ti khawh a si.