Mi tampi nih kum fatin October 31 ah Halloween puai kha an tuah. Mah ni kong kha Baibal nih a langhter lo. Halloween puai aa thawknak le phungphai hna cu Baibal cawnpiaknak he aa ralkah.

Mah capar ah

•  Halloween puai tuanbia le phungphai hna

•  Halloween puai aa thawknak a hrampi cu a biapi maw?

•  Zeicah Halloween tiah an auh?

•   Samhain puai: Halloween puai aa thawknak a hrampi cu “a luancia kum 2,000 leng lioah Celtic miphun nih an tuahmi puai in aa thawkmi a si” tiah The World Book Encyclopedia nih a ti. “Celtic mi nih Samhain puai an tuah chungah mithi pawl cu a nungmi hna lakah an i chawk kho i a nungmi hna zong mithi pawl he an tlawnglengṭi kho tiah an zumh.”—“ Zeicah Halloween Tiah An Auh?” timi kha zoh.

•   Halloween thilthuam, muṭhai, ‘a thlummi dangh maw na duh asiloah ṭhih dah’: Celtic mi cheukhat nih khuachia hmai pungsan hmaihuh kha an i huh, cutin an i huhmi cu khuachia nih “anmah bantukin kan ruat hna sehlaw” harnak kan pe hna hlah seh ti an duh caah a si tiah cauk pakhat nih a ti. Cheukhat nih khuachia pawl an thin a hun nakhnga lo le harnak an pek hna nakhnga lo a thlummi rawl an pek hna. a

   AD 500 in 1,500 kar i Europe ah Catholic siangbawi hna nih an pawngkam ah a ummi, a hmaan lomi phungphai hna kha an hun tuah. An buchung i a ummi kha thilthuam an hrukter hna, innkhat hnu innkhat ah an kalter hna i laksawng an halter hna.

•   Khuachia, thidawp hmang, cenghngia minung, hnam ngei le zombie: Mah hna le khuachia vawlei an i pehtlaihnak cu a sau cang. Mah hna kha “kokek thil a lonhmi thilnung nganpipi” tiah an auh hna i “thihnak, mithi, thih ṭihnak he aa pehtlaimi a si” tiah cauk pakhat (Halloween Trivia) nih a langhter.

•   Halloween mai: AD 500 in 1,500 kar i Britain ah mi hna cu “innkhat hnu innkhat ah an kal i rawl na kan pek ahcun mithi caah thla kan in campiak hna lai tiah an ti hna.” Cun “ba in sermi meiinn” zong an i put i “mah meiinn chung ah a ummi phazawngdan nih hell fate ah hren a simi thlarau” kha a langhter tiah cauk pakhat (Halloween—From Pagan Ritual to Party Nigh) nih a ti. Khuachia pawl an rat nakhnga lo ding caah meiin pawl an hmanmi a si tiah tuanbia lei mifim cheukhat nih an ti. AD 1,800 hnuah Chaklei America ah a ummi pawl nih ba canah mai kha an hun hman. Mai a tam caah le an duh ningin an vih, an ṭamh khawh caah a si.

 A biapi. Mi cheukhat nih Halloween puai kan tuahmi cu nuamhnak caah a si, ahohmanh a hnorsuang hna lo tiah an ruah. Asinain puai ah an tuahmi thil hna cu Baibal cawnpiaknak he aa ralkah. Halloween puai cu mithi, thlarau le khuachia pawl he aa pehtlaimi a hmaan lomi ruahnak cungah aa hngatmi a si.

 Halloween puai he aa tlaimi zumhnak pawl Jehovah nih zeitindah a hmuh ti hngalh awkah a tanglei Baibal caang hna kha hlathlai:

•   “Nannih lakah . . . khuavang ngei, hnam ngei, thi tlawn thiam ahohmanh nan um lai lo.”—Deuteronomi 18:10-12.

   A sullam: Mithi he pehtlaih dingin i zuam asiloah mithi he pehtlaihnak a tuahmi bantukin i umter kha Pathian nih a duh lo.

•   “A thimi nih cun zeihmanh an hngal lo.”—Phungchimtu 9:5.

   A sullam: A thimi nih zeihmanh an hngalh lo caah a nungmi he pehtlaihnak an tuah kho lo.

•   “Khuachia he hawikom si cu kaan duh hna lo. Bawipa hrai le khuachia hrai cu nan din kep kho hna lai lo; Bawipa cabuai le khuachia cabuai zong nan hman kep kho hna lai lo.”—1 Korin 10:20, 21.

   A sullam: Pathian mithmai ṭha hmuh a duhmi hna nih khuachia pawl he an i pehtlaih awk a si lo.

•   “Khuachia hlennak kha nan doh khawh nakhnga Pathian nih aan pekmi hna ralthuam vialte kha i hruk u. Zeicahtiah kan dohmi hna cu minung kha si loin . . . thlarau sual ṭhawnnak hna le uktu hna le nawlngeitu hna le hi a muimi chan lianhngannak hna hi an si.”—Efesa 6:11, 12.

   A sullam: Khuachia a do dingmi Khrihfa hna nih cun khuachia pawl he puai an tuahṭi awk a si lo.