Baibal ah Jesuh cu “Pathian Fapa” tiah a auh lengmang. (Johan 1:49) “Pathian Fapa” timi bia nih Jesuh i tel in Pathian cu thilnung vialte i nunnak Hrampi asiloah Sertu a si ti kha a langhter. (Salm 36:9; Biathlam 4:11) Minung nih fa kan ngeih bantuk in Pathian zong nih fa a ngeih ve hna tiah Baibal nih a kan cawnpiak lo.

Baibal nih vancungmi zong “Pathian fapa hna” tiah a auh hna. (Job 1:6) Cun Baibal nih a hmasa bik mipa Adam zong “Pathian fapa” tiah a auh. (Luka 3:38) Asinain Jesuh cu Pathian nih a ser hmasa bikmi le amah nih direct in a sermi a si caah Baibal nih Pathian Fapa ngeihchun tiah a ti.

•  Jesuh cu vawleicung ah hrin a si hlanah vancung ah a um cang maw?

•  Jesuh cu vawleicung a rat hlanah zeidah a tuah?

A um cang. Jesuh cu vawleicung ah minung in hrin a si hlanah vancung ah thlarau pum in a rak um cang. Jesuh theng nih hitin a ti: “Vancung in ka rung ṭum.”—Johan 6:38; 8:23.

Zei zong vialte a ser hlanah Pathian nih Jesuh kha a ser. Jesuh kong he aa tlaiin Baibal nih hitin a ti:

• “Khrih cu . . . sermi thil vialte hna nakin a cungnung deuhmi a si.”—Kolose 1:15.

• “Amah cu Pathian nih a sermi vialte hram a si.”—Biathlam 3:14.

“Amah a hram cu kan hnuleipi caan, a luan cangmi caan chungah khan a um cangmi a si” timi chimchungbia kha Jesuh nih a tlinter.—Mikah 5:2; Matthai 2:4-6.

Vancung ah a sangmi rian a rak ngei. Jesuh nih mah a sangmi rian kong he aa tlaiin a thlacamnak ah hitin a ti: “Ka Pa, vawlei ser hlan i nangmah sin i ka rak ngeihmi sunparnak kha . . . ka pe tuah.”—Johan 17:5.

Zei zong vialte sernak ah Pathian kha a rak bawmh. Jesuh cu “rian thiam ngaimi” in Pathian he rian an ṭuanṭi. (Phungthlukbia 8:30) Jesuh kong he aa tlaiin Baibal nih hitin a ti: “Pathian nih Khrih thawng cun van le vawlei i a ummi thil vialte kha a ser hna.”—Kolose 1:16.

Pathian nih Jesuh hmangin zei zong vialte kha a ser. Van le vawlei i tel in vancungmi vialte zong a ser hna. (Biathlam 5:11) Thil sining cheukhat ah Pathian le Jesuh an rian ṭuan ning cu inn pungsan a suaitu [architect] le inn a satu he aa lo. Inn pungsan a suaitu nih inn pungsan kha a suai i inn satu nih mah ningin a sak.

Anih cu Bia a si. Minung in hrin a si hlan i a nunnak kong he aa tlaiin a chim tikah Baibal nih Jesuh kha “Bia” tiah a auh. (Johan 1:1) Cucaah a dang vancungmi pawl sinah thawngthanh awk le lamhruainak pek awkah Pathian nih a Fapa kha a hman ti cu a fiang ko.

Jesuh cu minung sinah Pathian Bia a chimtu zong a si. Eden dum i Adam le Evi sinah Pathian nih Bia a simi Jesuh sinin lamhruainak a pekmi hna a si men lai. (Genesis 2:16, 17) Hlanlio Israel mi thetse ram ah lam a hruaitu hna vancungmi zong Jesuh a si men lai. Mah vancungmi nawl kha ngaih awkah Israel mi pawl cu nawl pek an si.—Exodus 23:20-23. a