Baibal ah Jesuh chuah nithla a langhtermi a um lo i a chuah ni puai tuah ding a si ti zongin a chim lo. McClintock le Strong i Cyclopedia timi cauk nih hitin a ti: “Christmas puai tuah dingin Pathian nih a kan fial lo i Biakam Thar zongah a um lo.”

Christmas puai kong hlathlai tikah a hmaan lomi biaknak phungphai hna in a rami a si ti kha kan hngalh khawh. Pathian nih a duh lomi lam in amah biak awkah kan i zuam ahcun Pathian kan serhsatmi bantuk a si tiah Baibal nih a langhter.—Exodus 32:5-7.

1. Jesuh chuah ni puai tuahnak: “A hmasa Khrihfa hna nih [Jesuh] chuah ni puai an tuah lo. Zeicatiah mi pakhatkhat i a chuah ni puai tuah cu a hmaan lomi biaknak phunglam a si tiah an ruah caah a si.”—The World Book Encyclopedia.

2. December 25: Mah ni ah Jesuh a chuak timi langhtertu zeihmanh a um lo. Church hruaitu hna nih khuasik thla i ni a tawi bik caan ah tuahmi a hmaan lomi biaknak puai hna he aa khah nakhnga mah ni kha an thimmi a si kho men.

3. Laksawng peknak, rawldanghnak le party puai: The Encyclopedia Americana nih hitin a ti: “Christmas puai phungphai tam deuh cu December thla lai ah tuahmi, Saturnalia tiah auhmi Rom mi hna puai in a rami a si. Tahchunhnak ah, rawldanghnak puai sunglawi taktak in tuahnak, laksawng i peknak le phazawngdaing vannak hna cu mah puai in a rami a si.” Saturnalia puai an tuah lioah “rian le chawlehnak vialte kha an ngol chung” tiah Encyclopædia Britannica nih a langhter.

4. Christmas mei vannak: The Encyclopedia of Religion timi cauk ningin Europe mi hna cu khuasik thla i ni a tawi bik caan ah puai tuah awk le khuachia ṭhawl awkah an inn ah “mei an van i a hring pengmi thingkung a phunphun” in an ṭamh.

5. Mistletoe le holly kung: Mah kung hi Christmas ṭamhnak caah hman tawnmi a si. “Mistletoe kung ah khuaruahhar a simi thil ti khawhnak a um tiah celtic siangbawi pawl nih an zumh. Nika a rak kir ṭhannak puai caah a zungzal in a hring pengmi holly kung kha an biak.”—The Encyclopedia Americana.

6. Christmas thingkung: “A hmaan lomi biaknak ah a ummi Europe mi hna Khrihfa biaknak i an luh hnu hmanhah thingkung biaknak cu a um rih.” Thingkung biaknak lakah atu tiang a um peng rihmi phungphai pakhat cu “khuasik thla lai ah tuahmi puai hna caah innka luhnak asiloah innchung ah Christmas thingkung an chiahmi” hi a si.​—Encyclopædia Britannica.