Baibal Ah Hnemhnak Bia Ka Hmu Kho Maw?
Baibal chimmi
Na hmuh khawh. (Rom 15:4) A harmi thil sining le lungretheihnak tampi a tongmi hna hnemhnak a pemi Baibal caang cheukhat kha zohhmanh hna u sih.
Hi capar ah
Sifah harnak
Salm 23:4: “Cu lam cu a thuk bikmi muihnak chungin kal hmanhsehlaw BAWIPA, zeihmanh ka ṭih lai lo, zeicahtiah nangmah nih na ka umpi ko.”
A sullam: Lamhruainak hmuh awkah Pathian sinah thla na cam i a Bia, Baibal kha naa bochan ahcun harnak na ton tikah ralṭhatnak na ngei kho lai.
Filipi 4:13: “[Pathian] nih ṭhawnnak a ka pekmi thawngin zei thil hmanh hung chuak hna sehlaw ka ton khawh ko hna.”
A sullam: Pathian nih harnak na tonmi paoh tawnghtham awkah thazaang aan pek khawh.
Dawtmi pakhat nih thihtaknak
Phungchimtu 9:10: “Sheol ah cun rian siseh, ruahnak siseh, hngalhnak siseh, fimnak siseh a um ti lo.”
A sullam: A thimi hna cu sifah harnak an tuar ti lo i harnak zong a kan pe kho ti lo. Zeihmanh an hngal ti lo.
Lamkaltu 24:15: “Thihnak in kan tho ṭhan dih lai.”
A sullam: Pathian nih kan dawtmi a thimi hna kha a thawhter ṭhan hna lai.
Sualnak ka ngei timi ruahnak
Salm 86:5: “Nangmah sin i thla a cammi hna cungah cun na ṭha i ngaihthiamnak le a fekmi dawtnak in na khat, maw BAWIPA [Jehovah, NW].” a
A sullam: Pathian nih hlanlio an tuahmi sualnak ruangah aa ngaichih taktakmi hna le sualnak tuah ṭhan ti lo awkah biakhiahnak a tuahmi hna kha a ngaihthiam hna.
Salm 103:12: “Nichuahlei le nitlaklei an i hlat tluk khin kan sualnak cu kanmah he i hlat ah a kan ṭhialpiak.”
A sullam: Pathian nih a kan ngaihthiam tikah kan sualnak kha kan mitthlam ah cuanter kho ti lo tiangin kanmah he aa hlatnak ah a kan ṭhialpiak. Mah kong kha a kan hngalhter ṭhan ti lo i sualphawt awk asiloah dantat awkah atu le atu a kan chim ṭhan ti lo.
Ngaihchiatnak
Salm 31:7: “Ka temhinnak kha na hmuh i ka harnak kha na hngalh.”
A sullam: Pathian nih na tonmi harnak vialte kha a hngalh dih. Midang nih an hngalhthiam lo hmanhah Pathian nih cun na intuarnak vialte zong kha a hngalhthiam dih.
Salm 34:18: “Lung a dongmi kha BAWIPA nih a umpi hna i ruahchannak a ngei lomi kha a khamh hna.”
A sullam: Pathian nih na ngaih a chiat tikah kaan bawmh lai tiah bia aan kamh. Na lungfahnak tawnghtham awkah thazaang aan pek khawh.
Zawtnak
Salm 41:3: “A zawt tikah BAWIPA nih a bawmh lai i a damter ṭhan lai.”
A sullam: A ṭhami biakhiahnak tuah khawh awkah Pathian nih thazaang, inkhawhnak, fimnak le chunglei daihnak aan peknak thawngin a zual tukmi zawtnak hna kha tawnghtham awkah aan bawmh khawh.
Isaiah 33:24: “Kan ram i a ummi cu ka zaw tiah an zai ti lai lo.”
A sullam: Pathian nih mi vialte ngandam tein an um lainak caan kong kha bia a kan kamh.
Lungretheihnak
Salm 94:19: “Khuaruahhar vansang au in ka um tikah na ka hnemh i ka lung na ka lawmhter.”
A sullam: Kan lungre a theih tikah Pathian kha kan i bochan ahcun lungdaihnak ngeih awkah a kan bawmh lai.
1 Peter 5:7: “Amah nih aan zohkhenh hna caah nan lung retheihnak vialte kha amah cungah chia dih ko u.”
A sullam: Pathian cu sifah harnak kan tonmi cungah zawnruahnak a ngei. Kan lungretheihnak kong kha a sinah thlacam dingin a kan sawm.
Raltuknak
Salm 46:9: “Hi vawleicung pumpi ah ral cu a daihter dih ko hna.”
A sullam: A rauhhlan ah Pathian Pennak nih raltuknak vialte cu a donghter dih cang lai.
Salm 37:11, 29: “Mi toi ah aa dormi cu ram chungah hin him tein an um lai i daihnak kha tlamtling tein an hmuh lai. . . . A dingmi cu ram chungah him tein an um lai i ram cu zungzal in anmah ta a si lai.”
A sullam: Pathian miphun pawl cu vawleicung ah dai tein an um zungzal cang lai.
Hmailei kong ah lungretheihnak
Jeremiah 29:11: “Nan ca i ka tinhmi cu keimah lawnglawng nih ka hngalh tiah BAWIPA nih a ti. Cucu vanchiatnak si loin daihnak a si lai i nan i ruahchanmi hmailei nunnak kha pek kan duh hna.”
A sullam: A miphun pawl nih a ṭha tukmi hmailei an i ruahchan khawh ning kong kha Pathian nih aamah a khan.
Biathlam 21:4: “An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang” a ti.
A sullam: Pathian nih tuchan ah kan tonmi le kan hmuhmi a ṭhalomi thil vialte hi ka hrawh dih cang lai tiah bia a kan kamh.
a Jehovah cu Pathian i pumpak a min a si. (Salm 83:18, NW) “Jehovah Cu Ahodah A Si?” timi capar kha rel.
Mah Kong Hna Zong Hi Na Duh Khawh Men
VENNAK INNSANG
Pathian Zohkhenhnak In Ṭhatnak Na Hmu Kho
Baibal nih hmailei kong Pathian biakam kan zumhnak kha a fehter chin.
BAIBAL BIAHALNAK A PHI
Khoika In Dah Ruahchannak Kan Hmuh Khawh?
Zumhawk a tlakmi a hrampi nih atu ah na nunnak a ṭhatter khawh i hmailei ruahchannak zong aan pek khawh.
A KONG TAM DEUH
A Ngaih A Chiami Hna Caah Hnemhnak
Dawtmi nih a kan thihtak tikah kan intuarnak cu ahohmanh nih an hngalthiam lo tiah kan ruah men lai. Asinain Pathian nih a hngalhthiam i a kan bawmh khawh.
VENNAK INNSANG
Nunnak cu Ruahchannak a Um Lomi a Lawh tikah
Zeibantuk harnak kan ton hmanhah nun man cu a phu ko.
ESSENTIAL BIBLE TEACHINGS
Zeicah Pathian Nih Sifah Harnak Hi Umnak Nawl A Awnh?
Baibal nih lungsi hnangamnak le hnemhnak a pemi a phi a kan pek.
BAIBAL CAWNPIAKMI
Baibal Kha Cawng Chunh
Man loin pakhat le pakhat Baibal kong i ruahceihṭinak kha tuahchunh.