Jesuh tlanhnak man cu minung kha sualnak le thihnak in Pathian khamhnak lam a si. Baibal nih Jesuh thletmi thisen kha tlanhnak man in a langhter. (Efesa 1:7; 1 Peter 1:​18, 19) Cucaah Jesuh nih ‘mi tampi tlanhnak ca ka nunnak pek awkah’ ka ra tiah a ti.​—Matthai 20:28.

Zeicah ‘mi tampi tlanhnak’ cu a herh?

 Hmasa bik mipa Adam cu mitling in ser a si i sualnak a ngei lo. Zungzal nun ding ruahchannak a ngei nain Pathian nawl a ngaih lo caah mah kha a rak sung. (Genesis 3:​17-​19) Fa a ngeih tikah sualnak ro a pek hna. (Rom 5:​12) Cucaah Adam nih amah le a fale kha sualnak le thihnak sal ah a ‘zuar’ hna tiah Baibal nih a ti. (Rom 7:​14) A tefa hna cu a tlingmi an si ti lo, cucaah Adam sunghmi thil kha ahohmanh nih an caw ṭhan kho ti lo.​—Salm 49:​7, 8.

 Ruahchannak a ngei lomi Adam tefa hna kha Pathian nih a zaangfah hna. (Johan 3:​16) Asinain a dingmi Pathian phunglam nih a fekmi a hrampi kong um loin an sualnak kha a ngaithiam hna lo. (Salm 89:14; Rom 3:​23-​26) Pathian nih minung kha a kan dawt tuk caah kan sualnak ngaihthiam lawng si loin hlohpiak awkah phung ningin a kan timhpiak. (Rom 5:​6-8) Mah phung ningin sermi cu tlanhnak man kha a si.

Tlanhnak man timi cu zeidah a si?

 Baibal ningin “tlanhnak man” timi biafang ah a kong pathum aa tel:

1.   Pekmi a man kha a si.​—Nambar 3:​46, 47.

2.   Luatnak asiloah tlanhnak kha a si.​—Exodus 21:30.

3.   A man aa khatmi asiloah a khuhmi kha a si. a

 Mah a kong pathum cu Jesuh tlanhnak man he zeitindah aa pehtlaih ti kha zohhmanh u sih.

1.   A man. Baibal nih Khrihfa hna cu “a man in cawkmi” an si tiah a ti. (1 Korin 6:​20; 7:​23) Mah man cu Jesuh thi kha a si. Jesuh nih ‘hrin kip le chung kip le holh kip le phun kip chungin, minung cu Pathian [caah a thi in a cawk hna, NW] sinah a phakpi hna.’​—Biathlam 5:​8, 9.

2.   Luatnak. Jesuh tlanhnak man thawngin sualnak in ‘luatnak’ kan hmu.​—1 Korin 1:​30; Kolose 1:​14; Hebru 9:​15.

3.   A man aa khatmi. Jesuh tlanhnak man cu Adam nih a sunghmi, a tlingmi miung nunnak he aa khat. (1 Korin 15:21, 22, 45, 46) Baibal nih hitin a ti: “Mipa [Adam] pakhat nawlngaih lo ruangah mi tampi kha misual i ser an si bantukin mipa [Jesuh] pakhat nawlngaih ruangah mi tampi cu miding ah ser an si lai.” (Rom 5:19) Mah nih mi pakhat thihnak nih mi tampi caah tlanhnak man zeitindah a pek khawh ti kha a kan hngalhter. A tak ti ahcun, Jesuh tlanhnak cu mah in ṭhatnak hmuh a duhmi “mi vialte caah aa khatmi tlanhnak” a si.​—1 Timote 2:​5, 6.