Khuachia cu a um taktakmi a si. Anih cu a hung ṭhalo i Pathian a ralchanhmi vancungmi a si lengah “hi vawlei uktupa” zong a si. (Johan 14:30; Efesa 6:11, 12) Baibal nih a tanglei i min le langhternak hna in Khuachia i a sining kha a phuan:

•   “Ralchanhtu” ti sullam a ngeimi Satan.—Job 1:6.

•   “Thangchiattu” ti sullam a ngeimi Khuachia.—Biathlam 12:9.

•   Baibal nih ‘hlengtu’ in a langhtermi Rul.—2 Korin 11:3.

•   Tukforhtu.—Matthai 4:3, NW.

•   Mi lihchim.—Johan 8:44.

A ṭhalomi lungput kha a si lo

 Mi cheukhat nih Satan Khuachia cu a um taktakmi si loin kan lungthin chungah a ummi a ṭhalomi lungput kha a si tiah an ruah. Asinain Baibal nih Pathian le Satan bia an i ruahnak kong a langhter. Pathian cu a ṭhalomi lungput i telin sualnak zeihmanh a ngei lomi a si. (Deuteronomi 32:4; Job 2:1-6) Satan nih sualnak a ngei lomi Jesuh zong kha a rak tukforh. (Matthai 4:8-10; 1 Johan 3:5) Pathian le Jesuh cu an chungah a ummi a ṭhalomi lungput he bia an i ruah ti cu a si kho lomi a si. Cucaah Khuachia cu a um taktakmi a si i a ṭhalomi lungput kha a si lo.

 Mi tampi nih Khuachia a um taktak ti an zumh lomi cu kan khuaruah a har awk a si maw? A si lo, a ruang cu Satan nih aa tinhnak a tlin khawh nakhnga hlenthawinak kha a hman tiah Baibal nih a ti caah a si. (2 Thesalon 2:9, 10) Satan i a hlawh a tling bikmi hlennak pakhat cu a um taktakmi a si kha mi nih an hngalh nakhnga lo an mit a cawttermi hna kha a si.—2 Korin 4:4.

A hmaan lomi ruahnak: Lucifer cu Khuachia i a min dang a si.

 A hmaanmi: Baibal cheukhat ah “Lucifer” tiah lehmi Hebru biafang cu “Deirel arfi ceu” ti sullam a ngei. (Isaiah 14:12) Baibal caang a cungtang bia ningin mah biafang nih Babilon siangpahrang hna kha a langhter. An i porhlawt tuk caah Pathian nih a rak hrawh hna. (Isaiah 14:4, 13-20) Babilon siangpahrang hna an tlak hnuah anmah hnehsawhnak in “Deirel arfi ceu” timi biafang cu hman a si.

A hmaan lomi ruahnak: Pathian nih Satan hmangin minung an ṭhat le ṭhat lo kha a hnesak hna, mah cungah i hngat in bia a ceih hna.

 A hmaanmi: Khuachia cu Pathian rianṭuantu si loin Pathian ral a si. Satan Khuachia nih Pathian rian a ṭuanmi hna hmanh kha a ralchanh hna i sual a puh hna.​—1 Peter 5:8; Biathlam 12:10.