Aan bawmh khawh. Pathian nih a zawmi a salle kha a zohkhenh hna. Zumhfekmi a salle kong he aa tlaiin Baibal nih hitin a ti: “A zawt tikah BAWIPA nih a bawmh lai i a damter ṭhan lai.” (Salm 41:3) Caan saupi a zawmi na si ahcun inkhawh awkah a tanglei i a kong pathum nih aan bawmh khawh:

1. Inkhawhnak ngeih awkah thla cam. “Pathian daihnak, minung hngalhnak a lonhtu” kha na hmuh lai, mah nih na lungretheihnak kha a zorter khawh i lungdaihnak aan pek khawh.​—Filipi 4:6, 7.

2. A ṭhatnak in hmuhnak ngei. Baibal nih hitin a ti: “Lungthin lawmh hi sii ṭha a si, sihmanhsehlaw lungthin ngaihchia nih ruh kha a roter.” (Phungthlukbia 17:22) Nuam tein um khawh i zuam, mah nih na ngaihchiatnak kha a zorter deuh lai i na ngandamnak zong a ṭhatter deuh lai.

3. Hmailei naa ruahchannak kha fehter. A ṭhami ruahchannak nih caan saupi na zawt hmanhah i nuamh awkah aan bawmh khawh. (Rom 12:12) Baibal nih hmailei caan kong he aa tlaiin hitin a chimchung: “Kan ram i a ummi cu ka zaw tiah an zai ti lai lo.” (Isaiah 33:24) Chan thar science fimnak nih a damh khawh lomi zawtnak hna kha Pathian nih a hloh cang lai. Tahchunhnak ah, Baibal nih tar an no ṭhan lai timi he aa tlaiin hitin a ti: “Cu pa cu a tlanval lio nak khan a titsa a ṭha deuh lai i a ṭhawn siling te ah khan a kir ṭhan lai.”​—Job 33:25.

Cinken awk: Jehovah Tehte Hna nih Pathian bawmhnak kha an i bochan ko nain caan saupi zawtnak he aa tlaimi siithlopnak zong an cohlan. (Marka 2:17) Asinain siithlop ning pakhatkhat he aa tlaiin hnatlaknak kan tuahmi cu a um lo; pakhat cio nih mah tein biakhiahnak tuah awk a si ti kha kan hngalh.