Harnak nganpi cu minung nih kan tonmi vialte lakah a har bikmi caan a si lai. Baibal chimchungbia ning in “ni hmanung bik caan” asiloah “donghnak caan” ah a cangmi a si lai. (2 Timote 3:1; Daniel 12:4) Mah cu “Pathian thil ser hramthawknak in atu tiang ah a um bal lomi, hmailei zong ah a um lo dingmi harnak” a si lai.—Marka 13:19; Daniel 12:1; Matthai 24:21, 22.

Harnak nganpi chung ah a tlung dingmi

•   A hmaan lomi biaknak hrawh a si lai. A hmaan lomi biaknak cu ruahlopi in hrawh a si lai. (Biathlam 17:1, 5; 18:9, 10, 21) A hrawktu cu United Nations (UN) ah aa telmi cozah hna an si lai i cutin an tuahmi cu Pathian aa tinhmi ning in a si lai.—Biathlam 17:3, 15-18. a

•   A hmaanmi biaknak doh a si lai. Ezekiel nih a hmuhmi langhnak ah ‘Magog ram ah a ummi Gog’ tiah auhmi, ram tampi in dirhmi phu nih a hmaanmi biaknak a zulmi hna kha hrawh awkah aa zuam lai. Asinain Pathian nih amah a biami hna kha a huhphenh hna lai.—Ezekiel 38:1, 2, 9-12, 18-23.

•   Vawlei mi hna biaceih an si lai. Jesuh nih mi vialte bia a ceih hna lai i “tuukhal nih tuu le meheh a ṭhen hna bantuk in miphun vialte kha phu hnih in a ṭhen hna lai.” (Matthai 25:31-33) Jesuh nih mi pawl kha vancung ah amah he uktu a ṭuan dingmi a “naule” an bawm hna maw, bawm hna lo timi cung ah i hngat in bia a ceih hna lai.—Matthai 25:34-46.

•   Pennak ah uktu a ṭuan dingmi pumh an si lai. Khrih he uktu in thim a simi, zumhawktlakmi hna cu vawleicung an nunnak a dong lai i vancung ah thawhter ṭhan an si lai.—Matthai 24:31; 1 Korin 15:50-53; 1 Thesalon 4:15-17.

•   Armageddon. “Lianngan Bik Pathian ni lianngan ni” ah a tlung dingmi raldohnak cu “Jehovah ni” ti zong in auh a si. (Biathlam 16:14, 16; Isaiah 13:9; 2 Peter 3:12) Jesuh nih midinglo in bia a ceihmi hna cu hrawh an si lai. (Zefaniah 1:18; 2 Thesalon 1:6-10) Baibal ah lu pasarih a ngeimi sahrang in a langhtermi vawleicung cozah vialte cu Armageddon ah hrawh an si lai.—Biathlam 19:19-21.

Harnak nganpi hnuah a tlung dingmi

•   Satan le khuachia pawl hren an si lai. A ṭhawngmi vancungmi nih Satan le khuachia pawl kha thihnak he aa lomi, cawlcangh khawh ti lonak hmun a simi “khor chung ah” a thlak hna lai. (Biathlam 20:1-3) Satan cu khor chung ah thongthlakmi bantuk a si lai i khoika hmanh ah mi kha a hnorsuang kho ti hna lai lo.—Biathlam 20:7.

•   Kum thongkhat uknak aa thawk lai. Pathian Pennak nih kum thongkhat uknak hram a thawk lai. Mah tikah mi vialte thluachuah an hmu lai. (Biathlam 5:9, 10; 20:4, 6) Rel cawk lomi “mibu nganpi” cu “hremnak nganpi a ingmi kha an si” i vawleicung ah kum thongkhat uknak aa thawkmi kha an hmuh lai.—Biathlam 7:9, 14; Salm 37:9-11.