Jesuh Muisam Cu Zeidah A Lawh?
Baibal chimmi
Baibal nih Jesuh muisam kong kha a langhter lo caah ahohmanh nih Jesuh muisam taktak kha an hngal lo. Mah nih Jesuh muisam cu a biapi lo ti kha a langhter. Asinain Baibal caang cheukhat zohnak thawngin Jesuh muisam kha mitthlam ah suai khawh a si.
A muisam: Jesuh cu Judah miphun a si caah a chuahkehnak miphun mui a keng lai ti cu a fiang ko. (Hebru 7:14) Midang he aa thleidangmi muisam ngeih dawh a si lo. Voikhat cu ahohmanh hngalh loin Galili in Jerusalam khua ah a thli tein a rak kal. (Johan 7:10, 11) A zultu lak zongah aa thleidang hlei lo. Cucaah hriamnam aa kenmi mibu nih amah tlaih dingin an rat tikah Judas Iskariot nih hngalhternak a tuahpiak hna.—Matthai 26:47-49.
A sam: Baibal nih “sam sau cu pa caah cun ningzak a si” tiah a ti caah Jesuh cu a sam a sau theng men lai lo.—1 Korin 11:14.
A khahmul: Jesuh cu khahmul a ngei. “Nan khahmul zong a par nan riam lai lo” timi pa pawl thlauh an simi Judah phungphai kha a rak zulh. (Levitikas 19:27; Galati 4:4) Cun Jesuh nih a ton dingmi harnak kong chimchungbia zongah Jesuh kha khamul a ngeimi in a langhter.—Isaiah 50:6.
A pumrua: Langhternak vialte nih Jesuh kha a ṭhawngmi in a langhter. Phungchim rian a ṭuan lioah meng tampi a ke in a rak kal. (Matthai 9:35) Judah mi hna biakinn kha voihnih a rak thenh, tangka thlengtu pawl an cabuai kha a rak lehpiak hna i an saṭil pawl kha hrihrual in a rak ṭhawlpiak dih hna. (Luka 19:45, 46; Johan 2:14, 15) McClintock le Strong Cyclopedia nih hitin a ti: “Thawngṭha cauk vialte nih [Jesuh cu] a ngan a dam i a ṭhawngmi a si kha an langhter.”—Volume IV, cahmai 884.
A mithmai: Jesuh cu dawtnak le zaangfahnak a ngeimi a si i mah kha a mithmai ah a lang lai ti cu a fiang ko. (Matthai 11:28, 29) Mikip nih hnemhnak le bawmhnak hmuh awkah a sinah an rat hnawh. (Luka 5:12, 13; 7:37, 38) Ngakchia hmanh nih a sinah um kha an duh.—Matthai 19:13-15; Marka 9:35-37.
Jesuh muisam he aa tlaiin a hmaan lomi ruahnak
A hmaan lomi ruahnak: Mi cheukhat nih Jesuh cu Africa mi a si lai tiah an ruah, zeicatiah Biathlam cauk nih a sam kha tuuhmul he a tahchunh i a ke kha “tleu tein an hnormi dar” he a tahchunh caah a si.—Biathlam 1:14, 15.
A hmaanmi: Biathlam cauk cu “hngalhtertu” in langhtermi a si. (Biathlam 1:1) Jesuh a sam le a ke langhtermi cu vawleicung a um lio i a muisam kha a langhtermi si loin a thawh ṭhan hnu i a sining langhter awkah tahchunhnak in a hmanmi a si. Biathlam 1:14 ah Jesuh “a sam cu tuuhmul bantuk a si i hawhra bantukin a ngo” tiah a ti tikah a rong taktak kha a chimmi si loin tahchunhnak in a chimmi a si. A raangmi sam nih Jesuh cu kum upa pakhat i fimnak a ngei ti kha tahchunhnak in a langhtermi a si.—Biathlam 3:14.
Jesuh a ke cu “somei chungah an tit i tleu tein an hnormi dar bantuk” a si. (Biathlam 1:15) Cun a hmai cu “chunlai ni ceu bantukin a ceu.” (Biathlam 1:16) Cu bantuk langhternak hna he aa khatmi minung ahohmanh an um lo caah mah langhnak cu tahchunhnak a si i a tho ṭhanmi Jesuh cu “a naih in naih khawh lomi ceunak chung i a ummi” a si ti kha a langhter.—1 Timote 6:16.
A hmaan lomi ruahnak: Jesuh a tha a dermi a si.
A hmaanmi: Jesuh a umtu ning cu a pasal tuk. Tahchunhnak ah, hriamnam aa putmi mibu nih amah tlaih awk an rat tikah ralṭha tein aa hngalhter hna. (Johan 18:4-8) Lehtama pakhat in hriamnam pawl ṭha tein a hman khawh caah a thazaang a ṭhawngmi a si ko lai.—Marka 6:3.
Zeicah Jesuh nih a vailam tung putnak caah bawmh a herh? Amah he an thlaiṭimi midang pawl thah an si hlanah zeicah a thih? (Luka 23:26; Johan 19:31-33) Jesuh cu thah a si hlan tein pumsalei ah a thazaang a rak der cang. Zan khuadei lungthinlei fahnak a tuar. (Luka 22:42-44) Judah mi nih zan khuadei an hrem i a thaizing zingka ah Rom mi nih tung ah an thlai. (Matthai 26:67, 68; Johan 19:1-3) Mah a kong hna ruangah a thih colhmi a si lai.
A hmaan lomi ruahnak: Jesuh cu aa nuam bal lomi, a ngaih a chia pengmi a si.
A hmaanmi: Baibal nih “aa nuammi Pathian” in a langhtermi vancung a Pa Jehovah sining hna kha Jesuh nih tling tein a langhter. (1 Timote 1:11, NW; Johan 14:9) A tak ti ahcun Jesuh nih midang kha i nuamh khawh ning a cawnpiak hna. (Matthai 5:3-9; Luka 11:28) Mah nih Jesuh mithmai ah nuamhnak a lang lai ti kha a langhter.