Mirumpa le Lazaruh kong cu Jesuh chimmi tuanbia chungah aa telmi an si. (Luka 16:19-31) Tuanbia chung i mah pa pahnih nih mi phuhnih kha a aiawh hna: (1) Jesuh chan lio i aa porhlawmi Judah biaknaklei hruaitu pawl le (2) Jesuh chimmi bia a cohlangmi lungthin ṭha a ngeimi, mi sawhsawh kha an si.

Hi capar ah

•  Jesuh nih mirumpa le Lazaruh kong zeidah a chim?

•  Mah tuanbia cu a cang taktakmi a si maw?

•  Mah tuanbia nih hell mei zumhnak kha a cohlan tinak a si maw?

•  Mirumpa le Lazaruh kong tuanbia cu zei sullam dah a ngeih?

 Luka dal 16 ah Jesuh nih an sining aa thleng dihmi pa pahnih kong kha a langhter.

 Jesuh chimmi tuanbia i a tawinak cu hitin a si: Mirumpa cu nun nuam ngaingai in khua a sami a si. Rawl hal in a vakmi Lazaruh cu mirumpa innka hram ah khan an ratpi tawn. Lazaruh nih mirumpa cabuai in a tlami rawl ṭiltlawt kha an ka pek lai tiah aa ruahchan. A hnuah Lazaruh cu a thi i vancungmi nih Abraham pawngah an zuanpi. Mirumpa zong a thi ve i an vui. Tuanbia chung ahcun an pahnih in an thih hnuah khua a ruat khomi bantukin langhter an si. Mirumpa cu mei in hrem a si i nganfak ngaiin a um caah Abraham sinah Lazaruh kha a kut dong ti ah va hnimter law ka lei daihnak ding caah ka lei ah hin run ka thlerh seh tiah a ti. Abraham nih mirumpa halmi kha a tuahpiak lo. An sining cu aa thleng dih cang, an karlak ah a thuk ngaingaimi horkuang nganpi a um i duh poah in tan khawh a si lo tiah a ti.

 A si lo. Mah cu Jesuh nih thil pakhat cawnpiak awkah a hmanmi bianabia a si. Mah cu bianabia a si ti kha mifim pawl zong nih an cohlan. Tahchunhnak ah, 1912 chuahmi Luther Bible ah mah cu bianabia a si timi biatlangte pakhat aa tel. Cun Catholic Jerusalem Bible i a tanglei fianternak ah “a nung balmi mi pakhat kong kha a chim duhmi si loin tuanbia bantukin langhtermi bianabia tu a si” tiah a ti.

 Jesuh nih thih hnu nunnak kong kha a cawnpiakmi a si maw? Cun mi cheukhat cu an thih hnuah hell mei in hrem an si i Abraham le Lazaruh cu vancung ah an kai a ti duhnak tah a si maw? Cutin a ti duhnak a si lo ti a langhtermi thil tampi a um.

 Tahchunhnak ah:

•   Mirumpa cu mei in hremnak hmun taktak ah a um ahcun Lazaruh kut dong i ti cu a khu ah a cang lai a si ko lo maw?

•   A khu i a can lo hmanhah ti dorkhat nih mirumpa nganfahnak cu a daihter kho lai maw?

•   Jesuh nih mah bianabia a chim tiang ahohmanh vancung ah an kai bal lo tiah fiang tein a chim caah Abraham cu zeitindah vancung ah a um khawh lai?—Johan 3:13.

 A si lo. Mah tuanbia cu a cang taktakmi a si lo nain mi cheukhat nih miṭha cu van ah an kai lai i miṭhalo cu hell mei in hrem an si lai timi zumhnak kha a langhter duhnak a si tiah an ruah. a

 Mah ruahnak cu aa tlak maw? Aa tlak lo.

 Hell mei cawnpiaknak cu mithi sining kong he aa tlaiin Baibal cawnpiaknak he aa tlak lo. Tahchunhnak ah, Baibal nih miṭha pawl cu an thih tikah vancung ah nuam tein an nung i miṭhalo cu hell mei ah hrem an si tiah a ti lo. Mah canah hitin a ti: “A nungmi nih cun kan thi lai ti kha an hngalh, sihmanhsehlaw a thimi nih cun zeihmanh an hngal lo.”—Phungchimtu 9:5.

 Mah tuanbia ah an sining aa thleng dihmi, mi phuhnih kong kha langhter a si.

 Mirumpa nih “tangka a duhmi” Judah biaknaklei hruaitu pawl kha a langhter duhmi hna an si. (Luka 16:14) Jesuh chimmi bia kha an theih ko nain an ralchanh. Mah biaknaklei hruaitu hna nih mi sawhsawh pawl kha an nautat hna.—Johan 7:49.

 Lazaruh nih Judah biaknaklei hruaitu hna nih an nautatmi hna Jesuh bia a cohlangmi, mi sawhsawh pawl kha a langhtermi hna an si.

 An phuhnih ningin an sining cu aa thleng dih.

•   Judah biaknaklei hruaitu hna nih Pathian mithmai ṭha kan hmu tiah an i ruat. Asinain Jesuh bia kha an cohlan lo caah Pathian nih anmah he, an biaknak he a cohlang hna lo. Cucaah annih cu a thimi bantuk an si. Cun Jesuh le a zultu pawl nih an chimmi thawngṭha ruangah fahnak an ing.—Matthai 23:29, 30; Lamkaltu 5:29-33.

•   Biaknaklei hruaitu pawl nih zei ah an rel lomi, mi sawhsawh pawl cu atu ahcun mithmai ṭha an hmu cang. Mi tampi nih Jesuh cawnpiakmi Baibal bia kha an cohlan caah ṭhatnak an hmu. Atu ah annih cu a zungzal in Pathian mithmai ṭha hmuhnak caanṭha an ngei cang.—Johan 17:3.