Baibal ah kuak zuk a le khuhsii hmannak kong he aa tlaiin a chimmi a um lo. Asinain kan ngandamnak a hnorsuangmi le Pathian nih a duh lomi a thiang lomi ziaza pawl a langhtermi phunglam hna cu a um. Cucaah kuak zuk cu sual a si ti kha kan hngalh khawh.

• Nunnak kha upat. ‘Pathian cu minung kha nunnak le thaw a petu a si.’ (Lamkaltu 17:24, 25) Nunnak cu Pathian nih a kan pekmi laksawng a si caah kuak zuk ti bantuk chan a tawiter khomi zeibantuk thil hmanh kha kan tuah awk a si lo. Kuak zuk cu vawleicung pumpi ah thihnak a chuahter khomi thil lakah pakhat a si ve, asinain mah cu kham khawh a si ko.

• Innpa kha daw hna. “Na innpa cu nangmah naa dawt bantukin na dawt lai.” (Matthai 22:39) Mi lakah kuak zuk cu dawtnak ngeih lo a si. Kuak a zumi pawngah a ummi hna nih kuak khu kha an dawp ve caah kuak a zumi hna nih an ngeihmi zawtnak bantuk kha an ngei ve.

• Thiang tein um. “Pathian sinah a nungin pekchanhmi raithawinak bantukin i pe tuah u . . . cohlan awk tlakmi si tuah u.” (Rom 12:1) “Pum siseh, thlarau siseh, a thurhnomhtertu paohpaoh kha i thenh u sihlaw Pathian ṭih bu tein um u sih.” (2 Korin 7:1) Kuak zuk cu thiannak he aa ralchanhmi a si. Khuhsii a hmangmi hna cu an pum fakpi in a hnorsuang khomi ṭih a nungmi siivai hramhram in a hmangmi an si.

Weed asiloah pot tiah auhmi sahdah kong le a dang ritnak siivai kong kha Baibal ah an min in a chimmi a um lo. Asinain mi a leem khomi mah bantuk thil hna kha nuamhnak sawhsawh in hman awk a si lonak kong a langhtermi phunglam tu cu a um. A cunglei i phunglam hna lengah mah lamhruainak hna zong hi hman khawh an si:

• Lungthinlei thil ti khawhnak kha uk khawh a hau. “Bawipa na Pathian cu na lungthin dihlak . . . in na dawt lai.” (Matthai 22:37, 38) “Ralring tein um u.” (1 Peter 1:​13) Ritnak siivai a hmangmi pakhat nih cun a lungthin kha ṭha tein aa uk kho lo. Ritnak siivai nih a leemmi mi tampi an um. A ṭhami thil kha an ruat kho ti lo i ritnak siivai hmuh khawhnak lam lawng kha an kawl.​—Filipi 4:8.

• Upadi zul. “Bawi le nawlngeitu pawl kha an nawl nan ngaih hna lai.” (Titus 3:1) Ram tampi ah ritnak siivai cheukhat kha fakpi in an khenkham. Pathian mithmai ṭha hmuh kan duh ahcun cozah pawl nawl kha kan ngaih a hau.​—Rom 13:1.