A kan bawmh khawh. Ka sual timi ruahnak tei awkah Baibal nih a kan bawmh khawh. (Salm 32:1-5) Palhnak kan tuah tikah lungtak tein kan i ngaihchih ahcun Pathian nih a kan ngaihthiam lai i a hmaanmi thil tuah awkah a kan bawmh lai. (Salm 86:5) A caan ah sualnak ka ngei timi ruahnak nih ṭhatnak a chuahter ti kha Baibal nih a langhter—zeicahtiah mah nih palhnak kha i remh awk le hmailei ah tuah ti lo awkah a kan forh khawh caah a si. (Salm 51:17; Phungthlukbia 14:9) A hleihluat tuk in sualnak ka ngei timi ruahnak ngeih lo awkah Baibal nih ruahnak a kan cheuh, zeicahtiah mah nih ruahchannak a ngei lomi asiloah Pathian hmaiah aa tlak lomi in a kan ruahter khawh caah a si. Cu bantuk ruahnak kan ngeih ahcun ‘kan lung a dong’ kho.—2 Korin 2:7.

•  Zeinihdah ka sual timi ruahnak a kan ngeihter khawh?

•  Ka sual timi ruahnak kha zeitindah kan tawnghtham khawh?

•  Sualnak le ngaihthiamnak he aa tlaimi Baibal caang

 Ka sual timi ruahnak a kan ngeihter khomi a ruang tampi a um. Kan dawtmi hna an lung kan fahter hna tik asiloah kan tuah awk a simi thil kan tuah lo tikah cu bantuk ruahnak kan ngei kho. A caan ah sualnak kan tuah taktak lo nain ka sual timi ruahnak kan ngei kho. Tahchunhnak ah, aa tlak lomi, a sang tukmi phunglam kan i chiah i mah phunglam kha kan zulh khawh lo tikah ka sual timi ruahnak kan ngei kho. Mah ruangah Baibal nih kanmah le kanmah kha a tlari tein i hmuh awkah tha a kan pek.​—Phungchimtu 7:16.

 Ka sual timi ruahnak ruangah lungdongh in um canah na tuah khawhmi thil kha tuah. Zeitin in dah?

•   Na palhnak kha phuang. Jehovah a Pathian sin ah thlacamnak in ngaihthiam hal. (Salm 38:18; Luka 11:4) Lungtak tein naa ngaihchih i palhnak na tuah ti lo ahcun Pathian nih ka thlacamnak a ngaih lai ti kha na zumh khawh. (2 Chanrelnak 33:13; Salm 34:18) Minung nih an hmuh khawh lomi kan chunglei minung kha Pathian nih a hmuh khawh. Pathian nih palhnak tuah ti lo awkah kan i zuammi kha a hmuh tikah anih cu “a dingmi le zumhawk tlakmi a si caah . . . kan sualnak kha a kan ngaihthiam lai.”—1 Johan 1:9; Phungthlukbia 28:13.

   Mi pakhat cungah palhnak na tuah ahcun na palhnak kha cohlang in ngaihthiamnak na hal a hau. Mah cu a fawi lai lo! Cutin tuah awkah ralṭhatnak le toidornak ngeih a hau. Lungtak tein ngaihthiam halnak nih ṭhatnak pahnih a chuahter: Na thilrit kha a zanter lai i daihnak a chuahter lai.—Matthai 3:8; 5:23, 24.

•   Pathian zaangfahnak a langhtermi Baibal caang hna kha ruat. Tahchunhnak ah, 1 Johan 3:19, 20 hi ruathmanh. ‘Kan lung nih sual a kan phawt’ khawh tiah Baibal nih a ti. Mah cu mahle mah a hleihluat tuk in sual i phawtnak nih Pathian dawtnak hmuh awkah kaa tlak lo timi ruahnak a kan ngeihter khawh tinak a si. Asinain mah cacaang nih “Pathian cu kan lung nakin a ngan deuh” ti zongin a ti. Zeitin in dah? Kan kong dihlak kha a hngalh i kan intuarnak le kan derthawmnak kha a hngalhthiam. Kan chuahka in mitlinglo kan si caah palhnak kan tuah kho ti zong a hngalh. b (Salm 51:5) Cucaah palhnak a tuah ko nain lungtak tein aa ngaichihmi kha a hlaw hna lo.—Salm 32:5.

•   Hlanlio na palhnak kha ruat peng hlah. A hmasa ah palhnak a tuah ko nain a hnuah a nunning aa thlengmi nu le pa kong tampi Baibal ah a um. Tahchunhnak ah, lamkaltu Paul tiah hngalhmi, Tarsas khuami Saul kong hi ruathmanh. Farasi mi pakhat in Jesuh zultu hna kha fakpi in a rak hrem hna. (Lamkaltu 8:3; 9:1, 2, 11) Asinain Pathian le Messiah asiloah Khrih ka ralchanhmi hna a si ti kha a hun hngalh tikah aa ngaichih i a nunning aa thleng, cun Khrihfa hna caah zohchunh awk ṭha pakhat a hung si. Paul cu a luanciami caan i a tuahsernak cungah lungtak tein aa ngaichih, asinain mah kong kha a ruat peng lo. Pathian zaangfahnak ka hmu ti kha a hngalh caah Paul cu lungthawhnak a ngeimi cawnpiaktu a hung si i zungzal nunnak ruahchannak a ngeihmi kha a thlau ti lo.—Filipi 3:13, 14.

 Jeremiah 31:34: “An ṭhatlonak kha ka ngaihthiam hna lai i an sualnak kha ka hngal camcin ti lai lo.”

 A sullam: Pathian nih kan sualnak a kan ngaihthiam hnu cun aa cinken ti lo. Zaangfahnak taktak a langhter.